ދުނިޔެ
ޑީއެޗްއެލްގެ މަތިންދާބޯޓެއް ވެއްޓިއްޖެ
ޑީއެޗްއެލް ކާގޯ ބޯޓް ފޮޓޯ:އިންޓަނެޓ
ލިތުއޭނިއާގެ ވެރިރަށް ވިލްނިއުސްގެ އެއަރޕޯޓް ކައިރީގައި މިއަދު ހެނދުނު ކާގޯ މަތިންދާބޯޓެއް ވެއްޓި އެކަކު މަރުވެ، ތިން މީހަކަށް އަނިޔާވެއްޖެއެވެ. މި ހާދިސާ ހިނގީ ހޯމަ ދުވަހުގެ ފަތިހު ވަގުތެއްގައި، ޑީއެޗްއެލްގެ ފަރާތުން ސްޕެއިންގެ ސްވިފްޓްއެއަރ އެއަރލައިންގެ މަތިންދާބޯޓެއް ވިލްނިއުސް އެއަރޕޯޓަށް ޖައްސަން އުޅެނިކޮށެވެ.
މަޢުލޫމާތު ލިބިފައިވާ ގޮތުގައި މަތިންދާބޯޓު ވެއްޓުނީ އެއަރޕޯޓާ ކައިރި ގެއަކާ ދިމާލަށެވެ. މިހާތަނަށް އެނގިފައިވާ ގޮތުގައި މި ހާދިސާގައި އެކަކު މަރުވެ، ތިން މީހަކަށް އަނިޔާވެފައިވެއެވެ. އަދި އިތުރު އެކަކު ހޯދުމުގެ މަސައްކަތް މިވަގުތު ކުރިއަށްދާ ކަމަށް ވެސް މަޢުލޫމާތު ލިބެއެވެ.
ލިތުއޭނިއާގެ ފުލުހުން ބުނާ ގޮތުގައި މި ހާދިސާ ހިނގި ސަރަޙައްދުގައި ހުރި ގެއަކުން 12 މީހުން ރައްކާތެރިކަމާއެކު ސަލާމަތްކުރެވިފައިވެއެވެ. މި ހާދިސާއާ ގުޅިގެން އިތުރު ތަޙްޤީޤުތައް ކުރިއަށްދާ ކަމަށް ވެސް އެ ޤައުމުގެ އިދާރާތަކުން މަޢުލޫމާތު ދީފައިވެއެވެ.
