ޒިންމާދާރު ނޫސްވެރިކަން ކުރެއްވުމަށް ރައީސުލްޖުމްހޫރިއްޔާގެ ނައިބު ނޫސްވެރިންނަށް ގޮވާލައްވައިފި

ނޫސްވެރިކަމުގެ މަސައްކަތުގައި ޒިންމާދާރުކަމާއެކު މަސައްކަތް ކުރެއްވުމަށް ރައީސުލްޖުމްހޫރިއްޔާގެ ނައިބު، އަލްއުސްތާޛު ޙުސައިން މުޙައްމަދު ލަޠީފް، ނޫސްވެރިންނަށް ގޮވާލައްވައިފިއެވެ.  

ރައީސުލްޖުމްހޫރިއްޔާގެ ނައިބު އެކްސްގައި ކުރެއްވި ޕޯސްޓެއްގައި ވިދާޅުވީ، ޞައްޙަ ތެދު މަޢުލޫމާތު ފެތުރުމުގައި ނޫސްވެރިންނަކީ މުހިންމު ދައުރެއް އަދާކުރާ ބައެއް ކަމަށާއި، އަދި މި ކަމުގައި އާންމުން ބަރޯސާ ވާނީ ނޫސްވެރިންނަށް ކަމަށެވެ.

އަދި ނޫސްވެރިކަމުގެ ހުދޫދުގެ ތެރެއިން ލިޔާ ލިޔުންތަކުންނާއި އުފައްދާ ކޮންޓެންޓުތަކުން ފެންވަރު ރަނގަޅު މަޢުލޫމާތު ހާމަކޮށްދީ، ޒިންމާދާރު ކުރުވުމުގެ އިތުރުން، ދެ ފުށް ފެންނަ ނިޒާމެއް ޤާއިމުކުރެވޭނެ ކަމަށް އެ މަނިކުފާނު ވިދާޅުވިއެވެ.

Ethical journalism must ensure quality information, promote accountability and transparency while upholding the principles of democracy. When ethics are forgone, it creates misinformation, maximizes harm, and can create unrest among people who rely on journalists to report the…

— Hussain Mohamed Latheef (@HucenSembe) April 28, 2026

މީގެއިތުރުން ނޫސްވެރިކަމުގެ އަޚުލާޤީ މިންގަނޑާ ޚިލާފުވުމުގެ ނަތީޖާ އިޖުތިމާޢީ ގޮތުން ހިތިވާނެ ކަމަށާއި، އޭރުން ހަމަނުޖެހުންތަކަށް މަގުފަހިވެ، ރައްޔިތުންނަށް ސައްޙަ މަޢުލޫމާތު ލިބުމަށް ހުރަސް އެޅިގެންދާނެ ކަމަށްވެސް ނައިބު ރައީސް ވިދާޅުވިއެވެ.

އެހެންކަމުން ނައިބު ރައީސް ވަނީ ނޫސްވެރިކަން ކުރުމުގައި ތެދުވެރިވެ، ނޫސްވެރިންނަށް އޮތް ޒިންމާ ފުރިހަމައަށް އަދާކުރުމުގައި ދެމިތިއްބެވުމަށް އިލްތިމާސް ކުރައްވާފައެވެ.