ރާއްޖެއަށް ހަކުރު ލިބުމުގައި ދަތިތަކެއް ނެތް: އެސްޓީއޯ

ރާއްޖެއަށް އިންޑިއާއިން ފޮނުވާ ހަކުރު ޝިޕްމަންޓް ސްރީލަންކާއަށް ފޮނުވައިގެން ފެންމަތިވި މައްސަލައާ ގުޅިގެން ދިވެހި ރައްޔިތުންނަށް ހަކުރު ލިބުމުގައި ދައްޗެއް ކުރިމަތިނުވާނެ ކަމަށް ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ބުނެފިއެވެ.

އެސްޓީއޯއިން މިފަދައިން ބުނީ މި މައްސަލަ ފެންމަތިވުމާ ގުޅިގެން އިންޑިއާއިން ވަގުތީގޮތުން ހަކުރު އެކްސްޕޯޓްކުރުން މަޑުޖައްސާލާފައިވާ ކަމަށް ބުނެ ފަތުރަމުންދާ ޚަބަރުތަކާ ގުޅިގެންނެވެ.

އިންޑިއާގެ ނޫސްތަކުން ރިޕޯޓުކޮށްފައިވާ ގޮތުގައި، މިދިޔަ އޮކްޓޫބަރު މަހުގެ ނިޔަލަށް، އިންޑިއާއިން ސްރީލަންކާއަށް ގެންދިޔަ ހަކުރުގެ ތެރޭގައި ރާއްޖެއަށް ދޫކުރި ހުއްދައިގެ ދަށުން ގެންގޮސްފައިވާ ހަކުރުގެ 80 ކޮންޓެއިނަރު ހިމެނެއެވެ.

އިންޑިއާގެ ނޫސްތަކުން ރިޕޯޓުކޮށްފައިވާ ގޮތުގައި، ރާއްޖެއަށް އެކްސްޕޯޓްކުރުމަށް ކަނޑައަޅާފައިވާ 64,494 ޓަނު ހަކުރުގެ ތެރެއިން ބައެއް ސްރީލަންކާއަށް ޑައިވާޓްކޮށްފައިވާ މައްސަލައެއް އިންޑިއާގެ ކަމާބެހޭ ފަރާތްތަކުން ބަލަން ފަށާފައިވެއެވެ. މި މައްސަލަ ފެންމަތިވުމާ ގުޅިގެން، ސްރީލަންކާއިން ވަނީ އިންޑިއާގެ ހަކުރު ޝިޕްމަންޓަށް ކްލިއަރެންސް ދިނުމުގެ މަސައްކަތް މަޑުޖައްސާލާފައެވެ.

އިންޑިއާ އާއި ރާއްޖެއާ ދެމެދު ވެފައިވާ އެއްބަސްވުމުގެ ދަށުން ޚާއްޞަ އަގުތަކުގައި ރާއްޖެއަށް ކާޑުގެ ބާވަތްތައް ފޯރުކޮށްދެއެވެ. މީގެ ތެރޭގައި ހަނޑޫ، ހަކުރު، ފުށް، އަލުވި، ބިސް އަދި ފިޔާ ހިމެނެއެވެ. އިންޑިއާގައި ހަކުރު އުފައްދާ މިންވަރު ދަށްވުމާ ގުޅިގެން މިދިޔަ އަހަރުން ފެށިގެން ހަކުރު އެކްސްޕޯޓް ކުރުން ވަނީ މަޑުޖައްސާލާފައެވެ. ނަމަވެސް ރާއްޖެއަށް ޚާއްޞަ އެއްބަސްވުމުގެ ދަށުން އަދިވެސް އަންނަނީ ހަކުރު ފޯރުކޮށްދެމުންނެވެ.

މި މައްސަލަ ބެލުމަށް އިންޑިއާގެ ކަމާބެހޭ ފަރާތްތަކުން މަސައްކަތް ކުރަމުންދާއިރު، އެސްޓީއޯއިން ދިވެހި ރައްޔިތުންނަށް ޔަގީންކަން ދީފައިވަނީ ހަކުރު ލިބުމުގައި އެއްވެސް ދަތިކަމެއް ކުރިމަތިނުވާނެ ކަމަށެވެ.