މިއަދަކީ އިލެކްޝަންސް ކޮމިޝަނުގައި އަޅުގަނޑުގެ ދައުރުގެ ފަހު ދުވަސް: ފުވާދު ތައުފީޤު

އިލެކްޝަންސް ކޮމިޝަނުގެ ރައީސް ފުވާދު ތައުފީޤު ގެ،  ދައުރު ނިމުމާ ގުޅިގެން މިއަދަކީ  އެ މަޤާމުގައި ހުންނަވާ އެންމެ ފަހު ދުވަސްކަމަށް ވިދާޅުވެއްޖެއެވެ.

ފުވާދު ތައުފީޤު މިއަދު އެބޭފުޅާ އެކްގައި ކުރެއްވި ޕޯސްޓެއްގައި ވިދާޅުވެފައިވަނީ، އިލެކްޝަންސް ކޮމިޝަނުގައި މަސައްކަތް ކުރެއްވި ހުރިހާ މެމްބަރުންނަށާއި މުވައްޒަފުންނަށް ޝުކުރު އަދާކުރައްވާ ކަމަށެވެ. އޭގެ ތެރޭގައި އިންޓަރިމް އިލެކްޝަންސް ކޮމިޝަނާއި، 2008 ގެ ސެޕްޓެމްބަރުން 2014 ގެ އޭޕްރިލް އަށް ހިނގި ފުރަތަމަ އިލެކްޝަންސް ކޮމިޝަނުގެ މެމްބަރުންނާއި މުވައްޒަފުން ހިމެނޭ ކަމަށް އޭނާ ވިދާޅުވިއެވެ.

މީގެ އިތުރުން، ހުރިހާ ސިޔާސީ ޕާޓީތަކަށާއި، މުއައްސަސާތަކަށާއި، އަދި ރައްޔިތުންނަށް އޭނާއަށް ދެއްވި އިތުބާރާއި އެހީތެރިކަމަށް ޝުކުރު އަދާކުރައްވާ ކަމަށްވެސް ވަނީ ވިދާޅުވެފައެވެ.

އިލެކްޝަންސް ކޮމިޝަނުގެ ގަވާއިދަށް ގެނެވުނު އިސްލާހަކާ ގުޅިގެން، ދެ ދައުރު ފުރިހަމަކޮށްފައިވާ މެމްބަރުންނަށް ރިޓަޔަރ ކުރުމުގެ ފުރުސަތު ލިބިގެންދެއެވެ. މި އިސްލާހު ވަނީ 28 ފެބްރުއަރީ 2023 ގައި ތަންފީޒު ކުރެވިފައެވެ.

މި އައު ގަވާއިދުގެ ދަށުން، ކޮމިޝަނުގެ 4 މެމްބަރުންނަށް މިހާރު ރިޓަޔަރ ކުރެވޭނެއެވެ. އޭގެ ތެރޭގައި ފުވައްދު ތައުފީޤުގެ އިތުރުން، ވައިސް ޗެއަރމަން އިސްމާޢީލް ޙަބީބު، މެމްބަރ މުޙައްމަދު އާޞިފް، އަދި މެމްބަރ ޢަލީ ނަޝާތު ހިމެނެއެވެ.

އިލެކްޝަންސް ކޮމިޝަނުގެ މެމްބަރުންނަށް ރިޓަޔަރމަންޓް ޕެކޭޖެއް ހަމަޖެއްސުމަށް މިނިވަން މުއައްސަސާތަކުން ހުށަހަޅާފައިވީ ނަމަވެސް، މި މައްސަލަ އަދި ރައްޔިތުންގެ މަޖިލީހުގައި ކުރިއަށް ގޮސްފައެއް ނުވެއެވެ.

Today is the last day of my term at the Elections Commission. I thank all members and staff who worked with me, including those at Interim EC and 1st EC (Sep. 2008- Apr. 2014).
I also thank all political parties, institutions, and the people for the trust and support given to me.

— Fuwad Thowfeek (@FuwadThowfeek) November 23, 2024