އޭސީސީ އާއި އީސީ ގެ ރައީސް އަދި ނައިބު ރައީސް އައްޔަނުކުރުމުގެ ބާރު ރައީސް އަށް ދޭން ކޮމިޓީއިން ފާސްކޮށްފި

އެންޓި ކޮރަޕްޝަން ކޮމިޝަނާއި އިލެކްޝަން ކޮމިޝަންގެ ރައީސް އަދި ނައިބު ރައީސް އައްޔަނުކުރުމުގެ ބާރު ރައީސުލްޖުމްހޫރިއްޔާ އަށް ދޭން މިނިވަން މުއައްސަސާތަކާ ބެހޭ ކޮމިޓީއިން ނިންމައިފިއެވެ. 

މިނިވަން މުއައްސަސާތަކާ ބެހޭ ޤާނޫނަށް މިފަދަ އިސްލާޙެއް ހުށައަޅައިފައިވަނީ ސަރުކާރުގެ ފަރާތުންނެވެ.

އޭސީސީގެ ޤާނޫނާއި އީސީގެ ޤާނޫނަށް އިސްލާޙް ގެނައުމުގެ ބިލް ބަލައިގަނެ، ދިރާސާ ކުރަން މިނިވަން މުއައްސަސާތަކުގެ ކޮމިޓީއަށް ފޮނުވީ މި މަހުގެ 25 ގައެވެ. މިދިޔަ ބުދަ ދުވަހު ކޮމިޓީން ވަނީ އެ ދެ ބިލު ދިރާސާކޮށް ނިންމައި ކޮމިޓީ ރިޕޯޓު ފާސްކޮށްފައެވެ. ކޮމިޓީން ނިންމާފައި ވަނީ ބިލަށް އެއްވެސް ބަދަލެއް ނުގެނައުމަށެވެ.

ޤާނޫނުގައި މިހާރު އޮންނަ ގޮތުން ނަމަ، އޭސީސީ އާއި އީސީގެ ރައީސް އައްޔަން ކުރަނީ އެ ކޮމިޝަނެއްގެ މެމްބަރުންގެ މެދުގައި ނަގާ ވޯޓަކުންނެވެ. ނަމަވެސް މިހާރު މަޖިލީހަށް ހުށަހަޅާފައިވާ މި ބިލުގައިވާ ގޮތުން އެ ކޮމިޝަންތަކަށް ރައީސެއް އައްޔަން ކުރުމަށް، ކޮމިޝަންގެ މެމްބަރުންގެ ތެރެއިން މެމްބަރެއްގެ ނަން މަޖިލީހަށް ހުށަހަޅާނީ ރައީސުލްޖުމްހޫރިއްޔާއެވެ. އަދި ރައީސުލްޖުމްހޫރިއްޔާ ނަމެއް ފޮނުވުމުން މަޖިލިހުން އެ ނަން ފާސްކުރަން ޖެހޭނެއެވެ.

ރައީސް ހުށަހަޅުއްވާ ނަންތަކުގެ ތެރެއިން އެ މަޤާމަކަށް މީހަކު އައްޔަން ކުރެވޭނީ، މަޖިލީހުގެ ޖަލްސާގައި ހާޒިރުވެ ވޯޓުގައި ބައިވެރިވެވަޑައިގަންނަވާ މެންބަރުންގެ އަޣުލަބިއްޔަތުންނެވެ.

އޭސީސީ އާއި އީސީ ފަދަ މުހިންމު މުއައްސަސާތަކުގެ ވެރިންނަށް ރައީސް ބޭނުންފުޅުވާ ބޭފުޅަކު ގެނައުމުގެ ފުރުސަތު ދިނުމަކީ އެ ކޮމިޝަންތަކަށް ސަރުކާރުގެ ނުފޫޒު ވަރަށް ބޮޑަށް ވަންނާނެ ކަމެއް ކަމަށް ބުނެ، އިދިކޮޅުން ވަނީ ކަންބޮޑުވުން ފާޅުކޮށްފައެވެ.

 ނަމަވެސް ސަރުކާރުންނާއި ޕީއެންސީގެ މެމްބަރުން ވިދާޅުވަނީ އެ ބަދަލު ގެނައުން މުހިންމުކަމަށެވެ. އޭރުން ކޮމިޝަންގެ މަސައްކަތްތައް ހަލުވިވެ، ރަނގަޅަށް ހިނގާނެ ކަމަށް ވެސް އެ ބޭފުޅުން ދެކެވަޑައިގަންނަވައެވެ.