ފުރްޤާން މިސްކިތަށް ގެއްލުންދީފި

މިއަދު ފަތިސް ނަމާދުގެ ކުރިން  މާލޭގެ ފުރްޤާން މިސްކިތަށް މީހަކު ގެއްލުންދީފިއެވެ. މި ޢަމަލު ހިންގާފައިވަނީ އެ މިސްކިތުގައި އާންމުކޮށް ނިދާ އުޅޭ، ބުއްދި ފިލާފައިވާކަމަށް ބެލެވޭ ޒުވާނެއްކަމަށް މަޢުލޫމާތު ލިބިފައިވެއެވެ.

މި ހާދިސާގައި މިސްކިތުގެ ފަހަތުގައި ހުރި މުސްޙަފްތައް މުޅި ތަނަށް އުކާލައި، އިމާމް ހުންނަ ދިމާލުގެ ކަރަންޓް ބޯޑުތަކާއި އެޔަށް ޖަހާފައިހުރި އެޑެޕްޓަރުތައް ހަލާކުކޮށްލާ، އަދި ވުޟޫ ކުރާ ބައިގެ ބައެއް އިސްކުރުތައް ބިންދާލައި މިސްކިތުގެ ބައެއް އެއްޗެހި އެތަނަށް އުކާލާފައިވާކަމަށް ވަނީ ފާހަގަކުރެވިފައެވެ.

މި މައްސަލަ ފުލުހުންނަށް ރިޕޯޓުކުރުމާ ގުޅިގެން، ފަތިސް ނަމާދަށްފަހު ފުލުހުން ވަނީ އެ ތަނަށް ޙާޟިރުވެ މަޢުލޫމާތު ނަގާފައެވެ. އަދި ފޮރެންސިކް ޑިޕާޓްމަންޓުގެ ބޭފުޅުންވެސް ވަނީ އެ ތަނަށް ވަޑައިގެން ފޮޓޯ ނަންގަވާފައެވެ.

މި ޒުވާނާ ވަނީ މީގެ ކުރިންވެސް މިފަދަ އެތައް ޢަމަލެއް މި މިސްކިތުގައި ހިންގާފައިކަމަށް މަޢުލޫމާތު ލިބެއެވެ. މިކަމާ ގުޅިގެން ގިނަ ފަހަރު ފުލުހުންނަށް މައްސަލަ ހުށަހެޅިފައިވީ ނަމަވެސް، އެކަށީގެންވާ ފިޔަވަޅެއް އަޅާފައިނުވާކަން ބައެއް އާންމުން ވަނީ ފާހަގަކޮށްފައެވެ.އަދި މިފަދަ ހާދިސާތައް ތަކުރާރުވަމުންދާއިރު، މާލޭ ސިޓީ ކައުންސިލުން މިސްކިތްތަކުގައި 24 ގަޑިއިރު މޮނިޓަރކުރާ ކެމެރާ ސިސްޓަމްގެ ފައިދާއާމެދު ވަނީ ސުވާލު އުފައްދާފައެވެ.އަދި ކީރިތި ޤުރްއާނާއި މިސްކިތުގެ ޙުރުމަތް ރައްކާތެރިކުރުމަށް އިތުރު ފިޔަވަޅުތަކެއް އަޅަންޖެހޭކަން ވަނީ ފާހަގަކޮށްފައެވެ.