ޚަބަރު
ދައުލަތާ ދެކޮޅަށް ކޯޓަށް ދިއުމުން ތިމާވެއްޓާ ބެހޭ ވުޒާރާގެ ނައިބު ރާޣިބު ވަކިކޮށްފި
މަޤާމުން ވަކިކުރެއްވި ރާޣިބް
ތިނަދޫއަށް ސިޓީއެއްގެ ދަރަޖަ ދިނުން އުވާލުމަށް ދައުލަތާ ދެކޮޅަށް ކޯޓަށް ދިއުމުން މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާގެ ނައިބު އަލްއުސްތާޒް މުޙައްމަދު ރާޣިބް އަޙްމަދު އެމަޤާމުން މިއަދު ރައީސުލްޖުމްހޫރިއްޔަ ޑރ މުޙައްމަދު މުޢިއްޒު ވަކިކުރައްވައިފައިވާ ކަމަށް ރައީސްއޮފީހުގެ އިސް ތަރުޖަމާނު ހީނާ ވަލީދު ވިދާޅުވެއްޖެއެވެ.
ހީނާ މިހެން ވިދާޅުވެފައިވަނީ އެކްސްގައި ކުރައްވައިފައިވާ ޕޯސްޓެއްގައެވެ.
ތިނަދޫއަށް ސިޓީއެއްގެ ދަރަޖަ ދިނުން އުވާލުމަށް ދައުލަތާ ދެކޮޅަށް ކޯޓަށް ދިއުމާ ގުޅިގެން، މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީގެ ޑެޕިއުޓީ މިނިސްޓަރު އަލްއުސްތާޛު މުހައްމަދު ރާޣިބު އަހްމަދު މިއަދު އެމަޤާމުން ރައީސުލްޖުމްހޫރިއްޔާ…
— Heena Waleed (@MvSpokesperson) November 25, 2024
ސަރުކާރާއި ދެކޮޅަށް ރާޣިބް ކޯޓަށް ހުށައަޅުއްވައިފައިވާ މައްސަލައަކީ އާބާދީގައި 10،000 ހަމަނުވާ ގދ. ތިނަދު އަށް ސިޓީގެ ދަރަޖަ ދިން މައްސަލަ ބާޠިލު ކުރުމުވެ. ރާޣިބް މިމައްސަލަ ހުށައަޅުއްވައްވައިފައިވަނީ ހައިކޯޓަށެވެ.
ތިނަދު އަށް ސިޓީއެއްގެ ދަރަޖަ ދިނީ ކުރީގެ ރައީސް އިބްރާހީމް މުޙައްމަދު ޞާލިޙްގެ ވެރިކަމުގައެވެ. ސިޓީއެއްގެ ދަރަޖަ ދެވޭނީ އާބާދީގައި ދިހަހާސް މީހުން ހަމަވުމުން ކަމަށް ޤާނޫނުގައި ބުނެފައި އޮވެއެވެ. ނަމަވެސް ތިނަދޫގެ އާބާދިއަކީ 7،000 މީހުންނެވެ.
މީގެކުރިންވެސް ރާޣިބް ހައިކޯޓުގައި ކުޑަކުއްޖަކަށް ޖިންސީ ގޯނާ ކުރި މީހެއްގެ ދިފާޢުގައި ވަކާލާތު ކޮށްފައިވެއެވެ. މިމައްސަލާގައި ހައިކޯޓުން ވަނީ ދައުލަތުން އައްޔަނުކޮށްފައިވާ މަޤާމެއްގައި ހުރި ބޭފުޅަކަށް ދައުލަތާ ދެކޮޅަށް ވަކާލާތު ނުކުރެވޭނެ ކަމަށް ޙުކުމް ކޮށްފައެވެ.
