އޭސީސީ އާއި އީސީގެ ރައީސް އައްޔަނުކުރުމުގެ ބާރު ރައީސް އަށް ދޭ ބިލް މަޖިލީހުން ފާސްކޮށްފި

އެންޓި ކޮރަޕްޝަން ކޮމިޝަނާއި އިލެކްޝަން ކޮމިޝަންގެ ރައީސް އަދި ނައިބު ރައީސް ގެ މަޤާމަށް ބޭފުޅުން އައްޔަނު ކުރުމުގެ ބާރު ރައީސުލްޖުމްހޫރިއްޔާ އަށް ދިނުމުގެ ބިލް ރައްޔިތުންގެ މަޖިލީހުން ފާސްކޮށްފިއެވެ. 

ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ ވަކިވަކިން ދެ ބިލަށް ވޯޓަށް އަހައިފައެވެ. 

އެގޮތުން އޭސީސީގެ ޤާނޫނަށް އިސްލާޙު ގެނައުމަށް ހުށަހަޅާފައިވާ ބިލު ފާސްކުރުމަށް ފެންނަ ކަމަށް ވޯޓު ދެއްވާފައިވަނީ 69 މެމްބަރުންނެވެ. ނުފެންނަ ކަމަށް 10 މެމްބަރަކު ވަނީ ވޯޓުދެއްވައިފައެވެ. 

އަދި އީސީގެ ޤާނޫނަށް އިސްލާޙު ގެނައުމަށް ހުށަހަޅާފައިވާ ބިލް ފާސްކުރުމަށް ފެންނަ ކަމަށް ވޯޓު ދެއްވީ 69 މެމްބަރުންނެވެ. އަދި ނުފެންނަ ކަމަށް ވޯޓު ދެއްދެވީ 10 މެމްބަރެކެވެ. 

ޤާނޫނު މިހާރު އޮތްގޮތުން އޭސީސީ އަދި އިލެކްޝަންސް ކޮމިޝަނަށްވެސް ރައީސާއި ނައިބު ރައީސް އައްޔަން ކުރަނީ އެ ކޮމިޝަނުގެ މެންބަރުންގެ މެދުގައި ނަގާ ވޯޓަކުންނެވެ. މިގޮތަށް އޮތުމުގެ ސަބަބުން މައްސަލަތައް ދިމާވާ ކަމަށާއި އެހެނިހެން މިނިވަން މުއައްސަސާތަކާ އެއްގޮތަށް ޤާނޫނު ބަދަލު ކުރަންޖެހޭ ކަމަށް މަޖިލީހުގެ މެންބަރުން ވަނީ ފާހަގަކުރައްވާފައެވެ.

އޭސީސީ އާއި އިލެކްޝަންސް ކޮމިޝަނުގެ ޤާނޫނުގައިވާގޮތުން އެ ކޮމިޝަންތަކުގެ ރައީސުން އިސްތިއުފާދޭން ބޭނުންވެއްޖެނަމަ އެކަން ހާމަކޮށް ސިޓީ ހުށަހަޅަންޖެހޭނީ ކޮމިޝަނަށެވެ. އަދި ނައިބު ރައީސް އިސްތިއުފާދޭން ބޭނުންވާނަމަ ސިޓީ ހުށަހަޅާންޖެހޭނީ ކޮމިޝަނުގެ ރައީސަށެވެ.

ނަމަވެސް މަޖިލީހުން ފާސްކޮށްފައިވާ އިސްލާޙުގައިވާގޮތުން ދެ ކޮމިޝަނުގެވެސް ރައީސާއި ނައިބު ރައީސް އިސްތިއުފާދޭނަމަ އެކަން ހާމަކޮށް ސިޓީ ހުށަހަޅަންޖެހޭނީ ރައީސުލްޖުމްހޫރިއްޔާއަށެވެ.

އައު ޤާނޫނަށް ޢަމަލުކުރަން ފަށާނީ ރައީސުލްޖުމްހޫރިއްޔާ އެ ބިލު ތަސްދީޤުކުރެއްވުމުންނެވެ.