ކާއިނާތުގެ ތަސްބީޙަ: ފިޠުރަތުގެ ރީތި އަޑުތައް

އިންސާނާގެ ކަންފަތަށް ދުނިޔެ ހިމޭންވެފައިވާ ކަމަށް އިހުސާސްވާ ވަގުތުތަކެއް އާދެއެވެ. ނަމަވެސް، ހަގީގަތުގައި މި ކާއިނާތަކީ ދުވަހަކުވެސް ހިމޭންވާ އެއްޗެއް ނޫނެވެ. ގަސްގަހާގެހީގެ ފަތްތައް ހޫރޭ އަޑާއި، ގޮނޑުދޮށަށް ބިންދާލާ ރާޅުތަކުގެ އަޑާއި، ފަތިހުގެ ހަމަހިމޭންކަމުގައި ދޫނިސޫފާސޫފި ގޮވާ އަޑުތަކަކީ ހަމައެކަނި ތަބީއީ އަޑުތަކެއް ނޫނެވެ. މިއީ މުޅި ކާއިނާތް އެކަލާނގެއަށް ކުރާ ތަސްބީޙައިގެ މަތިވެރި އަޑުތަކެވެ.

މާތް الله ކީރިތި ޤުރުއާނުގައި ވަހީކުރައްވާފައިވެއެވެ:

ރަސްވަންތަ، ޠާހިރުވަންތަ، ޢަޒީޒުވަންތަ، ޙަކީމްވަންތަ ﷲއަށް އުޑުތަކާއި، ބިމުގައިވާހާ ތަކެއްޗެއް ތަސްބީޙަ ކިޔަތެވެ. (ސޫރަތުލް ޖުމުޢާ: 1)

މި މަތިވެރި އާޔަތުން އެނގިގެންދަނީ، މުޅި ކާއިނާތް އޮތީ އެތަކެތި ހެއްދެވި ފަރާތް ހަނދުމަކުރުމުގެ މަތިވެރި ޙާލަތެއްގައި ކަމެވެ. އުޑުގައިވާ ކޮންމެ ތަރިއަކާއި، ބިމުގައިވާ ކޮންމެ ވެލިފުކެއް، އަދި  މަސްމަހާމެއްސާއި ދޫނިސޫފާސޫފިވެސް، އިންސާނުންނަށް ފަހުމްނުވާ ފަދަ ގޮތްގޮތަށް الله އަށް ތަސްބީޙަ ކިޔައި ހަނދުމަކުރެއެވެ.

ސޫރަތުލް އިސްރާގެ 44 ވަނަ އާޔަތުގައިވެއެވެ:

ހަތް އުޑާއި، ބިމާއި، އެތަންތާނގައިވާހާ ބަޔަކު، އެކަލާނގެއަށް ތަސްބީޙަ ކިޔަތެވެ. އަދި އެކަލާނގެއަށް ޙަމްދާއެކުގައި، ތަސްބީޙަ ނުކިޔާ އެއްވެސް އެއްޗެއް ނުވެތެވެ. އެހެނެއްކަމަކު، ތިޔަބައިމީހުންނަކަށް އެތަކެތީގެ ތަސްބީޙައެއް ނުވިސްނެއެވެ. ހަމަކަށަވަރުން، އެކަލާނގެއީ، ޙަލީމްވަންތަ، ގިނަގިނައިން ފާފަފުއްސަވާ ރަސްކަލާނގެ ކަމުގައިވެއެވެ.

މި ޙަޤީޤަތަށް ބަލާއިރު، އަހަރެމެންގެ ވަށައިގެންވާ ހުރިހާ ތަކެއްޗެއް ވަނީ އަޅުކަމެއްގެ ތެރޭގައެވެ. ވައިރޯޅިތަކާއެކު ލެނބޭ ގަސްތަކާއި، އުޑުން ފައިބާ ވާރޭގެ ތިކިތަކާއި، ނުހަނު ފުރިހަމަ ތަރުތީބަކުން ދަތުރުކުރާ ކަނޑުގެ އޮއިވަރާއި، ހިމޭންކަމާއެކު ކޮޅަށް ހުރި ފަރުބަދަތަކަކީ އިލާހީ އަމުރުފުޅަށް ކިޔަމަންތެރިވުމުގެ ނިޝާންތަކެވެ.

