މެންޗެސްޓަރ ސިޓީ އަމިއްލަ ދަނޑުގައި ޓޮޓްނަމް އަތުން 4-0 އިން ބަލިވެއްޖެ

އިނގިރޭސި ޕްރިމިއަރ ލީގުގައި ރޭ ކުޅުނު މެޗެއްގައި އެންމެ ފަހުގެ ޗެމްޕިއަން މެންޗެސްޓަރ ސިޓީ އަމިއްލަ ދަނޑު އިއްތިހާދު ސްޓޭޑިއަމްގައި ޓޮޓްނަމް ހޮޓްސްޕަރ އަތުން 4-0 ގެ ނަތީޖާއަކުން ބަލިވެއްޖެއެވެ.

މި ބަލިވުމާއެކު މެންޗެސްޓަރ ސިޓީއަށް ވަނީ ގިނަ ރެކޯޑުތަކެއް ގެއްލިފައެވެ. މިގޮތުން 2006 ވަނަ އަހަރަށްފަހު ޖެހިޖެހިގެން ފަސް މެޗުން ބަލިވި ފުރަތަމަ ފަހަރު ކަމަށްވުމުގެ އިތުރުން، އަމިއްލަ ދަނޑުގައި ބަލިނުވެ ދަމަހައްޓަމުން އައި 52 މެޗުގެ ރެކޯޑުވެސް ވަނީ ނިމުމަކަށް އައިސްފައެވެ.

މީގެ އިތުރުން، މެންޗެސްޓަރ ސިޓީގެ ކޯޗު ޕެޕް ގަޑިއޯލާގެ ކޯޗިންގ ކެރިއަރުގައި އަމިއްލަ ދަނޑުގައި ކުޅުނު މެޗަކުން 4 ލަނޑުގެ ތަފާތުން ބަލިވި ފުރަތަމަ ފަހަރުވެސް މިއީއެވެ. އަދި ގަޑިއޯލާ މެންޗެސްޓަރ ސިޓީގެ ކޯޗުކަމާ ހަވާލުވި ފަހުން، ޕްރިމިއަރ ލީގުގެ ތިން މެޗުގައި ޖެހިޖެހިގެން ބަލިވި ފުރަތަމަ ފަހަރުވެސް މިއީއެވެ.

މި މެޗުގައި ޓޮޓްނަމްގެ ފަރާތުން ޖޭމްސް މެޑިސަން ވަނީ ދެ ލަނޑު ޖަހާފައެވެ. އޭގެ އިތުރުން ޕެޑްރޯ ޕޯރޯ އާއި ބްރެނަން ޖޯންސަން ވަނީ އެއް ލަނޑު ޖަހާފައެވެ. މި މެޗާއެކު ޓޮޓްނަމް ވަނީ 12 މެޗުން ލިބުނު 19 ޕޮއިންޓާއެކު ހަވަނައަށް އަރާފައެވެ.

މި ބަލިވުމާއެކު މެންޗެސްޓަރ ސިޓީ ވަނީ 12 މެޗުން ލިބުނު 23 ޕޮއިންޓާއެކު ލީގު ތާވަލުގެ ދެވަނަ ހިސާބުގައި ހިފަހައްޓާފައެވެ. ނަމަވެސް، އެއްވަނައިގައިވާ ލިވަޕޫލްއާ ދެމެދު 5 ޕޮއިންޓުގެ ތަފާތެއް އެބައޮތެވެ.

މި މެޗުގައި މެންޗެސްޓަރ ސިޓީގެ މެދުތެރޭގައި ޓީމު ލައްވާ ކުޅުވާނެ ކުޅުންތެރިއެއް ނެތްކަން ވަނީ ފާހަގަކުރެވިފައެވެ. އަނިޔާގެ ސަބަބުން ރޮޑްރީ ކުޅުމާ ދުރުގައި ހުރިއިރު، މި މެޗުގައި މަޓިއޯ ކޮވަސިޗްވެސް ކުޅެފައެއް ނުވެއެވެ.