މިއަހަރުގެ ޙައްޖުވެރިންގެ ފަހު ފްލައިޓު ފުރައިފި

1447 ވަނަ އަހަރުގެ މަތިވެރި ޙައްޖުގެ އަޅުކަން އަދާކުރުމަށް ރާއްޖެއިން ފުރި ޙައްޖުވެރިންގެ އެންމެ ފަހު ފްލައިޓު މިއަދު ހެނދުނު ފުރައިފިއެވެ. މި ފްލައިޓާއެކު، މިއަހަރު ރާއްޖެއިން ޙައްޖަށްދާ ހުރިހާ ދިވެހި ޙައްޖުވެރިން މިހާރު ވަނީ ސަޢުދީ ޢަރަބިއްޔާއަށް ގޮސްފައެވެ.

ވެލާނާ އިންޓަރނޭޝަނަލް އެއާޕޯޓުން މިއަދު ހެނދުނު 09:45 ގައި ފުރި މި ފަހު ފްލައިޓުގައި 253 ޙައްޖުވެރިން ދަތުރުކޮށްފައިވެއެވެ. މިއަހަރު ރާއްޖެއިން ޙައްޖަށް މީހުން ގެންގޮސްފައިވަނީ ޖުމްލަ 4 ފްލައިޓެއްގައެވެ. އެއީ ސަޢުދީ އެއާލައިންގެ 2 ފްލައިޓާއި، ރާއްޖޭގެ ޤައުމީ އެއާލައިން 'މޯލްޑިވިއަން' ގެ 2 ފްލައިޓެވެ.

މީޑިއާއަށް މަޢުލޫމާތު ދެއްވަމުން މޯލްޑިވްސް ޙައްޖު ކޯޕަރޭޝަންގެ ޗެއަރމަން ޝެއިޚް މުޙައްމަދު ރަޝީދު އިބްރާހީމް ވިދާޅުވީ، ކުރިން ދިޔަ ހުރިހާ ޙާޖީން މިހާރު ޢުމްރާގެ ކަންކަން ފުރިހަމަކޮށްފައިވާ ކަމަށެވެ. އަދި މިއަދު ފުރި ޙައްޖުވެރިންނަށްވެސް، ތަރުތީބު ކުރެވިފައިވާ ގޮތަށް ކަންކަން ކުރިއަށްދާނަމަ މިއަދު ހަވީރުގެ ވަގުތެއްގައި ޙަރަމްފުޅަށް ގޮސް ޢުމްރާގެ އަޅުކަން ނިންމާލެވޭނެ ކަމަށް އޭނާ ވިދާޅުވިއެވެ.

އިރާދަކުރެއްވިއްޔާ ޙައްޖުގެ ހުރިހާ އިންތިޒާމުތަކެއްވެސް މިއަހަރުވެސް މިހުރީ ވަރަށް ފުރިހަމައަށް. އެކޮޅުގައިވެސް ޙައްޖުވެރިންގެ ހުރިހާ ކަމެއް ވަރަށް ރަނގަޅަށް ކުރިއަށްދަނީ،

      ޗެއަރމަން 

ޙައްޖުވެރިންގެ ދަތުރުތައް ލުއިފަސޭހަކުރުމުގެ ގޮތުން މިއަހަރުވެސް 'މައްކާ ރޫޓް އިނީޝިއޭޓިވް' ގެ ދަށުން ވަނީ އިންތިޒާމުތައް ހަމަޖައްސާފައެވެ. މި ނިޒާމުގެ ސަބަބުން ޙައްޖުވެރިންގެ އިމިގްރޭޝަން އަދި ޗެކިންގެ ހުރިހާ ކަމެއް ރާއްޖޭގައި ނިމިގެންދާތީ، ޖިއްދާ އެއާޕޯޓުގައި މަޑުކުރަން ނުޖެހި ސީދާ މައްކާއަށް ދަތުރުކުރުމުގެ ފުރުޞަތު ޙާޖީންނަށް ލިބިގެންދެއެވެ.

ރާއްޖެއަށް ކޮންމެ އަހަރަކުވެސް ލިބޭ 1000 ޙައްޖު ކޯޓާގެ ދަށުން، މިއަހަރުވެސް ޙައްޖަށް މީހުން ފޮނުވާފައިވަނީ ޙައްޖު ކޯޕަރޭޝަންގައި ފައިސާ ދައްކާފައިވާ ފަރާތްތަކުގެ ކިޔު ތަރުތީބުންނެވެ. ސަރުކާރުން އިސްކަންދެއްވަނީ ޙައްޖުގެ ހުރިހާ އިންތިޒާމުތަކަކީވެސް ޙައްޖުވެރިންނަށް ވީހާވެސް ލުއިފަސޭހަ އަދި ރައްކާތެރި އިންތިޒާމުތަކަކަށް ހެދުމަށެވެ.