ރާއްޖޭގައި ފުރަތަމަ ފަހަރަށް މެރިން ސައިންސް ކިޔަވައިދޭން ފަށައިފި

ރާއްޖޭގައި ފުރަތަމަ ފަހަރަށް އޭ ލެވެލްގައި މެރިން ސައިންސް މާއްދާ ކިޔަވައިދޭން ފަށައިފި އެވެ. މި މާއްދާ ކިޔަވައިދޭން ފަށާފައިވަނީ ސެންޓަރ ފޯ ހަޔަރ ސެކަންޑަރީ އެޑިއުކޭޝަން (ސީއެޗްއެސްއީ) ގައެވެ.

ސީއެޗްއެސްއީގައި މިދިޔަ ސެޕްޓެމްބަރު މަހު އޭ ލެވެލް ފެށިއިރު މި މާއްދާ ކިޔަވައިދޭން ފަށާފައިވީ ނަމަވެސް، ރަސްމީކޮށް މިކަން ފާހަގަކޮށްފައިވަނީ އިއްޔެއެވެ. މިހާރު ރާއްޖޭގައި އޭ ލެވެލްގައި މެރިން ސައިންސް ކިޔަވައިދޭ ހަމައެކަނި ސްކޫލަކީ ސީއެޗްއެސްއީ އެވެ.

މާލޭގައި ހުންނަ ސީއެޗްއެސްއީގައި މެރިން ސައިންސް ކިޔަވައިދޭން ފެށުން ފާހަގަކުރުމުގެ ގޮތުން ބޭއްވުނު ރަސްމިއްޔާތުގައި މޯލްޑިވްސް މެރިން ރިސާޗު އިންސްޓިޓިއުޓުގެ މެރިން ބަޔޮލޮޖިސްޓް ޑރ. އަހުމަދު ރިޔާޒް ޖައުހަރީ ބައިވެރިވެ ވަޑައިގެންނެވިއެވެ.

ސީއެޗްއެސްއީގެ ޕްރިންސިޕަލް އަބްދުﷲ ދީދީ ވިދާޅުވި ގޮތުގައި މިހާރު އެ ސްކޫލުގައި 14 ދަރިވަރުން މި މާއްދާ ކިޔަވަމުން ގެންދެއެވެ. މީގެ އިތުރުން ހުޅުމާލެ ސްކޫލުގައި ހަތް ދަރިވަރުން މެރިން ސައިންސް ކިޔަވަމުންދާ ކަމަށް އެނގެއެވެ.

ރާއްޖޭގައި ފިޝަރީޒް ސައިންސް ކިޔަވައިދޭން ފަށާފައިވަނީ 1984 ވަނަ އަހަރު މަޖީދިއްޔާ އާއި އަމީނިއްޔާ ސްކޫލުގައެވެ. މި މާއްދާއިން ފުރަތަމަ ފަހަރަށް އޯ ލެވެލް އިމްތިހާނު ހަދާފައިވަނީ 1987 ވަނަ އަހަރުއެވެ. އެހެންކަމުން، ރާއްޖޭގައި މެރިން ސައިންސް ކިޔަވައިދޭން މި ފަށަނީ އޯ ލެވެލްގައި ފިޝަރީޒް ސައިންސް ކިޔަވައިދޭން ފެށިތާ 40 އަހަރު ފަހުންނެވެ.

ސީއެޗްއެސްއީގައި މެރިން ސައިންސް ފެށުމާއެކު، މެރިން ބަޔޮލޮޖީ، ޓްރެވަލް އެންޑް ޓޫރިޒަމް، ސައިކޮލޮޖީ އަދި ކޮމްޕިއުޓަރ ސައިންސްގެ މާއްދާތައް ވެސް އަލަށް ކިޔަވައިދޭން ފަށާފައިވެއެވެ.