ގާޒާގައި އެހީ މަދުވެ ރައްޔިތުން ނުރައްކާތެރި ހާލަތަކަށް

 ގާޒާގައި ހިނގަމުންދާ ހަނގުރާމައިގެ ސަބަބުން އެތަނަށް ފޯރުކޮށްދެވޭ އެހީގެ މިންވަރު މަދުވެފައިވާކަމަށް ޑެނިޝް ރެފިއުޖީ ކައުންސިލް (ޑީއާރުސީ) އިން ވަނީ ބުނެފައެވެ. މިކަމުގެ ސަބަބުން ގާޒާގެ ރައްޔިތުން އަސާސީ ބޭނުންތައް ފުއްދުމަށްޓަކައި ހަލާކުވެފައިވާ އިމާރާތްތަކުގެ ތެރެއިން ތަކެތި ހޯދަން މަޖުބޫރުވެފައިވާ ކަމަށާއި، މިކަމުގެ ސަބަބުން އެމީހުންނަށް ގޮވާ ނުގޮވާ ބޮންތަކުގެ ސަބަބުން މަރުވުމާއި ޒަޚަމްވުމުގެ ނުރައްކާ ކުރިމަތިވެފައިވާ ކަމަށް އެ ޖަމްޢިއްޔާއިން ވަނީ އިންޒާރު ދީފައެވެ.

ޑީއާރުސީގެ އައު ރިޕޯޓެއްގައި ބުނެފައިވާ ގޮތުގައި ގާޒާގައި ސަރވޭކުރެވުނު މީހުންގެ ތެރެއިން 70 އިންސައްތަ މީހުން ވަނީ ހަނގުރާމަ ހިނގި ސަރަޙައްދުތަކަށް އަނބުރާ ގޮސްފައެވެ. މިކަމުގެ ސަބަބުން އެމީހުންނަށް ގޮވާ ނުގޮވާ ބޮންތަކުގެ ނުރައްކާ އިތުރުވެފައިވާ ކަމަށް ރިޕޯޓުގައި ބުނެއެވެ.

ސަރވޭގައި ބައިވެރިވި މީހުންގެ ތެރެއިން 23 އިންސައްތަ މީހުން ބުނެފައިވަނީ ގޮވާ ނުގޮވާ ބޮންތަކުގެ ސަބަބުން މަރުވެފައިވާ ނުވަތަ ޒަޚަމްވެފައިވާ މީހަކު އެނގޭ ކަމަށެވެ. މީގެ ތީގެ ތެރޭގައި އެފަދަ ބޮންތަކާއެކު ކުޅެފައިވާ ކުޑަކުދިންނާއި، ދަރު ނަގަން އުޅެނިކޮށް އޮޅުމަކުން ބޮން ނަގާފައިވާ މީހުން ހިމެނެއެވެ.

ޑީއާރުސީގެ މެދުއިރުމަތީގެ އެގްޒެކެޓިވް ރީޖަނަލް ޑައިރެކްޓަރު ލީލު ތަޕާ ވިދާޅުވެފައިވަނީ ގާޒާގެ ރައްޔިތުންނަށް މިހާރު ދިމާވެފައިވަނީ ދެ ބޮޑު ނުރައްކަލެއް ކަމަށެވެ. އޭގެ ތެރޭގައި ހިމެނެނީ އެހީއާއި މުދާ ފޯރުކޮށްދިނުން ހުއްޓުވާލުމުގެ ސަބަބުން ކުރިމަތިވެފައިވާ ބަނޑުހައިހޫނުކަމުގެ ނުރައްކަލާއި، ހަނގުރާމަ ނިމުނު ފަހުންވެސް ދިގު މުއްދަތަކަށް ދެމިގެންދާނެ ގޮވާ ނުގޮވާ ބޮންތަކުގެ ނުރައްކާ ކަމަށް އޭނާ ވިދާޅުވިއެވެ.

ގާޒާގައި ހަނގުރާމަ ހުއްޓުވުމަށް އަޅަންޖެހޭ ފިޔަވަޅުތައް ނޭޅުމަކީ "ދުވަހެއް ދުވަހަކަށް އިހުމާލުވަމުންދާކަމުގެ" ހެއްކެއް ކަމަށް ތަޕާ ވިދާޅުވިއެވެ. އަދި އިސްރާއީލުގެ ޢަމަލުތަކާ ގުޅިގެން ޖަވާބުދާރީ ކުރުވުމަށް މަސައްކަތް ނުކުރުމަކީ "ދުނިޔޭގައި ދެ މިންގަނޑެއް ގެންގުޅޭކަމުގެ ހާމަ މިސާލެއް" ކަމަށްވެސް އޭނާ ވިދާޅުވިއެވެ.