ހޫނު ތެރަސް ބޭނުންކޮށްގެން މޭކަޕް ކުރާ ނުރައްކާތެރި ޓްރެންޑެއް ފަށައިފި

ޖަޕާނުގެ ސްކޫލު އަންހެން ކުދިންގެ މެދުގައި އައު މޭކަޕް ޓްރެންޑެއް ފެތުރެމުންދާކަމަށް ސައުތު ޗައިނާ މޯނިންގ ޕޯސްޓުން ރިޕޯޓުކޮށްފިއެވެ. "3ޑީ ޓިއަރޑްރޮޕް މޭކަޕް" ގެ ނަމުގައި މަޝްހޫރުވެފައިވާ މި ޓްރެންޑަކީ ހޫނުކޮށްފައިވާ ގްލޫ ބޭނުންކޮށްގެން ކަރުނައިގެ ގޮތުގައި މޫނުގައި ތަތްކުރާ ޓްރެންޑެކެވެ.

މި ޓްރެންޑް ވަރަށް އަވަހަށް ޖަޕާނުގެ ސްކޫލުތަކުގައި ފެތުރި، ބައެއް ސަރަޙައްދުތަކުގައި ހޮޓް މެލްޓް ގްލޫ ގަންތައް މަދުވެފައިވާކަމަށްވެސް ރިޕޯޓު ކުރެއެވެ. މާހިރުން ބުނާ ގޮތުގައި މިފަދا އާދަޔާ ޚިލާފު ޓްރެންޑުތައް އާންމުކޮށް ސޯޝަލް މީޑިއާގައި ފެތުރި، ދެތިން ހަފްތާއެއްގެ މުއްދަތަށް ދެމިގެންދެއެވެ.

ނަމަވެސް، މި ޓްރެންޑާ ދެކޮޅަށް ގިނަ ބަޔަކު ފާޑުކިޔަމުންދެއެވެ. ޚާއްޞަކޮށް ޅަ އުމުރުގެ ކުދިން ހޫނު ގްލޫ ބޭނުންކުރުމުގައި ގެއްލުމެއް ލިބިދާނެކަމުގެ ކަންބޮޑުވުން ފާޅުކުރެއެވެ. ގިނަ ބަޔަކު މި ޓްރެންޑް ސިފަކޮށްފައިވަނީ "ބުއްދި ކުޑަ" އަދި "ހައިރާންވާފަދަ" ކަމެއްގެ ގޮތުގައެވެ.

މާހިރުން އިންޒާރުދެނީ ހޫނު ގްލޫ ސީދާ މޫނުގައި ނުޖެހުމަށެވެ. މި ޓްރެންޑް ބޭނުންކުރަން ބޭނުންވާ ފަރާތްތަކުން ސްޓެއިންލެސް ސްޓީލް ނުވަތަ ޕާޗްމަންޓް ކަރުދާސް ބޭނުންކޮށްގެން ބޭނުންވާ ޑިޒައިން ކުރެހުމަށްފަހު ބޭނުންކުރުމަށް ލަފާދެއެވެ.