ޚަބަރު
ހުޅުމާލޭގެ މޮނިއުމަންޓްތަކުގެ ޑިޒައިން މުބާރާތުގެ 1 ވަނަ ޓީމް އާކޯސްއަށް

އެޗްޑީސީގެ ޕޯސްޓް ފޮޓޯ:އެޗްޑިސީ
ހުޅުމާލޭގެ މަގުތަކުގައި ހަދާފައިވާ ބައެއް ރައުންޑްއަބައުޓްތަކުގައި ބެހެއްޓުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ކުރިއަށް ގެންދިޔަ މޮނިއުމަންޓްތަކުގެ ޑިޒައިން މުބާރާތުގެ ވަނަ ދީފިއެވެ.
އެޗްޑީސީން މިއަދު އެކްސްގައި ހާމަކޮށްފއިވާ ގޮތުގައި މި މުބާރާތުގެ އެންމެ މޮޅު ޑިޒައިން ހުށަހެޅި ޓީމް އާކޮސްއަށް ވަނީ މުބާރާތުގެ 1 ވަނަ ލިބިފައެވެ. މި މުބާރާތުގައި އެންމެ މޮޅު ޑިޒައިނަށް 100،000 ރުފިޔާގެ ފައިސާގެ އިނާމެއް ދޭނެކަމަށް އެޗްޑީސީން ވަނީ ކުރިން އިޢުލާނުކޮށްފައެވެ.
މި މުބާރާތަކީ ހުޅުމާލޭގެ މަންޒަރު އިތުރަށް ޒީނަތްތެރިކޮށް، "ދިވެހިންގެ ރާއްޖެ" އަށް ނިސްބަތްވާ ގޮތަށް ދިވެހިންގެ އަގުތަކާއި، ޤައުމިއްޔަތާއި، ސަގާފަތާއި، އާދަކާދަ އަދި ތަރިކަ ދައްކުވައިދޭ ގޮތަށް ފަރުމާކުރެވޭ މޮނިއުމަންޓްތަކެއް ހެދުމަށް ބޭއްވުނު މުބާރާތެކެވެ. މި މުބާރާތުގައި ބައިވެރިވުމުގެ ފުރުޞަތު ލިބިފައިވަނީ އާޓިސްޓުންނާއި، ޑިޒައިނަރުންނާއި އަދި އާކިޓެކްޓުންނަށެވެ.
މި މުބާރާތާ ގުޅޭ ގޮތުން އެޗްޑީސީން ވަނީ މޮނިއުމަންޓްތައް ފަރުމާކުރުމުގައި ބަލަންޖެހޭ ކަންކަން ހިމެނޭ ގައިޑްލައިނެއްވެސް ޝާއިޢުކޮށްފައެވެ. މި މޮނިއުމަންޓްތައް ބެހެއްޓުމުގެ މަޤްޞަދަކީ ހުޅުމާލޭގެ މަގުތަކުގައި ދުއްވާ އުޅަނދުފަހަރުގެ ދަތުރުފަތުރު ބެލެހެއްޓުމާއެކު ހުޅުމާލޭގެ މަންޒަރު އިތުރަށް ރީތިކުރުމެވެ.