ޚަބަރު
ދަރިންގެ ޚަރަދަށް ދޭ 2000 ރުފިޔާ ބޮޑު ކޮށްދޭން މަޖިލީހަށް ހުށައަޅައިފި
މަގުމަތީގައި ހިނގާފައި ދިޔަ ކުއްޖަކާއި ބެލެނިވެރިއެއް
ދަރިންގެ ޚަރަދަށް ދޭ 2000 ރުފިޔާ ބޮޑު ކޮށްދޭން ރައްޔިތުންގެ މަޖިލީހަށް ހުށައަޅައިފިއެވެ.
މިމައްސަލަ މަޖިލީހަށް ހުށައަޅުއްވައިފައިވަނީ ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު މުޙައްމަދު އިބްރާހިމެވެ.
މެމްބަރު މުޙައްމަދު އިބްރާހިމް މިކަން މަޖިލީހަށް ހުށައަޅުއްވައިފައިވަނީ އޭނާ މަޖިލީހުގެ ރައީސް ޢަބްދުއްރަޙީމް ޢަބްދުﷲ އަށް އެޑްރެސް ކުރައްވައި ފޮނުއްވެވި ސިޓީއެއްގައެވެ.
މެމްބަރު މުޙައްމަދު އިބްރާހިމްގެ ސިޓީގައި ވަނީ، ޚިދުމަތާއި ތަކެތީގެ އަގު އިންތިހާއަށް އުފުލިފައިވާއިރު، މަހެއްގެ މައްޗަށް ކަނޑައެޅިފައިވާ 2000 ރުފިޔާއަކީ ދަރިންގެ ހުރިހާ ޚަރަދެއް ފޫބެއްދޭވަރަށް ވުރެ މާކުޑަ ޢަދަދެއް ކަން ފާހަގަކުރައްވައިފައެވެ.
އެގޮތުން އެންމެ ކުޑަމިނުން ސްކޫލު ފީއާއި ޓިއުޝަން ފީތަކަށް އެކަނި ބަލައިލިކަމުގައި ވީނަމަވެސް، 2000 ރުފިޔާ އަކުން ނުފުއްދޭނެ ކަމަށް އޭނާ ވިދާޅުވެފައިވެއެވެ. އަދި ކުޑަކުދިންނަށް ކާންދޭ ތަކެތީގެ އިތުރުން ނެޕީގެ ޚަރަދުތަކަށް އެކަނި ބެލިނަމަވެސް މި ފައިސާއިން ނުފުއްދޭނެ ކަމަށްވެސް ވިދާޅުވެފައިވެއެވެ.
ދަރިންނަކީ މާތްالله ހަވާލު ކުރައްވާފައިވާ ބޮޑު އަމާނާތެއް، އެކުދިން ރަނގަޅު ގޮތުގައި ބަލައި ބޮޑުކުރުމާއި ޙައްޤުތައް އަދާކުރުމުގައި ފަރުވާކުޑަކުރުން އޮވެގެންނުވާނެ. ޒިންމާދާރު ކުރެވެންޖެހޭނެ. pic.twitter.com/WwdlF28WJM
— محمد كودو (@mohamedkudu) November 25, 2024
ޤަވާއިދުގައި ބަޔާންކޮށްފައިވާ މި އަދަދުގެ ސަބަބުން ކޯޓުގެ ދިގު މަރުހަލާ ކަނޑައްތު ކުރުމަށްފަހު ވެސް ލިބެނީ ހަމަ މިއަދަދު ކަމުން ރޫޅިފައިވާ އައިލާތަކާއި އެކަނިވެރި މައިންނަށް މިކަން ބަރުދާސްތު ކުރަން އުނދަގޫ ކަމަކަށް ވެފައި ވާކަން އެ ސިޓީގައި ފާހަގަކޮށްފައި ވެއެވެ.
އެހެންކަމުން މަޖިލީހުގެ ޤަވާއިދު ކޮމިޓީ މެދުވެރިކޮށް ޢާއިލީ އަދި އިޖްތިމާއީ ތަރައްޤީއާ ގުޅޭ ކަމާ ގުޅުންހުރި ބޭފުޅުންނާ ބައްދަލުކޮށް މި ޤަވާއިދަށް ގެންނަން ޖެހޭ ހެޔޮ ބަދަލުތައް ގެނެވޭނެ ގޮތް ހަދައިދިނުމަށް އޭނާ ވަނީ އެދިވަޑައިގެންފައެވެ.
ޢާއިލާއާ ބެހޭ ޤާނޫނުގެ 72ވަނަ މާއްދާގައި ވާގޮތުން ކުއްޖާ ބެލެހެއްޓުމުގެ ޚަރަދަށް ކޮންމެ މަހަކު 2000 ރުފިޔާ ބައްޕަ ދޭންޖެހެއެވެ. އަދި އިތުރުވާ ކޮންމެ ކުއްޖަކަށް 1000 ރުފިޔާ ދޭންޖެހެއެވެ.
