ފަތުރުވެރިކަން ތަރައްޤީކުރުމަށް 11 ރަށެއް ދޫކޮށްފި

ފަތުރުވެރިކަން ތަރައްޤީކުރުމަށް މި ސަރުކާރުން މިހާތަނަށް 11 ރަށެއް ދޫކޮށްފައިވާކަމަށް ފަތުރުވެރިކަމާ ބެހޭ ވަޒީރު އިބްރާހީމް ފައިޞަލް ވިދާޅުވެއްޖެއެވެ. ވަޒީރު ފައިޞަލް މިހެން ވިދާޅުވީ ޕީއެސްއެމްނިއުސްގެ ހަފްތާ 52 ޕްރޮގްރާމުގައި ވާހަކަދައްކަވަމުންނެވެ.

ފަތުރުވެރިކަން މުޅި ރާއްޖެއަށް ފުޅާކޮށް ކުރިއެރުވުމަށް ކުރަމުންދާ މަސައްކަތްތަކާ ގުޅޭގޮތުން ވާހަކަފުޅުދައްކަވަމުން، ވަޒީރު ފައިޞަލް ވިދާޅުވީ މިހާތަނަށް ގާތްގަނޑަކަށް 25 ރަށް ފަތުރުވެރިކަމަށް އަލަށް ހުޅުވާލި ކަމަށެވެ. އަދި އޭގެތެރެއިން 11 ރަށެއް ދޫކޮށްފައިވާކަމަށާއި މި ރަށްތަކުގެ އެވޯޑު ލެޓަރވެސް މިހާރު ހަވާލުކޮށްފައިވާކަމަށް ވަޒީރު ވިދާޅުވިއެވެ.

"މިއީ ގާތްގަނޑަކަށް 385 މިލިޔަން ޑޮލަރުގެ އިންވެސްޓުމަންޓެއް. އެވޯޑު ލެޓަރ ހަވާލުކޮށްފައިވާ ބައެއް ތަންތަނުން މިހާރު ލާރިވެސް ދައްކައިފި. އެންމެ ބޮޑު ހިތްހަމަޖެހުމަކީ ގިނައިން ރަށްތައް ނަގާފައި ހުރީ ދިވެހިންނަށް ކަމަށްވާތީ،" ފަތުރުވެރިކަމާ ބެހޭ ވަޒީރު އިބްރާހީމް ފައިޞަލް ވިދާޅުވިއެވެ.

ސަރުކާރުން ފަތުރުވެރިކަން ތަރައްޤީކުރުމަށް ގިނަ މަސައްކަތްތަކެއް ކުރަމުންދާކަމާއި، މި މަސައްކަތުގެ ތެރެއިން ގިނަ ރަށްތަކެއް ދިވެހިންނަށް ދޫކޮށްފައިވާކަން ފާހަގަކުރެވެއެވެ. މީގެ އިތުރުން، މި ދާއިރާއަށް ބޮޑު އިންވެސްޓްމަންޓެއް ގެނެސް، ރާއްޖޭގެ އިޤްތިޞާދަށް ފައިދާކުރާނެ ކަމަށް ބެލެވެއެވެ.