ރާއްޖެއަށް ފުރަތަމަ ފަހަރަށް ވޯލްޑް ލީޑިން ގްރީން ޑެސްޓިނޭޝަން އެވޯޑް

ޕޯޗުގަލްގެ މަދޭރާގައި އިއްޔެ ބޭއްވުނު ވޯލްޑް ޓްރެވަލް އެވޯޑްސްގެ ގްރޭންޑް ފައިނަލް ގާލާގައި، ދިވެހިރާއްޖެއަށް ވަނީ ފުރަތަމަ ފަހަރަށް ވޯލްޑް ލީޑިން ގްރީން ޑެސްޓިނޭޝަން އެވޯޑް ލިބިފައެވެ. މި އެވޯޑަކީ ތިމާވެއްޓާ ރަށްޓެހި އަދި ދެމެހެއްޓެނިވި ފަތުރުވެރިކަމެއް ހިންގާ މަންޒިލްތަކަށް ދޭ ޚާއްޞަ އެވޯޑެކެވެ.

މި ތާރީޚީ ކާމިޔާބީއާ ގުޅިގެން ފަތުރުވެރިކަމާބެހޭ ވުޒާރާއިން ބުނީ، މި އެވޯޑުން ދައްކުވައިދެނީ ރާއްޖޭގެ ޤުދުރަތީ ވެށި ރައްކާތެރިކުރުމަށާއި ދެމެހެއްޓެނިވި ފަތުރުވެރިކަމުގެ އާދަތައް ކުރިއެރުވުމަށް ރާއްޖެއިން ދޭ އަހައްމިއްޔަތުކަން ބައިނަލްއަޤުވާމީ ފެންވަރުގައިވެސް ބަލައިގަނެފައިވާ މިންވަރު ކަމަށެވެ.

މި އެވޯޑާ ހަވާލުވެވަޑައިގަތުމަށްފަހު ފަތުރުވެރިކަމާބެހޭ ވަޒީރު އިބްރާހީމް ފައިޞަލް ވިދާޅުވީ، މި ކާމިޔާބީއަކީ ފަތުރުވެރިކަމުގެ ދާއިރާގައި ހިމެނޭ އެންމެހައި ފަރާތްތަކުގެ މަސައްކަތުގެ ނަތީޖާއެއް ކަމަށެވެ. އޭގެ ތެރޭގައި ރިސޯޓުތަކާއި، ޑައިވް ސެންޓަރުތަކާއި، އެއަރލައިންތަކާއި، ޓްރެވަލް އޭޖެންސީތަކާއި، ޓުއަރ ގައިޑުންނާއި، ދާއިރާގައި މަސައްކަތްކުރާ އެންމެހައި މުވައްޒަފުން އަދި މުޅި މުޖުތަމަޢު ހިމެނޭ ކަމަށް ވަޒީރު ފާހަގަކުރެއްވިއެވެ.

ވަޒީރު އިތުރަށް ވިދާޅުވީ، މި އެވޯޑުން ދައްކުވައިދެނީ ދިވެހިރާއްޖެއަށް ދުނިޔޭގެ ފެންވަރުގައި ލިބިފައިވާ ކާމިޔާބީގެ ފަހަތުގައިވަނީ، އެންމެން ގުޅިގެން ކުރާ މަސައްކަތާއި، ފަތުރުވެރިންނަށް ދޭ ޚިދުމަތްތަކުގެ ފެންވަރު ހިފެހެއްޓުމަށް ކުރާ މަސައްކަތުގެ އިތުރުން ތިމާވެށި ރައްކާތެރިކުރުމަށް ކުރާ މަސައްކަތްތައް ކަމަށެވެ.

މި އެވޯޑުގެ އިތުރުން، ވޯލްޑް ޓްރެވަލް އެވޯޑްސްގައި ދިވެހިރާއްޖެއަށް ވަނީ އިތުރު އެވޯޑުތަކެއްވެސް ލިބިފައެވެ. މިއީ ދިވެހިރާއްޖޭގެ ފަތުރުވެރިކަމުގެ ދާއިރާއަށް ލިބުނު ވަރަށް ބޮޑު ކުރިއެރުމެއް ކަމަށް ފަތުރުވެރިކަމުގެ ދާއިރާގެ ފަރާތްތަކުން ދެކެއެވެ.

Honored to accept the World’s Leading Green Destination award; a prestigious recognition for the Maldives. This achievement signifies a new milestone in our journey toward sustainability. Congratulations to the industry for their exceptional efforts and dedication. pic.twitter.com/VV0cEdCiOH

— Ibrahim Faisal (@ifaisalofficial) November 24, 2024