އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަމަށް ފައްޔާޟް އިޢުލާންކުރައްވައިފި

2028 ވަނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބަށް ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އިން ބާއްވާ ޕްރައިމަރީގައި ވާދަކުރައްވާނެ ކަމަށް އެ ޕާޓީގެ ޗެއަރޕާސަން ފައްޔާޟް އިސްމާޢީލް ވިދާޅުވެއްޖެއެވެ.

ފައްޔާޟް މިކަން އިޢުލާންކުރެއްވީ އިއްޔެ ރޭ އެމްޑީޕީގެ ޤައުމީ މަޖިލީހުގެ މެންބަރުން ތިއްބަވާ ވަޓްސްއެޕް ގްރޫޕަށް ފޮނުއްވި މެސެޖެއްގައެވެ. އެ މެސެޖުގައި ފައްޔާޟް ވަނީ އެމްޑީޕީގެ ރިޔާސީ ޕްރައިމަރީގައި ވާދަކުރައްވަން ނިންމަވާފައިވާ ކަމަށާއި، ހުރިހާ މެންބަރުންގެވެސް އެއްބާރުލުމަށް އެދިވަޑައިގެންފައެވެ.

މިހާތަނަށް އެމްޑީޕީން ރިޔާސީ އިންތިޚާބުގައި ވާދަކުރައްވާނެކަން ޢާންމުކޮށް އިޢުލާންކުރައްވާފައިވަނީ ހަމައެކަނި ފައްޔާޟް އިސްމާޢީލެވެ. ނަމަވެސް، ކުރީގެ ރައީސް އިބްރާހީމް މުޙައްމަދު ޞާލިޙް ވަނީ ފަހުން ޓީވީ ޗެނަލަކަށް ދެއްވި އިންޓަވިއުއެއްގައި، އެމްޑީޕީގެ ރިޔާސީ ޕްރައިމަރީގައި ވާދަކުރެއްވުމަށް 5 ވަރަކަށް ބޭފުޅުން ޝައުޤުވެރިކަން ފާޅުކުރައްވާފައިވާކަން ހާމަކުރައްވާފައެވެ.

ރައީސް ޞާލިޙް އަމިއްލަފުޅަށް ވާދަކުރެއްވުމާ ގުޅޭގޮތުން ވަކި އެއްޗެއް ވިދާޅުވެފައި ނުވިނަމަވެސް، އެމަނިކުފާނުގެ ސިޔާސީ ކުރިމަގާ ގުޅޭގޮތުން ޕާޓީގެ ލީޑަރޝިޕާ މަޝްވަރާކުރައްވާފައިވާކަމަށް ވިދާޅުވެފައިވެއެވެ.