ކުޅިވަރު
މި ސީޒަނަށްފަހު ލިވަޕޫލުން ފެނުމަށް ވުރެން ނުފެނުން ގާތް: ސަލާހް
މުޙައްމަދު ސަލާހް، ފޮޓޯ: ޓެރެންސް ލެވިސް/ގެޓީއިމޭޖަސް
ހުލާސާ
- މި ސީޒަނަށްފަހު ކްލަބުގައި މަޑުކުރުމަށް ވުރެން ކްލަބް ދޫކޮށް ދިއުން ގާތް ކަމަށް ސަލާހް ބުނެފި.
- ސަލާހް ވަނީ އާދިއްތަ ދުވަހު ސައުތެމްޕްޓަންއާ ދެކޮޅަށް ކުޅުނު މެޗުގައި ފަހަތުން އަރައި ލިވަޕޫލް މޮޅުވުމުގައި މުހިންމު ދައުރެއް އަދާކޮށްފައި.
- ގާތްގަނޑަކަށް ޑިސެމްބަރު މަހާ ހިސާބަށް އާދެވުނުއިރު، އަދިވެސް ލިވަޕޫލުން އޭނާއަށް އައު ކޮންޓްރެކްޓެއް ހުށަހަޅާފައި ނުވާކަމަށް ސަލާހް ބުނެފައިވޭ.
- ރިޕޯޓުތައް ބުނާގޮތުން ލިވަޕޫލުން ރަސްމީކޮށް އައު ކޮންޓްރެކްޓެއް އަދި ސަލާހްއަށް ހުށަހަޅާފައި ނުވަނީ، ދެ ފަރާތުގެ ދެމެދުގައި ބައެއް ކަންކަމަށް އެއްބަސް ނުވެވޭތީ ކަމަށް.
- ލިވަޕޫލްގެ ބައެއް މަސްދަރުތައް ބުނާ ގޮތުން، ދެފަރާތުގެ މަޝްވަރާތައް ކުރިޔަށްދަނީ ރަނގަޅަށް.
މި ސީޒަނަށްފަހު ކްލަބުގައި މަޑުކުރުމަށް ވުރެން ކްލަބް ދޫކޮށް ދިއުން ގާތް ކަމަށް، އިންގްލިޝް ޕްރިމިއަރ ލީގުގެ ލިވަޕޫލަށް ކުޅެމުން އަންނަ މުޙައްމަދު ސަލާހް ބުނެފިއެވެ. ސަލާހް މިހެން ބުނީ، އޭނާ އާއި ލިވަޕޫލާއި ދެމެދު ހަދާފައިވާ ކޮންޓްރެކްޓުގެ މުއްދަތު ހަމަވުމަށް ގާތް ވެފައިވީނަމަވެސް، ކޮންޓްރެކްޓް އައު ކުރުމުގެ އިތުރު ހުށަހެޅުމެއް ލިވަޕޫލުން ލިބިފައި ނުވާތީއެވެ.
ސަލާހްގެ ކޮންޓްރެކްޓް މި ސީޒަނުގެ ނިޔަލަށް ހަމަވާއިރު، ކޮންޓްރެކްޓާ ގުޅިގެން މިފަދަ ވާހަކައެއް ސަލާހް ބުނުމަކީ ލިވަޕޫލްގެ ސަޕޯޓަރުންނަށް އަޑުއަހަން އުނދަގޫ ހަބަރަކަށް ވާނެކަން ޔަގީނެވެ. މިކަމުގެ އެންމެ މުހިންމު ސަބަބަކީ، މި ސީޒަނުގައި އޭނާ ދައްކަމުންދާ މޮޅު ކުޅުމެވެ. އޭނާ ވަނީ އާދިއްތަ ދުވަހު ސައުތެމްޕްޓަންއާ ދެކޮޅަށް ކުޅުނު މެޗުގައި ފަހަތުން އަރައި ލިވަޕޫލް މޮޅުވުމުގައި މުހިންމު ދައުރެއް އަދާކޮށްފައެވެ. އެގޮތުން އެ މެޗުގައި ސަލާހް ދެ ގޯލު ކާމިޔާބުކޮށްފައިވާއިރު، މެޗުން މޮޅުވި ގޯލަކީ 83 ވަނަ މިނެޓުގައި ޕެނަލްޓީއަކުން އޭނާ ކާމިޔާބުކުރި ގޯލެކެވެ. މި މޮޅާއެކު، ލިވަޕޫލް މިހާރު އޮތީ 8 ޕޮއިންޓުގެ ތަފާތަކާއެކު ލީގުގެ އެއްވަނައިގައެވެ.
