ގޮނޑިގެއްލޭ މާއްދާ ބާޠިލް ކުރަން ސްޕްރީމް ކޯޓަށް ހުށައެޅި މައްސަލައަށް އެމްޑީޕީ އިން ތަދައްޚުލް ވާން ނިންމައިފި

ސިޔާސީ ޕާޓީ ބަދަލުކުރުމުން ގޮނޑިގެއްލޭ ގޮތައް ޤާނޫނުއަސާސީގެ މާއްދާ އަށް ގެނައި އިސްލާޙް ބާޠިލް ކުރަން ކެންދޫ ދާއިރާގެ ކުރީގެ މެމްބަރު ޢަލީ ޙުސެއިން ސްޕްރީމް ކޯޓަށް ހުށައެޅި މައްސަލައަށް ތަދައްޚުލްވުމަށް އިދިކޮޅު އެމްޑީޕީއިން ނިންމައިފިއެވެ. 

އެމްޑީޕީ އިން އެޕާޓީގެ މި ނިންމިން އިޢުލާނު ކޮށްފައިވަނީ އެޕާޓީއިން ނެރެފައިވާ ބަޔާނެއްގައެވެ. 

އެބަޔާނުގައި އެޕާޓީ އިން ބުނެފައިވަނީ ރައްޔިތުންގެ މަޖިލީހުގެ މެންބަރުން ނިސްބަތްވާ ސިޔާސީ ޕާޓީ ނުވަތަ މެންބަރު ތަމްސީލުކުރާ ހައިސިއްޔަތު ބަދަލުކޮށްފިނަމަ މެންބަރުކަމުގެ މަޤާމު ގެއްލޭގޮތަށް، ޤާނޫނުއަސާސީގެ 73 ވަނަ މާއްދާ އިސްލާޙުކޮށް، 20 ނޮވެމްބަރު 2024 ގައި ފާސްކޮށް ތަސްދީޤުކޮށްފައިވާ ޤާނޫނުއަސާސީއަށް 6 ވަނަ އިސްލާޙު ގެނައުމުގެ ޤާނޫނަކީ،، ޤާނޫނުއަސާސީގެ ބާރު ކެނޑިގެންދާގޮތަށް، ޤާނޫނުއަސާސީ އާއި މުޅި ދިވެހި ދައުލަތް އެ މައްޗަށް ބިނާވެފައިވާ ޑިމޮކްރަސީގެ އަސާސީ ހަމަތަކާއި، ރައްޔިތުންގެ މަޖިލީހުން ޤާނޫނުތައް ފާސްކުރުމުގައި މީގެ ކުރިން ޢަމަލުކުރަމުން ގޮސްފައިވާ އުސޫލުތަކާ ޚިލާފަށް ޤާނޫނުއަސާސީއަށް ގެނެސްފައިވާ އިސްލާޙެއްކަމަށެވެ.

“ޤަނޫނުއަސާސީއަށް އެ އިސްލާޙު ގެނެސްފައިވަނީ ދިވެހި ދައުލަތުގެ އެންމެހައި ބާރުތައް ފެށިގެން އަންނަނީ ރައްޔިތުންގެ ކިބައިން ކަމާއި، އަދި މި ބާރުތައް ދެމިއޮންނާނީ ރައްޔިތުންގެ ކިބައިގައި ކަމަށް ގާނޫނުއަސާސީގެ 4 ވަނަ މާއްދާގައި ކަނޑައަޅާފައި އޮތް އޮތުމަށް ރިއާޔަތްކުރުމެއްނެތި އަދި ޤާނޫނުއަސާސީގެ 26 ވަނަ މާއްދާގެ ދަށުން، ރައްޔިތުންގެ މަޖިލީހުގައި ރައްޔިތުން ތަމްސީލުކުރާނެ މަންދޫބަކު ހިޔާރުކުރުމަށް ރައްޔިތުންނަށް ލިބިފައި އޮތް ހައްޤު އެކީ އެކަށް ނިގުޅިގެންދާ ގޮތަށް” އެމްޑީޕީ އިން ބުނެފައިވެއެވެ.

އެހެންކަމާއެކު، ޤާނޫނުއަސާސީއަށް 6 ވަނަ އިސްލާހު ގެނައުމުގެ ޤާނޫނުން ޤާނޫނުއަސާސީގެ 73 ވަނަ މާއްދާއަށް ގެނެސްފައިވާ އިސްލާޙު ޤާނޫނުއަސާސީއާ ޚިލާފުކަމަށް ކަނޑައަޅައިދިނުމަށް އެދި ދިވެހިރާއްޖޭގެ ސުޕްރީމް ކޯޓަށް މައްސަލަ ހުށަހެޅުމަށް ނިންމާފައިވާ ނިންމުމަށް މަރުހަބާ ކިޔާ ކަމަށެވެ.

އަދި އެ މައްސަލައިގެ ތެރެއަށް ދިވެހި ރައްޔިތުންގެ ޑިމޮކްރެޓިކް ޕާޓީގެ ފަރާތުން ތަދައްޚުލުވުމަށް ނިންމާފައިވާކަމަށް އެޕާޓީއިން ވަނީ ބުނެފައެވެ.

 ސަރުކާރުގެ ފަރާތުން ޤާނޫނުއަސާސީއަށް ހުށަހެޅުނު މި އިސްލާހު ރައްޔިތުންގެ މަޖިލީހުން ފާސްކޮށް ތަސްދީގުކުރީ މިދިޔަ ބުދަ ދުވަހު އެވެ.

ނިމިގެން ދިޔަ އެމްޑީޕީގެ މެޖޯރިޓީ މަޖިލީހުން ވެސް ޕާޓީ ބަދަލުކުރުމުން ގޮނޑި ގެއްލޭތޮތަށް އެންޓި ޑިފެކްޝަން ޤާނޫނެއް ފާސްކުރި ކަން ފާހަގަކޮށްލަން ޖެހެއެވެ.