ޒޮމާޓޯގެ ސީއީއޯ އިޢުލާން ކުރި  ވަޒީފާއަށް 10،000 އަށްވުރެ ގިނަ މީހުން ކުރިމަތިލައިފި

ޒޮމާޓޯގެ ސީއީއޯ އަދި ބާނީ ދީޕިންދަރ ގޯޔަލް ވަނީ ޗީފް އޮފް ސްޓާފްގެ މަޤާމަކަށް މީހަކު ހޯދުމަށް އިޢުލާން ކުރުމާއެކު، އިޖުތިމާޢީ މީޑިއާގައި ބޮޑު ސަމާލުކަމެއް ލިބިފައެވެ. މި މަޤާމަށް ހޮވޭ ފަރާތުން މުސާރައިގެ ބަދަލުގައި 20 ލައްކަ ރުޕީސް (ގާތްގަނޑަކަށް 412،000 ރުފިޔާ) ދައްކަން ޖެހޭނެ ކަމަށް ބުނެފައިވާތީ، މި އިޢުލާނަކީ އާދަޔާ ޚިލާފު އިޢުލާނެއް ކަމުގައި ވެފައިވެއެވެ. މި ފައިސާ ދޭންޖެހެނީ ޒޮމާޓޯއިން ސްޕޮންސަރ ކުރާ، ބަނޑުހައިހޫނުކަމާ ދެކޮޅަށް މަސައްކަތްކުރާ ޗެރިޓީއެއް ކަމަށްވާ "ފީޑިންގ އިންޑިއާ" އަށެވެ.

ނޮވެމްބަރު 20 ވަނަ ދުވަހު މި އިޢުލާން ކުރުމަށްފަހު، 24 ގަޑިއިރު ނުވަނީސް 10،000 އަށްވުރެ ގިނަ ފަރާތްތަކުން މި މަޤާމަށް ކުރިމަތިލާފައިވާ ކަމަށް ގޯޔަލް ވަނީ ހާމަކޮށްފައެވެ. އޭނާ ބުނިގޮތުގައި ކުރިމަތިލި ފަރާތްތަކުގެ ތެރޭގައި ހިމެނެނީ ފައިސާ ދެއްކޭނެ ފަރާތްތަކާއި، ކޮންމެވެސް ވަރަކަށް ފައިސާ ދެއްކޭނެ ފަރާތްތަކާއި، ފައިސާ ނެތް ކަމަށް ބުނާ ފަރާތްތަކާއި، އަދި ޙަޤީޤަތުގައިވެސް ފައިސާ ނެތް ފަރާތްތަކެވެ.

މި މަޤާމަށް ހޮވޭ ފަރާތަށް ޒޮމާޓޯގެ މުހިންމު މަޝްރޫޢުތަކެއް ކަމަށްވާ ބްލިންކިޓް، ހައިޕަރޕިއުރ އަދި ފީޑިންގ އިންޑިއާގައި މަސައްކަތް ކުރުމުގެ ފުރުޞަތު ލިބޭނެ ކަމަށް ގޯޔަލް ވަނީ ބުނެފައެވެ. މީގެ އިތުރުން މި މަޤާމަކީ އެމްބީއޭ ޕްރޮގްރާމެއްގެ ފެންވަރުގެ ތަޖުރިބާއެއް ލިބޭނެ ފަދަ މަޤާމެއް ކަމަށްވެސް އޭނާ ވަނީ ބުނެފައެވެ.

މި އިނގިލާބީ އައު  ވަޒީފާގެ ފުރުޞަތު ވަނީ އެކި ދާއިރާތަކުގެ ސަމާލުކަން ހޯދައި، ޕްރޮފެޝަނަލް ފުރުޞަތުތަކާއި ހެޔޮއެދޭ ޢަމަލުތައް އެއްކޮށްލުމުގެ ގޮތުން މަޝްހޫރުވެފައެވެ. ގޯޔަލް ބުނާ ގޮތުގައި މި މަޤާމަށް ކުރިމަތިލާ ފަރާތްތަކުން އެކަން ކުރަންވާނީ މުސާރައަށް ނުވަތަ މަޤާމުގެ ނަމަށް ބަލައިގެން ނޫނެވެ. އޭގެ ބަދަލުގައި މި މަޤާމުން ލިބޭނެ ތަޖުރިބާއަށް ބަލައިގެންނެވެ.