ގެދޮރުވެރިޔާ ސްކީމްގެ 4000 ފްލެޓުގެ މަސައްކަތް އަންނަ އަހަރުގެ ޖުލައި މަހަށް ނިންމަނީ

ގެދޮރުވެރިޔާ ސްކީމްގެ 4000 ފްލެޓުގެ މަސައްކަތް އަންނަ އަހަރުގެ ޖުލައި މަަހަށް ނިންމާނެ ކަމަށް ފަހި ދިރިއުޅުން ކޯޕަރޭޝަން (އެފްޑީސީ) އިން ބުނެފިއެވެ. 

އެފްޑީސީ އިން މިހެން ބުނެފައިވަނީ ދައުލަތުގެ ޓީވީ އަށް އެކުންފުނިން ދީފައިވާ ބަސްދީގަތުމެއްގައެވެ. 

އެފްޑީސީ އިން ބުނެފައިވަނީ 4000 ފްލެޓުގެ މަސައްކަތް ނިމޭނެކަމަށް މިހާރު ލަފާކުރެވޭނީ އަންނަ އަހަރުގެ ޖުލައިމަހުގެ ތެރޭގައި ކަމަށެވެ. އަދި މަސައްކަތް އަވަސްކުރުމަށް ކުރަންޖެހޭ މަސައްކަތްތައް ތަވާލު މުރާޖަޢާކުރަމުން އަންނަކަމަށާއި މަސައްކަތުގެ ބޮޑު ބައެއް މިހާރު ނިމިފައިވާކަމަށްވެސް އެފްޑީސީއިން ވަނީ ބުނެފައެވެ.

އެފްޑީސީގެ 4000 ފްލެޓު އެޅުމުގެ މަސައްކަތް ކުރަމުން އަންނަނީ އިންޑިއާގެ ކުންފުންޏެއްކަމަށްވާ ކަލްޕަތާރޫ ޕްރޮޖެކްޓްސް އިންޓަރނޭޝަނަލް ލިމިޓެޑް، ކޭޕީއައިއެލްއާއި ނެޝަނަލް ބިލްޑިންގްސް ކޮންސްޓްރަކްޝަން ކޯޕޮރޭޝަން، އެންބީސީސީންނެވެ. އެ ކުންފުންޏާ މަސައްކަތް ހަވާލުކޮށްފައިވަނީ 2021 ވަނަ އަހަރުއެވެ. 

އެގޮތުން ކޭޕީއައިއެލްއިން ތަރައްޤީކުރަމުންދާ 16 ޓަވަރަށް "އަމާން އުދަރެސް" އަދި އެންބީސީސީން ތަރައްޤީ ކުރަމުންދާ 16 ޓަވަރަށް ދީފައިވާ ނަމަކީ "އަމާން ދޯދި"އެވެ.މި ފްލެޓުތައް ތަރައްޤީކުރަނީ 3 ކޮޓަރިއާއި 2 ކޮޓަރީގެ އެޕާޓްމެންޓްތައް ހިމެނޭ ގޮތުންނެވެ. އަދި ޓަވަރުތަކުގެ ތިރީ ދެ ފަންގިފިލާގައި ކޮމާޝަލް ޔުނިޓުތަކެއް ޤާއިމްކުރުމަށް އެފްޑީސީން ވަނީ ނިންމާފައެވެ.

ފްލެޓުތައް އަޅާފައިވާ ސަރަހައްދުގައި ޞިއްޙީ ޚިދުމަތްދޭ މަރުކަޒުތަކާއި ޒަރޫރީ ތަކެތި ގަނެވޭނެ ފިހާރަތަކާއި ޒުވާނުންގެ ސެންޓަރުތަކާއި އޮފީސް ޖާގަތަކާއި ކެފޭ ރެސްޓޯރަންޓްތައް ހުންނާނެކަމަށް އެފްޑީސީން ބުނެފައިވެއެވެ. 

ހުޅުމާލޭގެ ދެވަނަ ފިޔަވަހީގައި އެފްޑީސީން ދަނީ 32 ޓަވަރު އެޅުމުގެ މަސައްކަތް ކުރަމުންނެވެ. މި ޓަވަރުތަކުން 4000 އެޕާޓްމެންޓް ދިނުމަށް ހަމަޖެހިފައިވެއެވެ. މި އެޕާޓްމެންޓްތައް ދިނުމަށް ހަމަޖެހިފައިވަނީ މިދިޔަ ސަރުކާރުން ކުރިއަށްގެންދިޔަ "ގެދޮރުވެރިޔާ" ސްކީމްގެ ދަށުން ޝަރުތުހަމަވެ، އެންމެ މަތިން މާކްސް ލިބުނު 4000 މީހަކަށެވެ.