ގިނަ ޢަދަދެއްގެ މަސްތުވާތަކެތި އަތުލައިގަތުމުން ރައީސް މުޢިއްޒުގެ ޝުކުރު މުޢައްސަސާތަކަށް

އެމްއެންޑީއެފާއި ފުލުހުން ޚިދުމަތުން ގުޅިގެން ހިންގި އޮޕަޜޭޝަނުން ގިނަ ޢަދަދެއްގެ މަސްތުވާތަކެތި އަތުލައިގެންފައިވާތީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒު މުޢައްސަސާތަކަށް ޝުކުރުދަންނަވައިފިއެވެ.

ރައީސް ޑރ މުޢިއްޒު އެކްސްގައި ކުރައްވައިފައިވާ ޕޯސްޓެއްގައި ވިދާޅުވެފައިވަނީ މިއަދުގެ ވަގުތެއްގައި ރާއްޖޭގެ ސަލާމަތީ ޚިދުމަތްތަކުންވަނީ 468.6 ކިލޯގްރާމުގެ މަސްތުވާތަކެތި ރާއްޖޭގެ ކަނޑުގެ ސަރަހައްދުން އަތުލައިގެންފައި ކަމަށެެވެ.

އަދި މިތަކެތީގެ މަގުމަތީ އަގަކީ ގާތްގަނޑަކަށް އެއް ބިލިއަން ދިވެހި ރުފިޔާ ކަމަށާއި، ދިވެހިރާއްޖެ މަސްތުވާތަކެތިން އެއްކޮށް ސަލާމަތްކުރުމަކީ އަޅުގަނޑުމެން އެއްމެ އިސްކަންދޭ އެއްކަންތައް ކަމަށް ރައީސް ވިދާޅުވިއެވެ.

ޤާނޫނު ތަންފީޒުކުރާ މުއައްސަސާތަކުން މިދާއިރާއިން ކުރަމުންގެންދާ ބުރަމަސައްކަތް ފާހަގަކޮށް އެފަރާތްތަކަށް ޝުކުރު ދަންނަވަން

ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވިދާޅުވިއެވެ.

މިއަދުގެ ވަގުތެއްގައި ރާއްޖޭގެ ސަލާމަތީ ޚިދުމަތްތަކުންވަނީ 468.6 ކިލޯގްރާމުގެ މަސްތުވާތަކެތި ރާއްޖޭގެ ކަނޑުގެ ސަރަހައްދުން އަތުލައިގެންފައި. މިތަކެތީގެ މަގުމަތީ އަގަކީ ގާތްގަނޑަކަށް އެއް ބިލިއަން ދިވެހި ރުފިޔާ. ދިވެހިރާއްޖެ މަސްތުވާތަކެތިން އެއްކޮށް ސަލާމަތްކުރުމަކީ އަޅުގަނޑުމެން… pic.twitter.com/hL8Oz2tg9u

— Dr Mohamed Muizzu (@MMuizzu) November 24, 2024

މިމަސްތުވާ ތަކެއްޗަކީ ރޭގެ ވަގުތެއްގައި އެމްއެންޑީއެފްގެ ބެލުމުގެ ދަށަށް ގެނެވުނު ސްރީލަންކާގެ މަސްބޯޓަކުން ހޯދި 468.6 ކިލޯގެ މަސްތުވާތަކެއްޗެވެ. 

މިކަމާގުޅޭގޮތުން މަޢުލޫމާތު ހިއްސާކުރުމަށް މިއަދު ފުލުހުން ބޭއްވި ނޫސްވެރިންގެ ބައްދަލުވުމުގައި ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވީ، އެ އުޅަނދު ރާއްޖެ ސަރަހައްދުގައި މަކުނުދޫ ބޭރުގައި ހަރަކާތްތެރިވާކަން އެމްއެންޑީއެފަށް އެނގުނީ ރޭ ދަންވަރު 12:45 ހާއިރުކަމަށެވެ.

ސްރީލަންކާގެ އަށެންފުތަ ނަމަކަށް ކިޔާ އެ މަސް ބޯޓުގައި އެ ޤައުމަށް ނިސްބަތްވާ 5 ފިރިހެނުން ތިބި ކަމަށް ކޮމިޝަނަރ ޝުޖާޢު ވިދާޅުވިއެވެ. 

އެ ބޯޓު ކުޅުދުއްފުށީ ބަނދަރަށް ފުލުހުންގެ ބެލުމުގެ ދަށަށް ގެނެސް ފާސްކޮށް ބެލިބެލުމުން އެ ބޯޓުގައި 468.6 ކިލޯގެ މަސްތުވާތަކެތި ހޯދިފައިވާ ކަމަށް ޢަލީ ޝުޖާޢު ވިދާޅުވިއެވެ. އޭގެ ތެރޭގައި ހިމެނެނީ 344 ކިލޯގެ ކްރިސްޓަލް މެތްގެ އިތުރުން 124.7 ކިލޯގެ ހެރޮއިން ހިމެނެއެވެ. މިތަކެތީގެ މަގުމަތީގެ އަގު 1 ބިލިއަން ރުފިޔާއަށް އަރާނޭކަމަށް ފުލުހުން ވަނީ ބުނެފައެވެ.