އިހީގެ މަސްވެރިކަން ލައިސެންސް ކުރަން ފަށަނީ

މަސްވެރިކަން ރާވައި، ހިންގައި، ބެލެހެއްޓުމުގައި ލައިސަންސްކުރުމުގެ ނިޒާމެއް ޤާއިމުކުރުމަށް މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރުން ނިންމައިފިއެވެ. މި ނިޒާމުގެ މައިގަނޑު މަޤްޞަދަކީ މަސްވެރިކަމުގައި ހަރަކާތްތެރިވާ ފަރާތްތަކާއި، އިޤްތިޞާދީގޮތުން މަސްވެރިކަމުގެ ވަސީލަތްތަކަށް ބަރޯސާވާ ފަރާތްތައް ދެނެގަތުމާއި، މަސްވެރިކަމުގެ ތަފާސްހިސާބު އެއްކޮށް ބެލެހެއްޓުމެވެ.

މިނިސްޓްރީގެ ސީނިއަރ އޮފިޝަލެއް މި ނޫހަށް މަޢުލޫމާތު ދެއްވިގޮތުގައި، މި ނިޒާމުގެ ސަބަބުން މަސްވެރިކަމުގެ ޞިނާޢަތް ތަރައްޤީކުރުމަށާއި، މަސްވެރިންނަށް ފޯރުކޮށްދޭ ޚިދުމަތްތައް އެކަށީގެންވާ ގޮތެއްގައި ފޯރުކޮށްދިނުމަށް ބޭނުންވާ މަޢުލޫމާތު ލިބިގެންދާނެއެވެ. އަދި މިއީ މަސްވެރިންނާއި މަހާއި މަހުގެ އުފެއްދުންތައް ތައްޔާރުކުރާ ފަރާތްތަކުގެ ޙައްޤުތައް ރައްކައުތެރިކޮށްދީ، އިޖުތިމާޢީ އަދި އިޤްތިޞާދީ ރައްކައުތެރިކަން ކަށަވަރުކޮށްދިނުމަށް އެޅޭ މުހިންމު ފިޔަވަޅެއްކަމުގައި އެ އޮފިޝަލް ވިދާޅުވިއެވެ.

މި ނިޒާމުގެ ދަށުން، މަސްވެރިކަންކުރާ އުޅަނދުފަހަރާއި، އެ އުޅަނދުތަކުގައި ހަރަކާތްތެރިވާ ކެޔޮޅުންނާއި ފަޅުވެރިންގެ މަޢުލޫމާތު އަދި މަހުގެ އުފެއްދުންތައް އުފައްދާ ތަންތަނުގެ މަޢުލޫމާތު ބެލެހެއްޓޭނެއެވެ. މިއީ ދިވެހިރާއްޖޭގައި ކުރެވޭ މަސްވެރިކަމަކީ ބައިނަލްއަޤްވާމީ ފެންވަރުގައި ބަލައިގަންނަ މަސްވެރިކަމަކަށް ހެދުމަށް އެޅޭ މުހިންމު ފިޔަވަޅެއްކަމަށްވެސް މިނިސްޓްރީން ފާހަގަކުރެއެވެ.

އެންމެ ފުރަތަމަ މަރުޙަލާއެއްގެ ގޮތުން، އިހީގެ މަސްވެރިކަމާއި، އިހީގެ މަސްވެރިކަމުގެ ވިޔަފާރީގެ ހަރަކާތްތައް މޮނިޓަރކޮށް ބެލެހެއްޓުމަށްޓަކައި ވިޔަފާރި ބޭނުމަށް އިހީގެ މަސްވެރިކަންކުރާ އުޅަނދުފަހަރު ލައިސަންސްކުރެވޭނެ ކަމަށް މިނިސްޓްރީން ބުނެފައިވެއެވެ. މި ކަންކަމާ ގުޅޭ އިތުރު ތަފްސީލު އިހީގެ މަސްވެރިކަން ރާވައި، ހިންގައި، ބެލެހެއްޓުމާބެހޭ ގަވާއިދުގައި ހިމެނޭނެ ކަމަށްވެސް މިނިސްޓްރީން މަޢުލޫމާތު ދީފައިވެއެވެ.