މަކުނުދޫ ބޭރުން ހިފެހެއްޓި ލަންކާ މަސްބޯޓުން 1 ބިލިއަން ރުފިޔާގެ މަސްތުވާތަކެތި ހޯދައިފި

ހދ މަކުނުދޫ ބޭރުން ހިފެހެއްޓި ސްރީލަންކާގެ މަސްބޯޓުން 1 ބިލިއަން ރުފިޔާގެ މަސްތުވާތަކެތި ހޯދައިފިއެވެ. 

މިކަމާއި ގުޅިގެން ދިވެހި ފުލުހުންގެ ޚިދުމަތުން ބުނެފައިވަނީ ރޭގެ ވަގުތެއްގައި އެމްއެންޑީއެފްގެ ބެލުމުގެ ދަށަށް ގެނެވުނު ބޯޓުން 468.6 ކިލޯގެ މަސްތުވާތަކެތި ފެނިފައިވާކަމަށެވެ. 

މިކަމާގުޅޭގޮތުން މަޢުލޫމާތު ހިއްސާކުރުމަށް މިއަދު ފުލުހުން ބޭއްވި ނޫސްވެރިންގެ ބައްދަލުވުމުގައި ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވީ، އެ އުޅަނދު ރާއްޖެ ސަރަހައްދުގައި މަކުނުދޫ ބޭރުގައި ހަރަކާތްތެރިވާކަން އެމްއެންޑީއެފަށް އެނގުނީ ރޭ ދަންވަރު 12:45 ހާއިރުކަމަށެވެ.

ސްރީލަންކާގެ އަށެންފުތަ ނަމަކަށް ކިޔާ އެ މަސް ބޯޓުގައި އެ ޤައުމަށް ނިސްބަތްވާ 5 ފިރިހެނުން ތިބި ކަމަށް ކޮމިޝަނަރ ޝުޖާޢު ވިދާޅުވިއެވެ. 

އެ ބޯޓު ކުޅުދުއްފުށީ ބަނދަރަށް ފުލުހުންގެ ބެލުމުގެ ދަށަށް ގެނެސް ފާސްކޮށް ބެލިބެލުމުން އެ ބޯޓުގައި 468.6 ކިލޯގެ މަސްތުވާތަކެތި ހޯދިފައިވާ ކަމަށް ޢަލީ ޝުޖާޢު ވިދާޅުވިއެވެ. އޭގެ ތެރޭގައި ހިމެނެނީ 344 ކިލޯގެ ކްރިސްޓަލް މެތްގެ އިތުރުން 124.7 ކިލޯގެ ހެރޮއިން ހިމެނެއެވެ. މިތަކެތީގެ މަގުމަތީގެ އަގު 1 ބިލިއަން ރުފިޔާއަށް އަރާނޭކަމަށް ފުލުހުން ވަނީ ބުނެފައެވެ.

މިކަމުގައި ދިވެއްސެއްގެ އަތެއްވޭތޯ ނުވަތަ ނޫންތޯ އަދި ކަނޑައެޅިގެން ބުނަން ދަތިކަމަށާއި މިކަމުގެ ތަހުޤީޤު ފުލުހުން މިހާރު ކުރަމުންދާކަމަށް ޝުޖާޢު ވިދާޅުވިއެވެ.

މިއީ މަސްތުވާތަކެތި އެތެރެކުރުމުގެ މައްސަލަ ހުއްޓުވުމަށް އެކިއެކި އިދާރާތަކާ ގުޅިގެން ކުރަމުންގެންދާ މަސައްކަތްތަކުގެ ތެރެއިން ކުރެވުނު ކާމިޔާބު މަސައްކަތެއް ކަމަށް ޝުޖާޢު ވިދާޅުވިއެވެ.

އެބޯޓް ޓްރެކްކޮށް އަތުލައިގަނެފައިވަނީ ކޯސްޓްގާޑަށް ލިބުނު މަޢުލޫމާތަކާ ގުޅިގެންނެވެ.