މިއަހަރުގެ މިހާތަނަށް 1.7 މިލިއަން ފަތުރުވެރިން ރާއްޖެއަށް ޒިޔާރަތްކޮށްފައިވޭ

މިއަހަރުގެ މިހާތަނަށް 1.7 މިލިއަން ފަތުރުވެރިން ރާއްޖެއަށް ޒިޔާރަތްކޮށްފައިވާ ކަމަށް ފަތުރުވެރިކަމާ ބެހޭ ވުޒާރާގެ ތަފާސް ހިސާބުތަކުން ދައްކައިފިއެވެ. 

ފަތުރުވެރިކަމާއި ބެހޭ ވުޒާރާގެ ފަތުރުވެރިކަމުގެ ޑެއިލީ ރިޕޯޓްސްއިން ދައްކާގޮތުން އިއްޔެގެ ނިޔަލަށް ރާއްޖެއަށް ޖުމްލަ 1,797,028 ފަތުރުވެރިން ވަނީ ޒިޔާރަތްކޮށްފައިވެއެވެ.

އިއްޔެ އެކަނިވެސް ރާއްޖެއަށް 6،760 ފަތުރުވެރިން ޒިޔާރަތްކޮށްފައިވެއެވެެ.

ވީއައިއޭގެ ފްލައިޓް ސްޓޭޓަސްއަށް ބަލާއިރު، މިއަދަށް ރާއްޖެއަށް އައުމަށް ޝެޑިއުލްކުރި ފްލައިޓްތަކުގެ ތެރެއިން ގިނަ ފްލައިޓްތައް ވަނީ ލޭންޑްކޮށްފައެވެ.

ފަތުރުވެރިކަމުގެ ވުޒާރާގެ ތަފާސްހިސާބަށް ބަލާއިރު، މިދިޔަ އަހަރާ އަޅާބަލާއިރު، މިއަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ ނިސްބަތް ވަނީ، 9.2 އިންސައްތައިގައި ކުރިއަށް ޖެހިލާފައެވެ.

ތަފާސްހިސާބަށް ބަލާއިރު، މިމަހުގެ މިހާތަނަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ މިދިޔަ އާދިއްތަ ދުވަހުއެވެ. އެދުވަހު ރާއްޖެއަށް 7,001 ފަތުރުވެރިން ވަނީ ޒިޔާރަތްކޮށްފައެވެ.

މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ ޢަދަދަށް ބަލާއިރު، އެންމެ ގިނައިން ރާއްޖެއަށް ޒިޔާރަތްކޮށްފައިވަނީ ޗައިނާގެ ފަތުރުވެރިންނެވެ.

އަހަރުގެ މިހާތަނަށް ޗައިނާއިން ރާއްޖެއަށް 248,141 ފަތުރުވެރިން ވަނީ ޒިޔާރަތްކޮށްފައެވެ. ޗައިނާގެ އިތުރުން ދެން އެންމެގިނައިން ރާއްޖެއަށް ފަތުރުވެރިން ޒިޔާރަތްކޮށްފައިވަނީ، ރަޝިޔާ އަދި އިނގިރޭސިވިލާތެވެ.

މި އަހަރު ނިމުމުގެ ކުރިން ރާއްޖެއަށް 2 މިލިއަން ފަތުރުވެރިން ގެނައުމަކީ ސަރުކާރުގެ އަމާޒުކަން ފާހަގަކޮށްލަން ޖެހެއެވެ.