އޭސީސީ އާއި އީސީގެ ފަސް މެމްބަރުން ވަކިކުރުމަށް މަޖިލީހުގެ ކޮމިޓީއިން ނިންމައިފި

އެންޓި ކޮރަޕްޝަން ކޮމިޝަނާއި އިލެކްޝަން ކޮމިޝަންގެ ފަސް މެމްބަރުން ވަކިކުރުމަށް ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީން ނިންމައިފިއެވެ. 

މިނިވަން މުއައްސަސާތަކުގެ ކޮމިޓީގެ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އަޣުލަބިއްޔަތުން ނިންމާފައިވަނީ އޭސީސީގެ ނައިބު ރައީސް ޢަބްދުއްސަލާމް އަދި އެ ކޮމިޝަންގެ މެންބަރު ޠާހާ މުޙައްމަދާއި އީސީގެ ނައިބު ރައީސް ޢަލީ ނަޝާތު އަދި އެ ކޮމިޝަންގެ މެންބަރުން ކަމަށްވާ ޑރ. މުޙައްމަދު ޒާހިރާއި މުޙައްމަދު އާސިފް ވަކި ކުރަން ފެންނަ ކަމަށެވެ.

 މިނިވަން މުއައްސަސާތަކުގެ ކޮމިޓީން މި ބައްދަލުވުން ކުރިއަށް ގެންދިޔައީ ސިއްރުކޮށްގެންނެވެ.

އޭސީސީގެ ނައިބު ރައީސް ޢަބްދުއްސަލާމާއި އެ ކޮމިޝަން މެންބަރު ޠާހާ މުޙައްމަދުގެ މައްޗަށް ތުހުމަތު ކުރެވެނީ އެ ކޮމިޝަން ޤާނޫނުގެ 14 ވަނަ މާއްދާގައި ބަޔާންކޮށްފައިވާ ހ، ށ އާއި ޚިލާފަށް އެތައް ކަމެއް ކޮށްފައި ވުމެވެ.

އީސީގެ ނައިބު ރައީސް އަލީ ނަޝާތާއި މެންބަރު މުޙައްމަދު އާސިފާއި މެންބަރު ޑރ. މުޙައްމަދު ޒާހިރު މަޤާމުން ވަކި ކުރަން ފޮނުވީ ސުލޫކީ މާއްދާތަކާއި ޚިލާފުވުމެވެ.

ސިވިލް ސާވިސް ކޮމިޝަންގެ ރައީސް މުޙައްމަދު ނާސިހު ވަކިކުރުމުގެ މައްސަލަ ވެސް މަޖިލިހަށް ހުށަހެޅިއެވެ. އެކަމަކު ކޮމިޓީން ނިންމާފައިވަނީ ނާސިހު އެ މަޤާމުން ވަކިކުރަން ނުފެންނަ ކަމަށެވެ. އެކަމުގެ ސަބަބެއް ސާފުވެފައެއް ނުވެއެވެ.

މި ކޮމިޝަންތަކުގެ މެމްބަރުންތަކެއް ވަކިކުރުމުގެ މަސައްކަތް މަޖިލީހުން ފަށަން ކޮމެޓީއަށް ފޮނުއްވާފައިވާއިރު، އޭސީސީ އާއި އީސީގެ ރައީސާއި ނައިބު ރައީސް އައްޔަންކުރެއްވުމުގެ ބާރު ރައީސުލްޖުމްހޫރިއްޔާއަށް ލިބޭ ގޮތަށް އެ ކޮމިޝަންތަކުގެ ޤާނޫނަށް އިސްލާޙު ގެނައުމުގެ މަސައްކަތް ވެސް މަޖިލިހުގައި ދަނީ ހިނގަމުންނެވެ.