ހަމަޔަކަށް އެޅެން ގިނަ ދުވަސް ހޭދަވާނެކަމަށް ޔުނައިޓެޑުގެ އައު ކޯޗު ބުނެފި

ފުރަތަމަ މެޗުގައި ލީގުގެ 18 ވަނައިގައި އޮތް އިޕްސްވިޗާއި އެއްވަރުވިއިރު، ޓީމު ހަމަޔަކަށް އެޅުމަށް ގިނަ ދުވަސް ހޭދަވާނެކަމަށް، މެންޗެސްޓަރ ޔުނައިޓެޑާއި އަލަށް ހަވާލުވި ޕޯޗުގަލްގެ ރޫބެން އަމޮރިމް ބުނެފިއެވެ. އަމޮރިމް މިހެން ބުނީ، އާދީއްތަ ދުވަހުގެރޭ ރަށުން ބޭރުގައި އިޕްސްވިޗާއި ދެކޮޅަށް ކުޅުނު މެޗަށްފަހު އޮތް ނޫސްވެރިންގެ ބައްދަލުވުމުގައެވެ. އިޕްސްވިޗްގެ ޕޯޓްމަން ރޯޑުގައި ކުޅުނު މި މެޗު އެއްވަރުވެފައި ވަނީ 1-1 އިންނެވެ. 

މެޗު ފަށައިގެން 2 މިނެޓު ނުވަނީސް ޔުނައިޓެޑުގެ ފޯވާޑް، މާކަސް ރަޝްފޯޑު ގޯލެއް ކާމިޔާބުކޮށް ލީޑު ނަގައި ދިނުމާއެކު، ޔުނައިޓެޑުގެ ގިނަ ސަޕޯޓަރުންނަށް ދެކެވުނީ ވަރަށް އުއްމީދީ ހުވަފެނެކެވެ. ނަމަވެސް އެ ގޯލަށް ފަހު މާގިނައިރުތަކެއް ނުވަނީސް އިޕްސްވިޗުން މެޗުގެ ކޮންޓްރޯލް ނެގުމާއެކީ، ޔުނައިޓެޑުގެ ސަޕޯޓަރުންނަށް މާޔޫސްކަން ލިބުނެވެ. އަދި އިޕްސްވިޗުން ވަނީ ފުރަތަމަ ހާފުގައި ގޯލެއް ޖަހާ މެޗުގެ ނަތީޖާ ހަމަހަމަކޮށްފައެވެ. މި ގޯލު ކާމިޔާބު ކޮށްދިނީ މެޗުގެ 43 ވަނަ މިނެޓުގައި އެ ޓީމުގެ ފޯޗާޑް، އޮމަރީ ހުޗިންސަންއެވެ.

މެޗަށްފަހު އޮތް ނޫސްވެރިންގެ ބައްދަލުވުމުގައި އަމޮރިމް ބުނީ، މެޗުގެ ނަތީޖާއާ ގުޅިގެން ޔުނައިޓެޑުގެ ސަޕޯޓަރުން މާޔޫސްވާނެކަން އޭނާއަށް އެނގޭ ކަމަށާއި، ނަމަވެސް މި ވަގުތު ޓީމުގެ ކަންކަން ބަދަލު ކުރުމަށް ގިނަ މަސައްކަތްތަކެއް ކުރަމުން ދާކަމަށެވެ. އަދި ޓީމު ހަމަޔަކަށް އެޅި، ނަތީޖާތައް ރަގަޅު ކުރަން ވަގުތު ހޭދަވާނެ ކަމަށް ވެސް އޭނާ ބުންނެވެ. 

މީގެ އިތުރުން، އިޕްސްވިޗް މެޗުން ބަލިނުވެ ސަލާމަތްވުމަކީ ވެސް ރަގަޅެއް ކަމަށާއި، ޔުނައިޓެޑު ބަލިނުވީ އެ ޓީމުގެ ގޯލް ކީޕަރ، އަންދްރޭ އޮނާނާގެ ހުޝިޔާރުކަމުން ކަން އޭނާ ފާހަގަ ކުރިއެވެ. 

މެޗުގައި ރަގަޅު ކުޅުމެއް ނުދެއްކުނު އަނެއް ސަބަބަކީ، އަމޮރިމްއާއެކު މެޗަށް ތައްޔާރުވާން ޓީމަށް ލިބުނު މަދު ދުވަސްކޮޅުކަން އޭނާ ފާހަގަކުރިއެވެ. އޭނާ ބުނީ، ޔުނައިޓެޑުން މި މެޗަށް ނިކުތުމުގެ ކުރިން، އޭނާއާއެކު ޓީމަށް ފަރިތަކޮށްލުމަށް ލިބުނީ ދެ ދުވަސް ކަމަށެވެ.

ޓީމުގެ ކުޅުމާ މެދު ހިތްހަމަޖެހޭތޯ ނޫސްވެރިއަކު ކުރި ސުވާލަކަށް ޖަވާބު ދެމުން އަމޮރިމް ބުނީ، ޓީމުގެ ކުޅުން ރަގަޅު ކުރަންޖެހޭ ކަމަށާއި، އެކަން ކުރެވޭނީ އޭނާގެ ސްޓައިލަށް ޓީމު ހޭނުމަށް އެކަށޭނަ ވަގުތު ލިބިގެން ކަމަށެވެ. އޭނާ އިތުރަށް ފާހަގަ ކުރިގޮތުގައި، ކުޅުންތެރިން އެ މެޗަށް މެންޓަލީ ފިޓް ނޫންކަމާއި، އަދި ބައެއް ކުޅުންތެރިންނަށް ރަގަޅު މޫވްމެންޓްތައް ނަގަން ނޭންގުނުކަން ވެސް ފާހަގަވިކަމަށް އޭނާ ކިޔައިދިނެވެ.

އަމޮރިމް ބުނީ، ކުރިޔަށް އޮތް ދުވަސްތަކުގައި ކުޅުންތެރިން ރަގަޅަށް ދަސްކުރުމަށް އޭނާ އިސްކަން ދޭނެ ކަމަށާއި، އެކަމަށް ވެސް ވަގުތު ހޭދަވާނެ ކަމަށެވެ. 

މިހާތަނަށް ލީގުގައި ކުޅުނު 12 މެޗުން ޔުނައިޓެޑަށް ލިބިފައިވަނީ 16 ޕޮއިންޓެވެ. އަދި އެ ޓީމު ލީގުގެ 12 ވަނައިގައި އޮތްއިރު، މިހާތަނަށް މޮޅުވެފައިވަނީ 3 މެޗުންނެވެ. 

އޯލްޑް ޓްރެފަރޑްގައި އަމޮރިމްގެ އިރުޝާދުގެ ދަށުން ޔުނައިޓެޑު ފުރަތަމަ ކުޅޭނީ ޔޫރޮޕާ ލީގު މެޗެކެވެ. އެ މެޗު އޮންނާނީ މި ހަފްތާގެ ބުރާސްފަތި ދުވަހުގެ ރެއެވެ. އަދި އަމިއްލަ ދަނޑުގައި ކުޅޭ ފުރަތަމަ ލީގު މެޗު އޮންނާނީ އޭގެ ދެ ދުވަސް ފަހުންނެވެ.