މާލީ ވުޒާރާއިން ރާއްޖެއަށް އެހީދޭ ޖަމިއްޔާތަކާއެކު ޚާއްސަ ބައްދަލުވުމެއް ބާއްވައިފި

ފާއިތުވި އަހަރު ދިވެހި ރައްޔިތުންގެ ކުރިއެރުމަށް ވެދެއްވި އެހީތެރިކަމަށް ޝުކުރު އަދާކުރުމަށްޓަކައި، މާލީ ވުޒާރާއިން ރާއްޖެއަށް އެހީދޭ ޖަމިއްޔާތަކާއި މަލްޓިލޭޓަރަލް ބޭންކްތަކާއެކު ޚާއްސަ ބައްދަލުވުމެއް ބާއްވައިފިއެވެ. މި ބައްދަލުވުން ބޭއްވުނީ 19 ނޮވެމްބަރު 2024 ވީ އަންގާރަ ދުވަހު "މީރުމާ" ގައެވެ. މި ޚާއްސަ ރަސްމިއްޔާތު ޝަރަފުވެރިކޮށްދެއްވީ އެޑްވައިސަރ ފޯ މިނިސްޓަރ އޮފް ފިނޭންސް އަހުމަދު ނަސީރެވެ.

މި ބައްދަލުވުމުގައި ރާއްޖޭގައި އޮފީސީސް ޤާއިމުކޮށްފައިވާ އެޖެންސީތަކުން ބައިވެރިވެފައިވެއެވެ. އޭގެ ތެރޭގައި ޖަޕާން އިންޓަރނޭޝަނަލް ކޯޕަރޭޝަން އޭޖެންސީ (ޖައިކާ)، ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫއެންޑީޕީ)، ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ)، ޔުނައިޓެޑް ނޭޝަންސް ޗިލްޑްރަންސް ފަންޑް (ޔުނިސެފް)، ވޯލްޑް ބޭންކް ގްރޫޕް، އަދި އޭޝިއަން ޑިވެލޮޕްމަންޓް ބޭންކް (އޭޑީބީ) ހިމެނެއެވެ.

މިނިސްޓަރ އޮފް ފިނޭންސްގެ އެޑްވައިޒަރ، އަޙްމަދު ނަޞީރު ވާހަކަފުޅު ދައްކަވަމުން، ރާއްޖޭގެ ތަރައްޤީގެ މަޝްރޫޢުތަކަށް ފައިސާ ހަމަޖެއްސުމަށް ބޭރުގެ އެހީދޭ ޖަމާއަތްތަކާއި މަލްޓިލޭޓަރަލް ބޭންކުތަކުން ވެދެއްވާ އެހީތެރިކަމަށް ޝުކުރު އަދާކުރެއްވިއެވެ. އަދި މި ބައްދަލުވުމުގައި ބައިވެރިނުވި އެހެނިހެން ޑޯނަރ އެޖެންސީތަކަށްވެސް ސަރުކާރާއި ދިވެހި ރައްޔިތުންގެ ފަރާތުން ޚާއްސަ ޝުކުރެއް އަދާކުރެއްވިއެވެ.

ތިޔަ ކޮންމެ އިދާރާއަކާއެކު އަޅުގަނޑުމެންގެ ގުޅުން ބިނާވެފައިވަނީ ދިވެހިރާއްޖެ އަދި އަޅުގަނޑުމެންގެ ރައްޔިތުންގެ ދުޅަހެޔޮކަން އިތުރުކުރުމަށް ކުރެވޭ މަސައްކަތުގައި ބައިވެރިވުމުގެ މައްޗަށް

އެޑްވައިޒަރ ނަސީރު ވިދާޅުވިއެވެ.

މި ބައްދަލުވުމުގައި ބައިވެރިވި ފަރާތްތަކަށް ސަރުކާރާއި ދިވެހި ރައްޔިތުންގެ ފަރާތުން ޝުކުރު އަދާކުރުމުގެ ގޮތުން ހަނދާނީ ފިލައެއް އަރުވާފައިވެއެވެ. މި ބައްދަލުވުމަކީ ރާއްޖޭގެ ތަރައްޤީއަށް އެހީތެރިވާ ބައިނަލްއަޤްވާމީ ޖަމިއްޔާތަކާއެކު ގުޅުން ބަދަހިކޮށް، އެފަރާތްތަކުގެ އެހީތެރިކަމަށް ޝުކުރު އަދާކުރުމަށް ބޭއްވުނު މުހިންމު ބައްދަލުވުމެކެވެ.