ދުނިޔެ
އިންޑިއާގެ ޖާމިޢު މަސްޖިދުގެ ސަރވޭއެއް ކުރުމަށް ކުރި އަމުރާއި ގުޅިގެން ހިނގި ހަމަނުޖެހުމެއްގައި 3 މީހުން މަރުވެއްޖެ

އިންޑިއާގެ ޖާމިޢު މަސްޖިދުކައިރީ ހިނގި ހަމަނުޖެހުން ފޮޓޯ:އިންޓަނެޓް
އިންޑިޔާގެ އުއްތަރު ޕްރަދޭޝް ސްޓޭޓްގެ ސަމްބަލް ސިޓީގައި އާދީއްތަ ދުވަހު ހިނގި ހަމަނުޖެހުންތަކެއްގައި 3 މީހުން މަރުވެ، އެތައް ބަޔަކަށް އަނިޔާވެއްޖެއެވެ. މި ހާދިސާއާ ގުޅިގެން މުޅި ސިޓީ ވަނީ ސަލާމަތީ ފިޔަވަޅުތަކެއް އަޅާފައެވެ.
މި އަރައިރުންތައް ފެށުނީ މުޣަލް ޒަމާނުގެ ޖާމިޢު މަސްޖިދުގެ ސަރވޭއެއް ކުރުމަށް ކޯޓުން އަމުރުކުރުމާ ގުޅިގެންނެވެ. މި ސަރވޭ ކުރަމުންދިޔައިރު ފުލުހުންނާއި އިހުތިޖާޖުކުރި ފަރާތްތަކާ ދެމެދު ހަމަނުޖެހުން ހިނގާފައިވެއެވެ.
މި ހަމަނުޖެހުންތަކާ ގުޅިގެން 21 މީހުން ވަނީ ހައްޔަރުކޮށްފައެވެ. އަދި އިންޓަނެޓް ޚިދުމަތްތައް ވަގުތީގޮތުން މެދުކަނޑާލައި، ސްކޫލްތައް އެއް ދުވަހަށް ބަންދުކޮށްފައިވެއެވެ.
މި ސަރވޭ ކުރުމަށް ކޯޓުން އަމުރުކުރީ، މި މިސްކިތް ބިނާކޮށްފައިވަނީ ކުރީގެ ހިންދޫ މަންދިރެއް ތަޅާލުމަށްފަހު ކަމަށް ބުނެ ހުށަހެޅި މައްސަލައަކާ ގުޅިގެންނެވެ. މިއީ އިންޑިޔާގައި މިފަދަ ގިނަ މައްސަލަތަކެއް އުފެދެމުންދާ ދަނޑިވަޅެކެވެ.
އިހުތިޖާޖުކުރި ފަރާތްތަކުން ބުނާ ގޮތުގައި ފުލުހުންގެ ބޭނުންކުރި ބަޑިން 3 މީހުން މަރުވެފައިވެއެވެ. ނަމަވެސް މިކަން ފުލުހުން ވަނީ ދޮގުކޮށްފައެވެ. ސުޕްރިންޓެންޑެންޓް އޮފް ޕޮލިސް ކްރިޝަން ކުމާރު ބުނީ އެއްވެސް މީހެއްގެ ފުރާނައަށް ގެއްލުން ލިބޭފަދަ ހަތިޔާރެއް ބޭނުންކޮށްފައި ނުވާ ކަމަށެވެ.
ސަމްބަލްގައި މި ހަމަނުޖެހުންތައް ފެށިފައިވަނީ އާދީއްތަ ދުވަހުގެ ކުރިން، ބުރާސްފަތި ދުވަހުން ފެށިގެންނެވެ. މި މައްސަލައިގައި ބީޖޭޕީން ވެރިކަންކުރާ އުއްތަރު ޕްރަދޭޝްގެ އިސް ފަރާތްތަކުން ވަނީ މިސްކިތުގެ ފުރަތަމަ ސަރވޭއެއް ހަދާފައެވެ.