ދެން އޮންނަ ރިޔާސީ އިންތިޚާބުގައި ޕީއެންސީގެ ކެންޑިޑޭޓަކީ ރައީސް މުޢިއްޒު: އަބްދުއްރަހީމް

ދެން އޮންނަ ރިޔާސީ އިންތިޚާބުގައިވެސް ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ރިޔާސީ ކެންޑިޑޭޓަކީ ރައީސް ޑރ. މުޙައްމަދު މުޢިއްޒު ކަމަށް އެ ޕާޓީގެ ޗެއާޕާސަން އަބްދުއްރަހީމް އަބްދުﷲ  ވިދާޅުވެއްޖެ އެވެ.

އަބްދުއްރަހީމް މިކަން ހާމަކުރެއްވީ އިއްޔެ ކުރިއަށް ދިޔަ ޕީއެންސީގެ އެތެރޭގެ އިންތިޚާބަށް ފަހު އެ ޕާޓީގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައެވެ.

ޕީއެންސީގެ އަސާސީ ގަވާއިދުގައި ބުނަނީ ޕީއެންސީގެ ޓިކެޓުގައި ނިކުމެވަޑައިގެން ރާއްޖޭގެ ވެރިކަމަށް ވަޑައިގަންނަވާ ބޭފުޅަކީ އެ މަގާމުގައި ހުންނަ ދެވަނަ ދައުރަކަށް ކުރިމަތިލައްވަން ބޭނުންފުޅުވާނަމަ ރިޔާސީ ޕްރައިމަރީއަކާ ނުލައި އެ ޓިކެޓް އެ ބޭފުޅަކަށް ލިބިވަޑައިގަންނަވާނެ ކަމަށް، އެހެންވީމަ ޕްރައިމަރީ ބާއްވަން ޖެހޭ ކަމެއް ނޫން

އަބްދުއްރަހީމް ވިދާޅުވި އެވެ.

ޕީއެންސީގެ އަސާސީ ގަވާއިދުގައި ބުނާ ގޮތުން ރައީސުލްޖުމްހޫރިއްޔާކަމުގެ މަގާމުގައިހުރި އެ ޕާޓީގެ މެންބަރަކު، ރިޔާސީ ދެވަނަ ދައުރަކަށް ކުރިމަތިލުމަށް ޕާޓީގެ މެންބަރުންގެ މަޖިލީހަށް ހުށަހަޅައިފިނަމަ އެ މެންބަރަކަށް ރިޔާސީ ޕްރައިމަރީއަކާ ނުލައި ޕާޓީގެ ރިޔާސީ ޓިކެޓު ދިނުމަށް ޕާޓީގެ މެންބަރުންގެ މަޖިލީހުގެ ސިއްރު ވޯޓަކުން ނިންމިދާނެ އެވެ.

ޕީއެންސީ އަކީ ޕީޕީއެމް ހޯދަން ކުރީގެ ރައީސް މައުމޫން އަބްދުލްގައްޔޫމް ކޯޓަށް ހުށަހެޅުއްވި މައްސަލައަކާ ގުޅިގެން އުފެއްދެވި ޕާޓީއެކެވެ. ރައީސް މުޢިއްޒު ވެރިކަމަށް އިންތިޚާބުވެވަޑައިގެންނެވީ ޕީޕީއެމްގެ ޓިކެޓުގައެވެ. 

ޕީއެންސީގެ ޗެއާޕާސަން އަބްދުއްރަހީމް ވިދާޅުވެފައިވާ ގޮތުން އެ ޕާޓީގެ މެންބަރުންގެ އަދަދު ލައްކައަކާ ވަނީ ގާތްކޮށްފައެވެ. އެކަމަކު އިލެކްޝަން ކޮމިޝަންގެ ދަފްތަރު ދައްކާ ގޮތުން ޕީއެންސީގައި މި ވަގުތު ތިބީ 28,983 މެންބަރުންނެވެ. ޕާޓީއަށް މެންބަރުން އިތުރުކުރުމުގެ މަސައްކަތް ކުރަމުންދާއިރު ޕީޕީއެމް އުވާލުމުގެ މަސައްކަތްވެސް ކުރިއަށް އެބަދެއެވެ.