ސުލްހައިގެ މުއްދަތު ހަމަވާން ކައިރިވެފައިވަނިކޮށް އެމެރިކާއާއި އީރާނުން އެއްބަޔަކު އަނެއް ބަޔަކަށް ވަރުގަދަ އިންޒާރުތަކެއް ދީފި

އެމެރިކާއާއި އީރާނާ ދެމެދު ގާއިމުކޮށްފައިވާ ދެ ހަފުތާގެ ވަގުތީ ސުލްހައިގެ މުއްދަތު އަންނަ ބުދަ ދުވަހު ހަމަވާން ކައިރިވެފައިވަނިކޮށް، ދެ ގައުމުގެ ދެމެދުގައި ބަހުގެ ހަމަލާތަކާއި އިންޒާރުތައް ވަރުގަދަވެއްޖެއެވެ.

އެމެރިކާގެ ރައީސް ޑޮނަލްޑް ޓްރަމްޕް ދެއްވި އިންޒާރުތަކާ ގުޅިގެން، އީރާނުގެ މަޖިލީހުގެ ރައީސް މުހައްމަދު ބާގިރު ގާލީބާފް ވަނީ ހަނގުރާމައިގެ މައިދާނުގައި އީރާނުގެ "އާ ކާޑުތަކެއް" ދައްކާލަން ތައްޔާރަށް އޮތް ކަމަށް ވިދާޅުވެފައެވެ.

މި ނުތަނަވަސްކަން އުފެދުނީ މި ހަފުތާގައި ޕާކިސްތާނުގައި ބޭއްވުމަށް ހަމަޖެހިފައިވާ ސުލްހައިގެ ދެވަނަ ބުރުގެ މަޝްވަރާތަކުގެ ކުރިން، ހޯރްމޫޒް ކަނޑުއޮޅި ކައިރިން އީރާނުގެ ދިދަ ޖަހާފައިވާ އުޅަނދެއް އެމެރިކާއިން ހިފެހެއްޓުމާ ގުޅިގެންނެވެ. މި ހާދިސާއާ ގުޅިގެން ދުނިޔޭގެ ބާޒާރުގައި ތެލުގެ އަގު ވަނީ އުފުލިފައެވެ. އިސްލާމްއާބާދުގައި ބާއްވާ މަޝްވަރާތަކުގައި އީރާނުން ބައިވެރިވާނެކަން އަދި ރަސްމީކޮށް ކަށަވަރުވެފައި ނުވާއިރު، އީރާނުން ގެންގުޅެނީ ޑިޕްލޮމެސީއަށް ފުރުސަތު ދިނުމުގެ ސިޔާސަތެއް ކަމަށް ރިޕޯޓުތައް ބުނެއެވެ.

އީރާނުގެ މަޖިލީހުގެ ރައީސް ގާލީބާފް އެކްސްގައި ކުރެއްވި ޕޯސްޓެއްގައި ވިދާޅުވީ، އީރާނަށް ދަތިކުރުމުގެ ފިޔަވަޅުތައް އަޅައި ސުލްހައިގެ އެއްބަސްވުމާ އެމެރިކާއިން ހިލާފުވެފައިވާ ކަމަށެވެ. "އިންޒާރުގެ ހިޔަނި ދަށުގައި ތިބެގެން ކުރާ މަޝްވަރާތައް އަހަރެމެން ގަބޫލެއް ނުކުރާނަން. ވޭތުވެދިޔަ ދެ ހަފުތާގައި އަހަރެމެން މިތިބީ ހަނގުރާމައިގެ މައިދާނުގައި އާ ކަންތައްތަކެއް ދައްކާލަން ތައްޔާރުވެގެން،" ގާލީބާފް ވިދާޅުވިއެވެ.

މިކަމާ ގުޅޭގޮތުން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، އީރާނުން މަޝްވަރާ ކުރާނެ ކަމުގެ ފުރިހަމަ އިތުބާރު އެބައޮތް ކަމަށާއި، ނޫން ނަމަ އެ ގައުމުން "މީގެ ކުރިން ދުވަހަކުވެސް ނުދެކޭ ފަދަ މައްސަލަތަކާ" ކުރިމަތިލާން ޖެހޭނެ ކަމަށެވެ. ޓްރަމްޕް އިތުރަށް ވިދާޅުވީ ސުލްހައިގެ މުއްދަތު ހަމަވާއިރު އެއްބަސްވުމަކަށް ނާދެވިއްޖެނަމަ، ގިނަ އަދަދެއްގެ ބޮންތައް ގޮވަން ފަށާނެ ކަމަށެވެ.

ޓްރަމްޕްގެ ވާހަކަފުޅުގައި އީރާނަށް ނިއުކްލިއާ ހަތިޔާރު އުފެއްދުމުގެ ފުރުސަތު ނުދޭނެ ކަމަށް ތަކުރާރުކޮށް ވިދާޅުވިއެވެ. "އީރާނުން ނިއުކްލިއާ ހަތިޔާރު ހޯދުމަކީ މުޅި ދުނިޔެ ހަލާކުވެގެން ހިނގައިދާނެ ކަމެއް. އެ ފުރުސަތެއް އަހަރެމެން ނުދޭނަން،" ޓްރަމްޕް ވިދާޅުވިއެވެ. އޭނާ ވިދާޅުވީ އީރާނުން އިންސާފުވެރި އެއްބަސްވުމަކަށް އަތުވެއްޖެނަމަ، އެ ގައުމުގެ އިގްތިސާދު އަލުން ބިނާކުރުމުގެ ފުރުސަތު ލިބޭނެ ކަމަށެވެ.

މަޝްވަރާތައް ކުރިއަށް ދިޔަ ނަމަވެސް، ދެ ގައުމުގެ ދެމެދުގައި ހައްލުނުކުރެވި ހުރި ގިނަ މައްސަލަތަކެއް އެބަހުއްޓެވެ. އޭގެ ތެރޭގައި ހޯރްމޫޒް ކަނޑުއޮޅީގެ މިނިވަންކަމާއި، ދަތިކުރުމުގެ ފިޔަވަޅުތައް އުވާލުމާއި، ހަނގުރާމައިގެ ބަދަލު ހޯދުމާއި، ބެލިސްޓިކް މިސައިލްގެ މައްސަލަ އަދި ސަރަހައްދީ ނުފޫޒުގެ މައްސަލަތައް ހިމެނެއެވެ.