3 މިލިއަނުން މައްޗަށް އަގުކުރެވޭ މަސްތުވާތަކެތީގެ ޕެކޭޖެއް ބުދަ ދުވަހު ހިފަހައްޓައިފި

ބާޒާރުގައި 3 މިލިއަން ރުފިޔާއަށް ވުރެ މަތިން އަގުކުރެވޭނެ މަސްތުވާތަކެތީގެ ޕެކޭޖެއް ވައިގެ މަގުން އެތެރެކުރަން އުޅެނިކޮށް ބުދަ ދުވަހު ހިފަހައްޓައިފިއެވެ.

މޯލްޑިވްސް ކަސްޓަމްސް ސާރވިސަސްއިން މި ތަކެތި ހިފެހެއްޓީ ވެލާނާ އިންޓަނޭޝަނަލް އެއާރޕޯޓުން އެތެރެކުރަން އުޅެނިކޮށެވެ.

މި މަހުގެ 22ވަނަ ދުވަހު ހިފެހެއްޓި މި ތަކެއްޗަކީ  އެމްފެޓަމިން ކިޔާ މަސްތުވާތަކެތީގެ ބާވަތެއްކަމަށް ކަސްޓަމްސްއިން ހާމަކުރެއެވެ.

ކަސްޓަމްސްއިން އިތުރަށް ހާމަކޮށްފައިވާ ގޮތުގައި، އަތުލައިގަތް މަސްތުވާތަކެތީގެ މަގުމަތީގެ އަގު 3.3 މިލިޔަނަށްވުރެ މަތިން އަގުކުރެވޭނެއެވެ.

ވައިގެމަގުން ރާއްޖެއެތެރެކުރަން އުޅުނު 1 ކިލޯއަށްވުރެ ގިނަ މަސްތުވާތަކެތި ކަސްޓަމްސްއިން އަތުލައިގެންފި.

🔹22 އޭޕްރީލް 2026
🔹 1150 ގްރާމް އެމްފެޓަމިން
🔸މަގުމަތީ އަގު ޖުމްލަ 3.3 މިލިއަން ރުފިޔާއަށްވުރެ އިތުރު pic.twitter.com/3l7nc1oiVG

— Maldives Customs Service (@CustomsMv) April 23, 2026

ފުލުހުންނާއި ކަސްޓަމްސް ގުޅިގެން ކުރާ މަސައްކަތުން މި އަހަރުގެ މިހާތަނަށް އައިރު ރާއްޖެއަށް އެތެރެކުރަން އުޅުނު 86 ކިލޯގެ މަސްތުވާތަކެތި ވަނީ އަތުލައިގަނެފައެވެ. އަދި މިއީ މިދިޔަ އަހަރުތަކުގެ މި މުއްދަތާ އަޅާބަލާއިރު ރެކޯޑް އަދަދެކެވެ.

ކަސްޓަމްސްގެ މަސައްކަތް ހަރުދަނާކޮށް ވައިގެ މަގުންނާއި ކަނޑުމަގުން ރާއްޖެ އެތެރެކުރަން އުޅެނިކޮށް އަތުލައިގަނެފައިވާ މަސްތުވާތަކެތީގެ އަދަދު އިތުރުވެފައިވާއިރު، ބޭރުގައި ތިބެގެން ރާއްޖެއަށް މަސްތުވާތަކެތި އެތެރެކުރާ ފަރާތްތައް ހުއްޓުވުމުގެ މަސައްކަތް މެދުކެނޑުމެއް ނެތި އަންނަނީ ކުރަމުންނެވެ.