އަންނަ އަހަރު އެންމެ ބޮޑު އިސްކަމެއް ދެވޭނީ ނަމާދުކުރަން އަހުލުވެރިކުރުވުމަށް: އިސްލާމިކް މިނިސްޓަރު

އިސްލާމީ ކަންތައްތަކާ ބެހޭ ވުޒާރާގެ ދީނީ ހޭލުންތެރިކުރުމުގެ ޕްލޭންގެ ދަށުން 2025 ވަނަ އަހަރު އެންމެ ބޮޑު އިސްކަމެއްދޭނީ ނަމާދުކުރަން އަހުލުވެރިކުރުވުމަށް ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް ޢަލީ ސައީދު ވިދާޅުވެއްޖެއެވެ. ވަޒީރު ޝަހީމް މިހެން ވިދާޅުވީ އިއްޔެ ސޯޝަލް މީޑިއާއަށް ހިއްސާކުރެއްވި މެސެޖެއްގައެވެ.

ވަޒީރު ޝަހީމްގެ މެސެޖުގައި ވިދާޅުވެފައިވަނީ، ދީނީ ހޭލުންތެރިކަން އިތުރުކުރުމުގެ ޕްލޭންގެ ދަށުން އަންނަ އަހަރު ރާއްޖޭގެ ހުރިހާ ސަރަހައްދެއްގައިވެސް ހުރިހާ އުމުރުފުރައަކަށް އަމާޒުކޮށް ނަމާދުކުރަން އަހުލުވެރިކުރުވުމަށާއި، ނަމާދަށް ލަމާދަށް ލޯބިޖެއްސުމަށް މަސައްކަތްކުރާނެ ކަމަށެވެ.

މި މަސައްކަތަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސިޔާސަތާ އެއްގޮތްވާ ގޮތުގެ މަތިން ކުރިއަށްގެންދާ މަސައްކަތެއްކަން ފާހަގަކުރެވެއެވެ. ރައީސް މުޢިއްޒު ވަނީ ފަތިސް ނަމާދަށް ހޭލާ ރާއްޖެއެއް ދެކެވަޑައިގަންނަވަން ބޭނުންފުޅުވާކަމަށާއި، ނަމާދުގެ ޖަމާޢަތްތައް ބައިބޯވުމަށް އެދިވަޑައިގަންނަވާކަން އެކި މުނާސަބާތުތަކުގައި ވިދާޅުވެފައެވެ.

އިސްލާމީ ކަންތައްތަކާ ބެހޭ ވުޒާރާއިން މިހާތަނަށް ކޮށްފައިވާ މަސައްކަތްތަކުގެ ތެރޭގައި، ރަށްރަށުގެ މިސްކިތްތަކުގެ އިމާމުންނަށާއި ދީނީ ޢިލްމުވެރިންނަށް ޚާއްސަ ތަމްރީނުތައް ދިނުމާއި، ސްކޫލް ކުދިންގެ ތެރެއިން ޚަޠީބުންނަށްވާން އެދޭ ކުދިންނަށް އެފުރުސަތު ފަހިކޮށްދިނުން ހިމެނެއެވެ.

މި ހުރިހާ މަސައްކަތެއްގެ މައިގަނޑު މަޤްޞަދަކީ ދިވެހީންގެ މެދުގައި ކީރިތި ޤުރުއާނަށާއި ދީނުގެ އެހެން ރުކުންތަކަށް އޮންނަ ލޯބި އިތުރުކޮށް އަހުލުވެރިކުރުވުން ކަމަށް ސަރުކާރުން ބުނެއެވެ. އަންނަ އަހަރުގެ ޕްލޭންގައި ނަމާދަށް ޚާއްޞަ އަހައްމިއްޔަތުކަމެއް ދިނުމަކީ މި މަސައްކަތުގެ އިތުރު ފިޔަވަޅެއް ކަމަށް ބެލެވެއެވެ.