ޒަކާތު ފަންޑުން މިހާތަނަށް ބޯން މެރޯ ހެއްދުމަށް އަށް މިލިއަނަށްވުރެ ގިނަ ރުފިޔާ ޚަރަދުކުރެވިފައިވޭ: އެންސްޕާ

ޒަކާތު ފަންޑުން އެއްއަަހަރު ތެރޭ ބޯން މެރޯ ޓްރާންސްޕްލާންޓް ހެދުމަށް އަށް މިލިއަނަށްވުރެ ގިނަ ރުފިޔާ ޚަރަދުކުރެވިފައިވާ ކަމަށް ނޭޝަނަލް ސޯޝަލް ޕްރޮޓެކްޝަން އޮތޯރިޓީ އިން ބުނެފިއެވެ. 

ސަރުކާރަށް އަހަރެއް ފުރުމާއި ގުޅިގެން އެއިދާރާއިން ހާސިލް ކުރެވިފައިވާ ކަންކަން ހާމަކޮށް އެންސްޕާއިން ޢާންމު ކޮށްފައިވާ މަޢުލޫމާތު ތަކުގައި ބުނެފައިވަނީ އެންސްޕާއިން އާންމުކޮށްފައިވާ ތަފާސްހިސާބުތަކުން ދައްކާގޮތުގައި ތެލެސީމިއާ ބަލި ތަޙައްމަލް ކުރަމުންދާ 14 ކުށްޖަކުވަނީ ޒަކާތު ފަންޑުގެ ޚަރަދުގައި މިއަހަރު ބޯންމެރޯ ޓްރާންސްޕްލާންޓް ހެދުމަށް ފޮނުވާފައެވެ. 

މީގެ ތެރެއިން ބައެއް ކުދިންގެ ފަރުވާ ކުރިއަށްދާއިރު އަނެއްބައި ކުދިންވަނީ ފަރުވާ އެއްކޮށް ނިމިފައެވެ.މިއަހަރު އެކި ދުވަސްވަރު 14 ކުށްޖަކު ބޯންމެރޯ ހެދުމަށް ފޮނުވާފައިވާއިރު، އޭގެ ތެރެއިން އެއް ކުއްޖަކު ނިޔާވެފައިވާ ކަމަށް މޯލްޑިވިއަން ބްލަޑް ސާވިސަސްއިން މީގެ ކުރިން ވަނީ ހާމަކޮށްފައެވެ. ބާކީތިބި ކުދިންގެ ތެރެއިން މިއަހަރުގެ މިހާތަނަށް 8 ކުއްޖެއްގެ ބޯންމެރޯ ޓްރާންސްޕްލާންޓް ހަދާފައެވެ.

 އަދި މިވަގުތުވެސް 5 ކުއްޖަކު ބޯންމެރޯ ހަދަމުންދާ ކަމަށް އެންސްޕާގެ ތަފާސްހިސާބުތައް ދައްކައެވެ.މިއާއެކު މިވީ އެއް އަހަރުތެރޭ ބޯންމެރޯ ހެދުމަށް ޒަކާތު ފަންޑުންވަނީ 8،033،646.37 ރުފިޔާ ޚަރަދުވެފައިވާ ކަމަށް އެންސްޕާގެ ތަފާސްހިސާބުތަކުން ދައްކައެވެ.