ޑައިވިން ހާދިސާއާ ގުޅިގެން ހާރިޖީ ވަޒީރު އިޓަލީގެ އެމްބެސެޑަރާ ބައްދަލުކުރައްވައިފި

ވާވު އަތޮޅުގައި ޑައިވްކުރަނިކޮށް އިޓަލީގެ ފަތުރުވެރިންތަކެއް ގެއްލުމާ ގުޅިގެން، ދިވެހިރާއްޖޭގެ ހާރިޖީ ވަޒީރު އިރުތިޝާމް އާދަމް، އިޓަލީއިން ރާއްޖެއަށް ކަނޑައަޅާފައި ހުންނަވާ ސަފީރު، ޑެމިއަނޯ ފްރޭންކޮވިގްއާ ބައްދަލުކުރައްވައިފިއެވެ.

މި ބައްދަލުކުރެއްވުމާ ގުޅިގެން އެކްސްގައި ކުރެއްވި ޕޯސްޓެއްގައި އިރުތިޝާމް ވިދާޅުވީ، މި މަހުގެ 14 ވަނަ ދުވަހު ހިނގާފައިވާ މި ހާދިސާއާ ގުޅިގެން، މިހާތަނަށް ނުފެނިވާ އިޓަލީގެ ފަތުރުވެރިން ހޯދުމަށް ކުރަމުންދާ މަސައްކަތްތަކާ ގުޅިގެން މި ބައްދަލުވުމުގައި މަޝްވަރާކުރެވުނު ކަމަށެވެ. 

މީގެ އިތުރުން، ސާރޗް އެންޑް ރެސްކިޔު އޮޕަރޭޝަނުގައި ޑައިވްކުރަނިކޮށް ހާލުދެރަވި، އެމްއެންޑީއެފްގެ ސްޓާފް ސާޖަންޓް މުޙައްމަދު މަހުދީ ނިޔާވެފައިވުމަކީ ލިބުނު ބޮޑު ހިތާމައެއްކަން ފާހަގަކުރައްވައި، އެ ހިތާމައިގައި ބައިވެރިވާކަން ހާމަކުރެއްވިއެވެ. 

Foreign Minister @IruthishamAdam met with Ambassador of Italy Damiano Francovigh this evening, following the tragic diving incident in Vaavu Atoll. Discussion focused on coordinated efforts in response to the incident & expressed shared condolences over the loss of lives. pic.twitter.com/ByASiHX6Mz

— Ministry of Foreign Affairs 🇲🇻 (@MoFAmv) May 16, 2026

އިޓަލީގެ އެމްބެސެޑަރ މިކަމާ ގުޅިގެން ވިދާޅުވީ، ސްޓާފް ސާރޖަން ނިޔާވުމާ ގުޅިގެން ދިވެހި ދައުލަތަށާއި އެމްއެންޑީއެފްއަށް ތަޢުޒިޔާ ވިދާޅުވިކަމަށް ވެސް ހާރިޖީ ވަޒީރު ހާމަކުރެއްވިއެވެ.

އަދި މި ބައްދަލުވުމުގައި، މި ހާދިސާއާ ގުޅިގެން ދެ ޤައުމުގެ ކަމާގުޅުންހުރި އިދާރާތައް ގުޅިގެން މަސައްކަތް ކުރުމުގެ މުހިންމުކަމަށް އަލިއަޅުވާލެވުނުކަމަށް ވެސް ވަޒީރު ހާމަކުރެއްވިއެވެ.