ފުރުޤާން މިސްކިތަށް ގެއްލުންދިން މައްސަލަ ބަލައި ފިޔަވަޅު އަޅަން ނިންމައިފި

ފުރުޤާން މިސްކިތަށް ގެއްލުންދިން މައްސަލަ ބަލައި ފިޔަވަޅު އެޅުމަށް ކަމާބެހޭ ފަރާތްތަކަށް ހުށަހަޅާނެ ކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ރޭ ފަތިހު ފުރުޤާން މިސްކިތަށް މީހަކު ވަދެ، މިސްކިތުގައި ހުރި މުސްޙަފްތަކާއި އެހެނިހެން ވަސީލަތްތަކަށް ގެއްލުންދިން މައްސަލައާ ގުޅިގެން ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވަޒީރު ވިދާޅުވީ، މިސްކިތްތަކަށް ގެއްލުންދޭ މައްސަލަ ބަލައި ނުގަންނަ ކަމަށެވެ.

މި މައްސަލައިގައި ހިމެނޭ މީހާ މިހާރު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. ފުލުހުން މަޢުލޫމާތު ދެއްވާފައިވާ ގޮތުގައި، މައްސަލައިގައި ހައްޔަރުކުރި މީހާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ތަޙުޤީޤު މަރުޙަލާ ނިމެންދެން ބަންދުކުރުމަށް އަމުރުކޮށްފައިވެއެވެ.

ސޯޝަލް މީޑިއާގައި ދައުރުވަމުންދާ ފޮޓޯތަކުން ދައްކާގޮތުގައި، ރޭ ދަންވަރު މީހަކު ފުރުޤާން މިސްކިތަށް ވަދެ، މިސްކިތުގައި ހުރި މުސްޙަފްތަކަށް އިހާނެތިކޮށް ހިތާ އުކާލައި، އަދި މިސްކިތުގައި ހުރި ކަރަންޓު ސޮކެޓުތަކާއި ބައެއް އިތުރު ސާމާނަށް ބޮޑެތި ގެއްލުން ދީފައިވެއެވެ.

މި ހާދިސާއާ ގުޅިގެން ގިނަ ރައްޔިތުން ވަނީ ކަންބޮޑުވުން ފާޅުކޮށްފައެވެ. އަދި މިފަދަ ޢަމަލުތައް ހުއްޓުވުމަށް އަވަސް ފިޔަވަޅުތަކެއް އެޅުމަށް ސަރުކާރަށް ގޮވާލާފައިވެއެވެ.