ޕާޓީ ބަދަލުކުރުމުން ގޮނޑި ގެއްލޭ މާއްދާ ބާޠިލް ކުރުމަށް ސްޕްރީމް ކޯޓަށް ހުށައަޅައިފި

ސިޔާސީ ޕާޓީ ބަދަލުކުރުމުން ރައްޔިތުންގެ މަޖިލީހުގެ ގޮނޑި ގެއްލޭ މާއްދާ ބާޠިލް ކުރުމަށް ސްޕްރީމް ކޯޓަށް މައްސަލައެއް ހުށައަޅައިފިއެވެ.

މިމައްސަލަ ސްޕްރީމް ކޯޓަށް ހުށައަޅުއްވައިފައިވަނީ ކެންދޫ ދާއިރާގެ ކުރީގެ މަޖިލިސް މެމްބަރު ޢަލީ ހުސެއިނެވެ. 

އެކަމާއި ގުޅިގެން ޢަލީ ހުސެއިން މިއަދު އެކްސްގައި ކުރި ޕޯސްޓެއްގައި ވިދާޅުވީ ރާއްޖޭގެ ޖުމްހޫރިއްޔާގެ ޤާނޫނުއަސާސީއަށް 6 ވަނަ އިސްލާޙު ގެނެސްފައިވަނީ ޤާނޫނުއަސާސީގެ 4، 8، 26، 75 އަދި 90 ވަނަ މާއްދާއާ ޚިލާފަށް އަދި ޤާނޫނުއަސާސީގެ އަސާސީ އޮނިގަނޑާވެސް ޚިލާފަށް ކަމަށެވެ.

އެހެންވެ އެ އިސްލާޙު ބާތިލުކުރުމަށް އެދި ސުޕްރީމް ކޯޓަށް މައްސަލަ ހުށަހަޅާފައިވާ ކަމަށް ޢަލީ ހުސެއިން ވިދާޅުވި އެވެ.

ނަމަވެސް މައްސަލައިގެ ތަފްސީލެއް ޢަލީ ހުސެއިން ދެއްވައިފައެއް ނުވެއެވެ. 

މަޖިލީހުގެ މެންބަރުން ޕާޓީ ބަދަލުކުރުމުން ގޮނޑިގެއްލޭގޮތަށް ބިލެއް ހުށަހެޅުއްވީ ޕީއެންސީގެ ޕާލިމަންޓްރީ ގްރޫޕުގެ ޑެޕިއުޓީ ލީޑަރު، ހުޅުދޫ ދާއިރާގެ މެންބަރު މުޙައްމަދު ޝާހިދު އެވެ.

މި އިސްލާޙު ގައިވާގޮތުން، ރައްޔިތުންގެ މަޖިލީހަށް ހޮވިފައިވާ މެންބަރުން މަޖިލީހުގެ މެމްބަރު ކަމުން ވަކިވާނީ އަންނަނިވި ޙާލަތްތަކުގައެވެ. އެގޮތުން:-

• ވަކި ސިޔާސީ ޕާޓީއެއްގެ ފަރާތުން ވާދަކޮށްގެން ރައްޔިތުންގެ މަޖިލީހަށް އިންތިޚާބު ވުމަށްފަހު، އެ ރައްޔިތުންގެ މަޖިލިހުގެ ޢުމުރުގެ ތެރޭގައި އެ މެންބަރަކު ތަމްސީލުކުރާ ސިޔާސީ ޕާޓީން އަމިއްލައަށް ވަކިވުން.
• ސިޔާސީ ޕާޓީގެ ގާނޫނުގައި ބަޔާންކުރާ ގޮތުގެމަތިން، މެންބަރު ނިސްބަތްވާ ޕާޓީން އޭނާ ވަކިކުރުން
•  އެ މެންބަރަކު ތަމްސީލުކުރާ ސިޔާސީ ޕާޓީ ނޫން އެހެން ޕާޓީއެއްގެ މެންބަރަކަށްވުން.
• އަމިއްލަ ގޮތުން ވާދަކޮށްގެން ރައްޔިތުންގެ މަޖިލީހަށް އިންތިޚާބުވުމަށްފަހު، ސިޔާސީ ޕާޓީއެއްގެ މެންބަރަކަށް ވުން.

ސަރުކާރުގެ ފަރާތުން ޤާނޫނުއަސާސީއަށް ހުށަހެޅުނު މި އިސްލާޙު ރައްޔިތުންގެ މަޖިލީހުން ފާސްކޮށް ތަސްދީޤުކުރީ މިދިޔަ ބުދަ ދުވަހު އެވެ.