ޚަބަރު
ހުޅުމާލޭ ގާލްގައިޑް ކޭމްޕްގެ ދަރިވަރުންނަށް އަލިފާނުން ރައްކާތެރިވުމުގެ މަޢުލޫމާތު ދީފި

ހުޅުމާލޭ ގާލްގައިޑް ކޭމްޕްގެ ދަރިވަރުން ފޮޓޯ:އެމްއެންޑީއެފް
ހުޅުމާލޭގައި ހުންނަ ޞަލާޙުއްދީން ސްކޫލުގައި ކުރިއަށްދާ ގާލްގައިޑް ކޭމްޕްގެ ދަރިވަރުންނަށް، އެމްއެންޑީއެފް މާލޭ އޭރިއާ ކޮމާންޑް، ހުޅުމާލޭ ފަޔަރ ސްޓޭޝަނުން ފަޔަރ އެވެއަރނެސް ސެޝަނެއް ކުރިއަށްގެންގޮސްފިއެވެ. މި ސެޝަން ބޭއްވުނީ ނޮވެންބަރު 23 ވަނަ ދުވަހުއެވެ.
މި ސެޝަންގައި، އަލިފާން ރޯވާން މެދުވެރިވާ ސަބަބުތަކާއި، އަލިފާން ފެތުރޭ ގޮތްތަކާއި، އަލިފާން ނިއްވާނެ ގޮތުގެ އަސާސީ މަޢުލޫމާތު ދަރިވަރުންނާ ހިއްސާކުރެވުނެވެ. އަދި އަލިފާންނިވިއާއި ފަޔަރ ބްލޭންކެޓް ބޭނުން ކުރާނެގޮތުގެ މުހިންމު މަޢުލޫމާތުތައްވެސް ކިޔައިދެވުނެވެ.
ސެޝަންގައި އިތުރަށް، އަލިފާނުގެ ހާދިސާއެއް ހިނގައިފިނަމަ ޢަމަލުކުރަންވީ ގޮތުގެ މަޢުލޫމާތު ދެވުނެވެ. މީގެ އިތުރުން، ފަޔަރ ބްލޭންކެޓް އަދި އަލިފާންނިވި ބޭނުންކޮށްގެން އަލިފާން ނިއްވާނެ ގޮތް ޢަމަލީގޮތުން ދައްކައިދެވި، އަލިފާން ނިއްވުމުގެ ހުނަރުތައް ދަރިވަރުންނަށް ދަސްކޮށްދެވުނެވެ.
އެމްއެންޑީއެފް މާލޭ އޭރިއާ ކޮމާންޑް، ހުޅުމާލޭ ފަޔަރ ސްޓޭޝަންގެ ފަޔަރ ފައިޓަރުން ކިޔަވައިދިން މި ސެޝަންގައި، ގާލްގައިޑް ކޭމްޕްގެ 72 ދަރިވަރުން ބައިވެރިވިއެވެ. މި ފަދަ ސެޝަންތަކުން ދަރިވަރުންނަށް އަލިފާނުގެ ނުރައްކަލުން ރައްކާތެރިވުމަށް ބޭނުންވާ މުހިންމު މަޢުލޫމާތާއި ހުނަރުތައް ލިބިގެންދާނެކަމަށް ބެލެވެއެވެ.