ތަޢުލީމީ ދާއިރާގެ މަޢުލޫމާތު ބެލެހެއްޓުމަށް އައު ނިޒާމެއް ތަޢާރަފުކުރަނީ

މިނިސްޓްރީ އޮފް އެޑިޔުކޭޝަނުން ތަޢުލީމީ ދާއިރާގެ މަޢުލޫމާތު ބެލެހެއްޓުމަށް އައު ނިޒާމެއް ތަޢާރަފުކުރުމުގެ މަސައްކަތް ފަށައިފިއެވެ. މި ނިޒާމަކީ އެޑިޔުކޭޝަން މެނޭޖްމަންޓް އިންފޮމޭޝަން ސިސްޓަމް (އީ.އެމް.އައި.އެސް) ގެ ނަމުގައި ތަޢާރަފުކުރާ ނިޒާމެކެވެ.

މި ނިޒާމުގެ ސްކޯޕް ޑިވެލޮޕްކުރުމުގެ މަސައްކަތް ވަނީ އަލްފާޟިލް ޙުސައިން ޝިނާންއާ ޙަވާލުކޮށްފައެވެ. މިއީ މޯލްޑިވްސް އެޓޯލް އެޑިޔުކޭޝަން ޑިވެލޮޕްމަންޓް ޕްރޮޖެކްޓް (އޭ.އީ.ޑީ.ޕީ)ގެ މަލްޓިޕްލަޔަރ ގްރާންޓްގެ ދަށުން ކުރިއަށްގެންދާ މަސައްކަތެކެވެ.

މި އައު ނިޒާމުގެ ސަބަބުން ތަޢުލީމީ ނިޒާމުގެ ހުރިހާ ހަރުފަތެއްގައިވެސް، ގަރީނާއަށް ރިއާޔަތްކޮށްގެން ނިންމުންތައް ނިންމުމުގެ ގާބިލްކަން އިތުރުވެގެންދާނެ ކަމަށް މިނިސްޓްރީން ބުނެއެވެ. އަދި މީގެ ސަބަބުން ތަޢުލީމީ ދާއިރާގެ ހިންގުން ހަރުދަނާ ކުރުމުގެ ގޮތުން ތަޢުލީމީ ދާއިރާގެ ރޭވުންތެރިކަމާއި، މާލިއްޔަތު ބެލެހެއްޓުމާއި، މޮނިޓަރކޮށް ވިލަރެސްކުރެވޭނެ ގޮތްތައް ކަނޑައެޅުމަށް ފަސޭހަވެގެންދާނެ ކަމަށްވެސް މިނިސްޓްރީން ފާހަގަކޮށްފައިވެއެވެ.

މި ނިޒާމު ތަޢާރަފުކުރުމުގެ މަސައްކަތް ފެށިފައިވަނީ މިއަދުއެވެ. ނަމަވެސް މި ނިޒާމު ފުރިހަމައަށް ތަންފީޒުކުރެވޭނެ ތާރީޚެއް އަދި ހާމަކޮށްފައެއް ނުވެއެވެ.