މިހާތަނަށް އިމިގްރޭޝަން ވޮޗް މެދުވެރިކޮށް 900 އަށް ވުރެ ގިނަ މައްސަލަ ހުށައަޅައިފައިވޭ

އިމިގްރޭޝަންގެ “އިމިގްރޭޝަން ވޮޗް” މެދުވެރިކޮށް 900 އަށްވުރެ ގިނަ މައްސަލަ މިހާތަނަށް ހުށައަޅައިފައިވާ ކަމަށް އެމުއައްސަސާއިން ބުނެފިއެވެ.

އިމިގްރޭޝަނުން މިއަދު އެކްސްގައި ވަނީ ފާއިތުވި އެއް އަހަރު ދުވަސްތެރޭ އެ މުޢައްސަސާއިން ހާސިލް ކޮށްފައިވާ ކާމިޔާބީތައް ހިއްސާކޮށްފައެވެ.

އެގޮތުން “އިމިގްރޭޝަަން ވޮޗް” ތަޢާރަފް ކުރުން ފާހަގަކޮށް އެ ޕްލެޓްފޯމް މެދުވެރިކޮށް މިހާތަނަށް 966 މައްސަލައެއް މިހާތަނަށް ހުށައަޅައިފައިވާ ކަމަށް ބުނެފައިވެއެވެ. 

ޖުލައި 17 ވަނަ ދުވަހު ލޯންޗް ކުރި “އިިމިގްރޭޝަން ވޮޗް”އަށް މަޢުލޫމާތު ދޭ ފަރާތް ނޭނގޭ ގޮތަށްވެސް ރިޕޯޓް ކުރެވޭނެއެވެ. އަދި ދޭ މަޢުލޫމާތުގެ ސިއްރު ހިފެހެއްޓޭނެ ކަމަށްވެސް އިމިގްރޭޝަނުން ބުނެފައިވެއެވެ. އަދި މިއީ ފަސޭހަ ކަމާއެކު އިމިގްރޭޝަނާއި ގުޅުން ހުރި މައްސަލަތައް ރިޕޯޓް ކުރަން ހާއްސަ ޕްލެޓްފޯމެކެވެ. މި ޕްލެޓްފޯމް މެދުވެރިކޮށް 24 ގަޑިއިރު މައުލޫމާތު ހުށަހެޅޭނެއެވެ.

މީގެ އިތުރުން ޤަވާއިދާ ޚިލާފަށް އުޅޭ ބިދޭސީންނަށް އަމާޒުކޮށް ޓާސްކްފޯހުން ގިނަ އޮޕަރޭޝަން ތަކެއް ހުއްތުމެއް ނެތި ކުރިއަށް ގެންދާ ކަން އިމިގްރޭޝަނުން ވަނީ ފާހަގަކޮށްފައެވެ.

މީގެއިތުރުން 200 އަށްވުރެ ގިނަ އިމިގްރޭޝަން އޮފިސަރުން ހިމަނައިގެން މާލެ އަދި ހުޅުމާލޭގައި މާސް އޮޕަރޭޝަން ތަކެއް ކުރިއަށް ގެންގޮސްފައިވާ ކަމަށާއި، ޖުމްލަ 5012 ބިދޭސީއަކު ފުރުވާލައިފައިވާ ކަމަށާއި، 1300 އަށް ވުރެ ގިނަ ތަންތަން ބަލައި ފާސްކުރެވިފައިވާ ކަމަށް އިމިގްރޭޝަނުން ބުނެފައިވެއެވެ.