އިންސާނުންނަށް ބައެއް ފަހަރު މި ތަބީއީ މަންޒަރުތަކަކީ ދިރުމެއް ނެތް އެއްޗެހިތަކެއްގެ ގޮތުގައި ފެނުނަސް، އިސްލާމްދީން ދަސްކޮށްދެނީ މުޅި ކާއިނާތުގައި، ހަމައެކަނި الله އަށް ދެނެވޮޑިގެންވާ ފަދަ އިހުސާސްތަކެއް ވާކަމެވެ. ރާޅުތައް ގޮނޑުދޮށަށް ބިންދާލަނީ اللهގެ އަމުރުފުޅަށެވެ. ދޫނިތައް އެއް ބައްރުން އަނެއް ބައްރަށް ހިޖުރަކުރަނީ އެކަލާނގެ ލައްވާފައިވާ ފުރިހަމަ ނިޒާމުގެ ތެރެއިންނެވެ. އިރު އެރުމާއި، ހަނދުގެ މަރުހަލާތަކާއި، ކާއިނާތުގެ ތަރުތީބަކީ އިއްތިފާގުން ހިނގާ ކަންކަމެއް ނޫނެވެ. އެއީ އަލް-މަލިކު (މިލްކުވެރި ރަސްކަލާނގެ)، އަލް-ޤުއްދޫސު (ޠާހިރުވަންތަ ރަސްކަލާނގެ)، އަލް-ޢަޒީޒު (ނުހަނު ގަދަފަދަވަންތަ ރަސްކަލާނގެ) އަދި އަލް-ޙަކީމު (ޙިކުމަތްވަންތަ ރަސްކަލާނގެ) ގެ ކުޅަދުންވަންތަކަމުގެ ހެކިތަކެވެ.

ކާއިނާތުގެ މި ހަމަހިމޭންކަމުގެ ތެރެއަށް ވަދެލުމުން އިންސާނާގެ ހިތަށް ތަސައްލީއެއް ލިބެނީ އެހެންވެގެންނެވެ. ކަނޑުގެ އައްސޭރީގައި ނުވަތަ ގަސްތަކުގެ ހިޔަލުގައި ހޭދަކުރާ ވަގުތުތަކުގައި އިހުސާސްވާ ހިތްހަމަޖެހުމަކީ، އަހަރެމެންގެ ވަށައިގެންވާ މި ތަސްބީޙައިގެ ތެރެއަށް ހިތް ލެނބުމުގެ ނަތީޖާއެވެ.

މިއަދުގެ ހަލަބޮލި ދިރިއުޅުމާއި، ރަށުތެރޭގެ އަޑުގަދަ މާހައުލުތަކުން އިންސާނާ މި ވިސްނުމާ ދުރުކޮށްފާނެއެވެ. ނަމަވެސް، الله ވޮޑިގެންވާކަމުގެ ނިޝާންތައް އަބަދުވެސް ވަނީ ފެންނާށެވެ. ވައިރޯޅިތައް ބާރަށް ޖެހެއެވެ. އިރުއޮއްސޭ ވަގުތު އުޑުމަތީގެ ކުލަވަރުތައް ބަދަލުވެއެވެ. މި ކާއިނާތް އޮތީ ތަސްބީޙަ ކިޔުމުގައެވެ.

ކާއިނާތާ މެދު ފުންކޮށް ވިސްނާ ފިކުރުކުރުމަށް އިސްލާމްދީން ބާރުއަޅައެވެ. މިއީ ހަމައެކަނި ސައިންޓިފިކް ދިރާސާއެއް ނޫނެވެ. މިއީ ރޫޙާނީ ހޭލުންތެރިކަމެކެވެ. ކާއިނާތުގެ ކޮންމެ ދިމާލަކުންވެސް އިވެނީ الله ގެ މަތިވެރިކަމަށް ހެކިދޭ އަޑުތަކެވެ.
އެހެން ހުރިހާ މަޚްލޫޤުން الله އަށް ތަސްބީޙަ ކިޔައި ކިޔަމަންތެރިވަނީ އެތަކެތީގެ ފިޠުރަތުގެ ތެރެއިންނެވެ. ނަމަވެސް، އިންސާނުންނަށް ވަނީ އިޚްތިޔާރު ދެއްވާފައެވެ. އެންމެ ބޮޑު ކާމިޔާބީއަކީ، މި ކާއިނާތުގެ ތަސްބީޙައިގެ ތެރޭގައި ބައިވެރިވެ، الله ހަނދުމަކުރުމުގެ މަގު އިޚްތިޔާރުކުރުމެވެ. ހަލަބޮލި ދުނިޔެއެއްގައި ހިތުގެ ހަމަޖެހުން އޮތީ، އަހަރެމެންގެ ވަށައިގެން މިވާ މަތިވެރި ތަސްބީޙައިގެ އަޑުތަކަށް ކަންފަތްދީ، ޚާލިޤުވަންތަ ރަސްކަލާނގެއަށް ފުރިހަމައަށް ބޯލަނބައިގެންނެވެ.