ޒެމްބިއާގެ 85 އަހަރުގެ މާމަ ދުނިޔޭގެ ފެޝަން އައިކަން އަކަށް

ޒެމްބިއާގެ ރަށުތެރޭގައި ދިރިއުޅޭ 85 އަހަރުގެ އަންހެނަކު، އޭނާގެ  ފެޝަން ސްޓައިލްގެ ސަބަބުން ދުނިޔޭގެ ސަމާލުކަން ހޯދައިފިއެވެ. މާގްރެޓް ޗޯލާ ނަމަކަށް ކިޔާ މި އަންހެންމީހާގެ "ލެޖެންޑަރީ ގްލެމާރ" އިންސްޓަގްރާމް އެކައުންޓުގައި މިހާރު 105،000 އަށްވުރެ ގިނަ ފޮލޯވަރުން ވެއެވެ.

މި އައު ފެޝަން އައިކަންގެ މަޝްހޫރުކަން ފެށުނީ އޭނާގެ ކާފަ ދަރިއެއްކަމަށްވާ ޑައިއާނާ ކައުމްބާ ނިއުޔޯކް ސިޓީން ޒެމްބިއާއަށް ޒިޔާރަތްކުރުމާ ގުޅިގެންނެވެ. ކައުމްބާ އޭނާގެ މާމަ ލައްވާ އޭނާގެ ހައި-ފެޝަން ހެދުންތައް ލައްވައި، 2024 ވަނަ އަހަރުގެ އޭޕްރިލް މަހު ސޯޝަލް މީޑިއާގައި ފޮޓޯތަކެއް ޝާއިރުކުރުމުން އެ ފޮޓޯތައް ވައިރަލްވެގެން ދިޔައެވެ.

މިހާރު ޗޯލާ އާންމުކޮށް ޖީންސް ފަޓުލޫނާއި ގްރެފިކް ޓީޝާޓާއި ބްލޮންޑް ވިގް އަޅައިގެން ފޮޓޯ ނަގައެވެ. އަދި އޭނާގެ ކާފަ ދަރި ކައުމްބާ ބުނާ ގޮތުގައި މާމައަށް "ކޮންމެ ލުކެއް ވެސް ވަރަށް ރީތިކޮށް ދޭ" އެވެ.

ބީބީސީއަށް ވާހަކަދައްކަމުން ޗޯލާ ބުނީ، "މި ހެދުންތަކުގައި އަހަރެން ވަރަށް ތަފާތު، އާ އަދި ދިރުންހުރި ގޮތަކަށް އިހުސާސްކުރެވޭ. އަހަރެންނަށް މުޅި ދުނިޔެ ވެސް ކޮންކަރ ކުރެވިދާނެ ކަމަށް ހީވޭ" އެވެ. އަދި އޭނާ އުންމީދުކުރަނީ "ގްރެނީ ސީރީޒް" އިން އެހެން މީހުންނަށް ވެސް އަމިއްލަ ނަފްސު ފާޅުކުރުމަށް ހިތްވަރު ލިބޭނެ ކަމަށެވެ.

މި ސީރީޒްގެ ކާމިޔާބީއާ ގުޅިގެން އިތުރު ހަތަރު ކާފަ ދަރިން ވެސް އެމީހުންގެ 70 އަހަރާއި 96 އަހަރާ ދެމެދުގެ މާމައިންނަށް ފެޝަން ސްޓައިލް ކޮށްދިނުމަށް ކައުމްބާ ހަޔަރުކޮށްފައިވާ ކަމަށް ވެސް ޚަބަރުގައި ބުނެއެވެ.