އާދީއްތަ ދުވަހު ސައުތެމްޕްޓަންއާ ދެކޮޅަށް ކުޅުނު މެޗަށްފަހު ނޫސްވެރިންނާ ވާހަކަ ދައްކަމުން ސަލާހް ބުނީ، ގާތްގަނޑަކަށް ޑިސެމްބަރު މަހާ ހިސާބަށް އާދެވުނުއިރު، އަދިވެސް ލިވަޕޫލުން އޭނާއަށް އައު ކޮންޓްރެކްޓެއް ހުށަހަޅާފައި ނުވާކަމަށެވެ.
އައި އޭމް ޕްރޮބަބްލީ އައުޓް، ދޭން އިން
ކޮންޓްރެކްޓާ ގުޅިގެން ސަލާހް ބުންޏެވެ.
އިތުރު ކޮންޓްރެކްޓެއް މިހާތަނަށް ހުށަހަޅާފައި ނުވުމުން އެކަމާ އޭނާ މާޔޫސްވޭތޯ ނޫސްވެރިއަކު އެހުމުން ސަލާހް ބުނީ، އެއީ ބޮޑު މާޔޫސްކަމެއް ކަމަށާއި، ކްލަބުގެ ސަޕޯޓަރުން އޭނާ މަޑުކުރަން ބޭނުންވާކަމަށާއި، އަދި އޭނާ ވެސް ކްލަބުގައި މަޑުކުރަން ބޭނުން ކަމަށާއި، ނަމަވެސް ކޮންޓްރެކްޓު އައުކުރުމަކީ ސަޕޯޓަރުންނާއި އޭނާގެ އަތުގައި އޮތް ބާރެއް ނޫންކަމަށެވެ.
ފުޓުބޯޅަ ކުޅުމުން އަވަހަށް ރިޓަޔަރ ކުރާކަށެއް އަހަރެން ބޭނުމެއް ނޫން. އަދި މި ސީޒަން ކުރިޔަށް މިދަނީ ތަށިތަކެއް ހާސިލްކުރުމަށް ވަރަށް ސަމާލުކަން ދީގެން. އަހަރެން ބޭނުންވަނީ މި ސީޒަނުގައި ލިވަޕޫލާއިއެކު ޕްރިމިއަރ ލީގާއި ޗެމްޕިއަންސް ލީގު ވެސް ކާމިޔާބު ކުރުމަށް. ނަމަވެސް ކޮންޓްރެކްޓްގެ ކަންތަކާ ވަރަށް މާޔޫސްވޭ. އެކަމަކު ވެސް ކުރިޔަށް ވާގޮތެއް ބަލާނީ
ސަލާހް ބުންޏެވެ.
ރިޕޯޓުތައް ބުނާގޮތުން ލިވަޕޫލުން ރަސްމީކޮށް އައު ކޮންޓްރެކްޓެއް އަދި ސަލާހްއަށް ހުށަހަޅާފައި ނުވަނީ، ދެ ފަރާތުގެ ދެމެދުގައި ބައެއް ކަންކަމަށް އެއްބަސް ނުވެވޭތީއެވެ. އެގޮތުން ކޮންޓްރެކްޓް އައުކުރުމަށް ކުޅުންތެރިޔާ އެއްމީދުކުރާ ބައެއް ކަންކަމާއި ކްލަބުން ހުށަހަޅާ ކަންކަމާއި ދެމެދު ފަރަގެއް އުޅެއެވެ. ނަމަވެސް، ލިވަޕޫލްގެ ބައެއް މަސްދަރުތައް ބުނާ ގޮތުން، ދެފަރާތުގެ މަޝްވަރާތައް ކުރިޔަށްދަނީ ރަނގަޅަށެވެ.