އަމާންވެށި އަދި އަމާން ހިޔާތަކަށް ދިރާގުން ހައިސްޕީޑް އިންޓަރނެޓް ފޯރުކޮށްދެނީ

އިޖްތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ރާއްޖޭގެ އެކި ތަންތަނުގައި ހިންގާ އަމާންވެށި އަދި އަމާން ހިޔާތަކަށް ދިރާގުުން ހައިސްޕީޑް އިންޓަރނެޓް ފޯރުކޮށްދިނުމަށް އެކުންފުނިން ނިންމައިފިިއެވެ.

ދިރާގުން މިއަދު ބުނެފައިވަނީ ހުރިހާ އަމާން ވެށި އަދި އަމާން ހިޔާތަކަށް ހައި ސްޕީޑް އިންޓަނެޓްގެ އެހީތެރިކަން 2025 ވަނަ އަހަރަށް ވެސް އެ ކުންފުނީގެ ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރު) ގެ ދަށުން ފޯރުކޮށްދޭން ނިންމާފައިވާ ކަމަށެވެ.

އަމާން ވެށި އަދި އަމާން ހިޔާތަކަކީ އިޖުތިމާއީ އަދި އާއިލީ ތަރައްގީއާ ބެހޭ ވުޒާރާގެ ފެމިލީ އެންޑް ޗިލްޑްރަންސް ސާވިސް ސެންޓާސް (އެފްސީއެސްސީ) މެދުވެރިކޮށް ދައުލަތުގެ ދަށުން ކުދިން ބަލަހައްޓާ ހާއްސަ ހިޔާތަކެކެވެ.

މިގޮތުން ދިރާގުގެ ސީއެސްއާރު ޕްރޮގްރާމްގެ ދަށުން ފޯރުކޮށްދެވޭ އެ އެހީގެ ސަބަބުން ހަލުވި ސްޕީޑްގައި ދިރާގު ފައިބާ އިންޓަނެޓް ރާއްޖޭގެ އެކި ކަންކޮޅުތަކުގައި ގާއިމުކުރެވިފައިވާ އެފްސީއެސްސީތަކަށް ފޯރުކޮށްދޭނެ ކަމަށް އެ ކުންފުނިން ވިދާޅުވިއެވެ. އޭގެ ތެރޭގައި، ބ. އޭދަފުށި، ށ. ފުނަދޫ، ހއ. ދިއްދޫ، ދ. ކުޑަހުވަދޫ، ލ. ފޮނަދޫ، ނ. މަނަދޫ، ޅ. ނައިފަރު، ފުވައްމުލައް ސިޓީ، ކުޅުދުއްފުށި ސިޓީ އަދި ސ. ހިތަދޫގައި ހިންގާ އެފްސީއެސްސީތައް ހިމެނެއެވެ.

މި ޕްރޮގްރާމްގެ މަގުސަދަކީ ޑިޖިޓަލް ލިޓަރަސީ ކުރިއަރުވައި، ދައުލަތުގެ ބެލުމުގެ ދަށުގައިވާ ކުދިންގެ ތަޢުލީމީ ބޭނުންތަކަށް އެހީތެރިވުން ކަމަށް ދިރާގުން ވިދާޅުވެފައިވެއެވެ.

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ ދަށުން ހިންގަމުންދާ އަމާންވެށިތަކާއި އަމާންހިޔާތަކުގައި، ދައުލަތުގެ ބެލުމުގެ ދަށުގައި ތިބި ނާޒުކު ފަރާތްތަކަށް އެހީތެރިވުމުގެ ގޮތުން ދިރާގުން ފޯރުކޮށްދެމުން ގެންދާ ހައި ސްޕީޑް އިންޓަނެޓް 2025 ވަނަ އަހަރަށް ވެސް ދިރާގުގެ ސީއެސްއާރު… pic.twitter.com/RdgM1Luqdf

— Ministry of Social and Family Development (@MSFDmv) November 21, 2024

ކުޑަކުދިން ރައްކާތެރިކުރުމާއި ޒުވާނުން ބާރުވެރިކުރުމަކީ ދިރާގުގެ ސީއެސްއާރު ޕްރޮގްރާމްގައި ވަރަށް ހާއްސަ އަހަންމިއްޔަތުކަމެއް ދޭ ދާއިރާއެކެވެ. އެގޮތުން ފާއިތުވި އަހަރުތަކުގައި ވެސް ދިރާގުން ވަނީ އަމާން ވެށި، އަމާން ހިޔާ އަދި ކުޑަކުދިންގެ ހިޔާއަށް އެހީތެރިކަން ފޯރުކޮށްދީފައެވެ.

މީގެ އިތުރުން ކުޑަކުދިންގެ ހައްގުގައި މަސައްކަތް ކުރާ އެކި އެންޖީއޯތަކަށް އެހީތެރިކަން ފޯރުކޮށްދިނުމަށް ވެސް ދިރާގުން އަބަދު ވެސް އިސްކަންދެއެވެ.