އައިޝްވަރްޔާ ދަރިފުޅު ބަލަހައްޓާގޮތުން އަބީޝެކް ޝުކުރުއަދާކޮށްފި

ބޮލީވުޑްގެ މަޝްހޫރު ޖޯޑު އަބިޝެކް ބަޗަން އަދި އައިޝްވަރިޔާ ރާއީ ބަޗަންގެ ވަރިވުމުގެ އަޑުތައް ފެތުރެމުންދާ ދަނޑިވަޅެއްގައި، އަބިޝެކް ވަނީ އޭނާގެ އަނބިމީހާ އާރާދިޔާއަށް ބަލަހައްޓަމުންދާ ގޮތަށް ތަޢުރީފުކޮށްފައެވެ. "ދަ ހިންދޫ" އަށް ދިން އިންޓަވިއުއެއްގައި އަބިޝެކް ބުނީ، އޭނާގެ މަންމަ ޖަޔާ ބަޗަން ވެސް ދަރިންނަށް ވަގުތު ދިނުމަށްޓަކައި އެކްޓިންގ ދޫކޮށްލި ކަމަށެވެ.

"އަހަރެންގެ ގޭގައި، އަހަރެންނަށް ބޭރަށް ނުކުމެ ފިލްމު ހެދުމުގެ ފުރުސަތު ލިބޭއިރު، އައިޝްވަރިޔާ އާރާދިޔާއާއެކު ގޭގައި ހުންނަކަން އަހަރެންނަށް އެނގޭ. އަދި އެކަމަށްޓަކައި އަހަރެން އޭނާއަށް ވަރަށް ޝުކުރުވެރިވަން،" އަބިޝެކް ބުންޏެވެ.

މިދިޔަ ހަފްތާގައި އައިޝްވަރިޔާ ރާއީ ބަޗަން އިންސްޓަގްރާމްގައި ޕޯސްޓްކުރި ފޮޓޯތަކުގައި އާރާދިޔާގެ އުފަންދުވަހާއި އޭނާގެ ބައްޕަގެ އުފަންދުވަސް ފާހަގަކުރި މަންޒަރުތައް ހިމެނެއެވެ. ނަމަވެސް މި ފޮޓޯތަކުގައި އަބިޝެކް ބަޗަން ނެތުމުން، ދެމަފިރިންގެ ވަރިވުމުގެ އަޑުތައް އިތުރަށް ފެތުރިގެން ގޮސްފައިވެއެވެ.

މި އަޑުތައް އިތުރަށް ފެތުރުނީ ޖުލައި މަހު ބޮޑު ކައިވެންޏަކަށް ދެމަފިރިން ވަކިވަކިން ޙާޟިރުވުމާ ގުޅިގެންނެވެ. އަދި "ގްރޭ ޑިވޯސް" އާ ބެހޭ ޕޯސްޓަކަށް އަބިޝެކް ލައިކްކުރުމުން މި އަޑުތައް އިތުރަށް ފެތުރިގެން ދިޔައެވެ.

ނަމަވެސް، އަބިޝެކް އޭނާގެ އަނބިމީހާއަށް މިހާރު ދީފައިވާ ތަޢުރީފުން، މި އަޑުތަކުގެ ޙަޤީޤަތާމެދު ސުވާލު އުފެދިފައިވެއެވެ. ދެމަފިރިންގެ ގުޅުން ރަނގަޅުވެ، އެ ދެމަފިރިން އެކުގައި ދިރިއުޅެމުންދާކަން މި ބަސްތަކުން ދޭހަވެއެވެ.