ހުޅުމާލޭގައި ހުޅުވި ކޭއެފްސީ އާއި ޕިއްޒާ ހަޓް ބަންދުކޮށްފި

ހުޅުމާލޭގައި މިދިޔަ އަހަރު ހުޅުވި ކޭއެފްސީ އާއި ޕިއްޒާ ހަޓް އައުޓްލެޓް ބަންދުކޮށްފިއެވެ. މި ދެ ރެސްޓޯރަންޓް ބަންދުކުރި ކަމަށް ބެލެވެނީ ވިޔަފާރި ވަރަށް ބޮޑަށް ދަށްވުމާ ގުޅިގެންނެވެ. ނަމަވެސް، މި ކަމާ ގުޅޭގޮތުން ކޭއެފްސީ އާއި ޕިއްޒާ ހަޓް ރެސްޓޯރަންޓް ވަކި ސަބަބެއް ބަޔާންކޮށްފައެއް ނުވެއެވެ.

ހުޅުމާލޭ ފެރީ ޓާމިނަލް ކައިރީގައި ހުންނަ ރަށު މާރުކޭޓްގެ މަތީގައި މި ދެ އައުޓްލެޓް ހުޅުވާފައިވަނީ މިދިޔަ އަހަރުގެ އޭޕްރީލް މަހުއެވެ. މި ދެ ރެސްޓޯރަންޓް ބަންދުކުރުމުގެ ފަހަތުގައި އޮތް އެއް ސަބަބަކަށް ވެދާނެ ކަމަށް ބެލެވެނީ ފަލަސްތީނުގެ ޣައްޒާގައި އިޒްރޭލުން ދެމުންގެންދާ ހަމަލާތަކާ ދެކޮޅަށް މުޅި ދުނިޔޭގައި ފެށި ބޮއިކޮޓް ކެމްޕެއިނެވެ.

މި ކެމްޕެއިނުގައި ކޭއެފްސީ އާއި ޕިއްޒާ ހަޓް ވެސް ބޮއިކޮޓްކުރަން ފަށާފައިވެއެވެ. ރާއްޖޭގައި ވެސް މި ކެމްޕެއިން ކުރިއަށް ގެންގޮސް، މި ތަންތަނުގެ ކުރިމަތީގައި މުޒާހަރާ ކުރުމުގެ އިތުރުން މާލޭގައި ހުންނަ އައުޓްލެޓްތަކުގެ ބިއްލޫރިގަނޑު ތަޅާލައި ގެއްލުންދީފައިވެއެވެ. ނަމަވެސް، މާލޭގެ ދެ އައުޓްލެޓް މިހާރުވެސް ހިންގަމުންދެއެވެ.

މި ބޮއިކޮޓް ކެމްޕެއިނާ ގުޅިގެން އިންޑޮނީޝިއާ އާއި މެލޭޝިއާ ފަދަ މުސްލިމުންގެ އާބާދީ ބޮޑު ޤައުމުތަކުގައި ވެސް ކޭއެފްސީގެ ވިޔަފާރިތަކަށް ވަރަށް ބޮޑަށް ގެއްލުންވެފައިވެއެވެ. މީޑިއާ ރިޕޯޓްތަކުން ދައްކާގޮތުގައި އިންޑޮނީޝިއާގައި މި އަހަރުގެ ފުރަތަމަ ކުއާޓާގައި ކޭއެފްސީ އަށް 35 މިލިއަން ޑޮލަރުގެ ގެއްލުންވެފައިވެއެވެ.

ރާއްޖޭގައި ކޭއެފްސީ އާއި ޕިއްޒާ ހަޓް އެންމެ ފުރަތަމަ ހުޅުވާފައިވަނީ 2018 ވަނަ އަހަރުއެވެ. މާލޭގައި މި ދެ ބްރޭންޑް ހިންގަނީ ރާއްޖޭގެ އައިލެންޑް ފުޑާއި އިންޑިއާގެ ގަމާ ޕިއްޒާ ކްރާފްޓް އޯވާސީސް ގުޅިގެން އުފައްދާފައިވާ ޖޮއިންޓް ވެންޗާ ކުންފުނި، ގެމަ އައިލެންޑް ފުޑް އިންނެވެ.