ވިނީސިއަސްގެ އަނިޔާގެ އަސްލަކީ މި ސީޒަނުގެ މެޗު ކަލަންޑަރުކަމަށް އޭނާ ބުނެފި

ވިނީސިއަސް ޖޫނިއަރއަށް ލިބުނު ހެމްސްޓްރިންގް އަނިޔާގެ އަސްލަކީ، މި ސީޒަނުގެ މެޗު ކަލަންޑަރުކަމަށް އޭނާ ބުނެފިއެވެ. ވިނީސިއަސްގެ މި އަނިޔާއަކީ، އާދީއްތަ ދުވަހު ސްޕެނިޝް ލީގުގައި ލެގާނެސްއާ ދެކޮޅަށް ކުޅުނު މެޗުގައި އޭނާއަށް ލިބުނު އަނިޔާއެކެވެ. މި އަނިޔާއާ ގުޅިގެން މަހެއްހާ ދުވަހަށް އޭނާ ކުޅުމާ ދުރުގައި މަޑުކުރަން ޖެހިދާނެކަމަށް ރެއާލް މެޑްރިޑުން ވަނީ ހާމަކޮށްފައެވެ.

ދަ ކްރޭޒީ ކަލަންޑަރ. ޓައިމް ޓު ރިކަވަރ

އަނިޔާއާ ގުޅިގެން ސޯޝަލް މީޑިއާގައި އާންމުކުރި ޕޯސްޓެއްގައި ވިނީސިއަސް ބުންޏެވެ.

ވިނީސިއަސްގެ މި އަނިޔާގެ ރިހުން، އޭނާގެ އިތުރުން، މެޑްރިޑަށް ވެސް ތަހައްމަލުކުރަން ޖެހޭނެއެވެ. ސަބަބަކީ ކުރިމަތީގައި މުހިންމު މެޗުތަކެއް އޮތް ދަނޑިވަޅަކަށް ވުމެވެ. އެގޮތުން ޗެމްޕިއަންސް ލީގުގައި މިހަފްތާ އެ ކްލަބުން ލިވަޕޫލާއި ދެކޮޅަށް ނިކުންނައިރު، އެއީ މެޑްރިޑަށް ވަރަށް މުހިންމު މެޗެކެވެ. އޭގެ ފަހުން ލީގުގައި ގެޓާފޭ، އެތުލެޓިކް ކްލަބް، ޖިރޯނާ، ރަޔޯ ވެޔަކާނޯ އަދި ޗެމްޕިއަންސް ލީގުގައި އެޓަލާންޓާއާ ދެކޮޅަށް ކުޅޭ މެޗުތައް ވިނީސިއަސްއަށް ގެއްލޭނެކަމަށް ބެލެވެއެވެ.

މެޑްރިޑުން ރަށުން ބޭރުގައި ލިވަޕޫލްއާއި ބުދަ ދުވަހުގެރޭ ބައްދަލުކުރާއިރު، އެ ޓީމު އޮތީ ޗެމްޕިއަންސް ލީގުގެ ލީގު ފޭސްގައި މިހާތަނަށް ކުޅުނު 4 މެޗުން ލިބުނު 6 ޕޮއިންޓާއެކު 18 ވަނައިގައެވެ. އެހެންކަމުން ޕްލޭ އޮފް މެޗަކާއި ނުލައި މުބާރާތުގެ ނޮކް-އައުޓް ބުރަށް ދަތުރުކުރުމަށް އެ ޓީމުން ގިނަ މަސައްކަތްތަކެއް ކުރަން ޖެހޭނެއެވެ. އަދި މިހާތަނަށް ޗެމްޕިއަންސް ލީގުގައި ދެ މެޗުން ބަލިވެފައިވާއިރު، ލިވަޕޫލް މެޗު ގެއްލުމަކީ މުބާރާތުގައި ކުރިޔަށް ދިއުމަށް އެ ޓީމަށް ކުރިމަތިވާނެ ބޮޑު ހުރަހެކެވެ.

ވިނީސިއަސްގެ އިތުރުން، މެޑްރިޑުގެ މުހިންމު ކުޅުންތެރިންތަކެއް މި ވަގުތު ތިބީ އަނިޔާގައެވެ. އޭގެ ތެރޭގައި ކީޕަރު ތިއާބަތު ކޯޓްވާ، ފޯވާޑް ރޮޑްރީގޯ، އެޑަރ މިލިޓާއޯ، އޮރޭލިން ޗޯމޭނީ އަދި ޑެނީ ކާވަހާލް ހިމެނެއެވެ. މި އަނިޔާތަކާ ގުޅިގެން، ޓީމު ސެލެކްޝަންގައި، ކޯޗު ކާލޯ އެންޗޮލޮޓީއަށް ވެސް ވަނީ އުނދަގޫތަކާ ކުރިމަތިވެފައެވެ. 

މި ސީޒަނުގައި މެޑްރިޑަށް އެންމެ ގިނަ ގޯލު ކާމިޔާބުކޯށްދީފައި ވަނީ ވިނީސިއަސްއެވެ. އެގޮތުން އޭނާވަނީ މިހާތަނަށް 12 ގޯލު ކާމިޔާބުކޮށް، 5 އެސިސްޓްކޮށްދީފައެވެ. އަދި އަނިޔާގެ ކުރިން މެޑްރިޑް މި ސީޒަނުގައި ކުޅުނު 18 މެޗުގައި ވެސް އޭނާ ވަނީ ކުޅެފައެވެ.