ޕީއެންސީގެ އިންތިޚާބުން ފެނުނީ ރައްޔިތުން ސަރުކާރު ބަލައިގަތް މިންވަރު: ޕީއެންސީ

ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އިންތިޚާބަށް ރައްޔިތުންގެ ފަރާތުން ލިބުނު ތަރުހީބުން ފެނިގެންދިޔައީ ރައްޔިތުން ސަރުކާރު ބަލައިގަނެފައިވާ މިންވަރު ކަމަށް ޕީއެންސީން ވިދާޅުވެއްޖެއެވެ.

ޕީއެންސީގެ އެތެރޭގެ އިންތިޚާބުގެ ވޯޓުލުމުގެ ކަންކަން ކުރިއަށްދިޔަ ގޮތާ ގުޅޭގޮތުން ޕީއެސްއެމް ނިއުސްއާ ވާހަކަދައްކަވަމުން، އިންތިޚާބު ކޮމިޓީގައި ހިމެނިވަޑައިގަންނަވާ ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު މުހައްމަދު ޢިސްމާޢީލް ވިދާޅުވީ، އިންތިޚާބުގެ ކަންކަން ނިމިގެން ދިޔައީ އޮމާންކަމާއެކު ކަމަށެވެ. އަދި މި އިންތިޚާބުން ފެނިގެންދިޔައީ ރައްޔިތުން ސަރުކާރު ބަލައިގަނެފައިވާ މިންވަރު ކަމަށް އޭނާ ވިދާޅުވިއެވެ.

"އަޅުގަނޑު ޤަބޫލުކުރަނީ ސަރުކާރާ ދޭތެރޭގައި ވިސްނުންފުޅު ރަނގަޅީއޭ. ރައްޔިތުންގެ އުއްމީދުތައް ވަރަށް އެބަހުއްޓޭ. ޑިމޮކްރެސީގެ ރިވެތި އުސޫލުން (އިންތިޚާބުގެ) ކަންކަން ހިންގާކަން. ސަރުކާރު މިހާހިސާބަށް އައިރު ވަޢުދުތައް ފުއްދަމުންދާކަން ރައްޔިތުން އެބަ ޤަބޫލުކުރޭ. ރައްޔިތުންނަށް އެބަފެނޭ ރައްޔިތުންނަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މަސައްކަތް ކުރައްވާތަން. އެހެންވެ މިވަރަށް ބޮޑު އެއްބާރުލުމެއް ލިބިގެން މިދިޔައީ" މުހައްމަދު ޢިސްމާޢީލް ވިދާޅުވިއެވެ.

މި އިންތިޚާބުގެ ވޯޓުލުން ކުރިއަށްދިޔައީ ހެނދުނު 10:00 އިން މެންދުރުފަހު 2:00 އާ ހަމައަށެވެ. އަދި މި އިންތިޚާބުގައި ކޮންމެ ދާއިރާއަކުން ހޮވުނު މީހުން ވަކިން ވަކިން ވަނީ އިޢުލާންކޮށްފައެވެ.

ޕީއެންސީގެ އިންތިޚާބަކީ ރާއްޖޭގެ ސިޔާސީ ޕާޓީއަކުން މިހާތަނަށް ބޭއްވި އެންމެ ބޮޑު އެއް އިންތިޚާބު ކަމަށް އެ ޕާޓީން ވިދާޅުވެއެވެ. މި އިންތިޚާބުގައި ވޯޓުލުމުގެ ހައްޤު ޕާޓީ ދަފްތަރުގައި ހިމެނޭ ކޮންމެ ފަރާތަކަށް ދީފައިވާއިރު، ގިނަ އަދަދެއްގެ ބަޔަކު އިންތިޚާބުގައި ވޯޓުލުމަށް ވަނީ ނިކުމެފައެވެ.