ކައުންސިލް ރައީސްގެ ދެ ގޯލާއެކު އަލިފުށިން ފަސޭހަކަމާއެކު ކެންދޫ ބަލިކޮށްފި

މާލޭގައި މިހާރު ކުރިޔަށްދާ ނައިންޓީ ޕްލަސް ގޯލްޑް ކަޕްގެ ގްރޫޕް-ޑީގައި ރ. އަލިފުއްޓާއި ބ. ކެންދޫ ބައްދަލުކުރި މެޗު އަލިފުށިން ފަސޭހަކަމާއެކު ކާމިޔާބުކޮށްފިއެވެ. ތަޖުރިބާކާރު ގިނަ ކުޅުންތެރިންތަކެއްގެ މައްޗަށް އެކުލަވާލާފައި އޮތް އަލިފުށިން މެޗު ކާމިޔާބުކުރީ 5-1 އިންނެވެ. އަދި މި މެޗުގައި އެ ރަށު ކައުންސިލްގެ ރައީސް އާދަމް އިމްރާން ވަނީ ދެ ގޯލު ކާމިޔާބުކޮށްފައެވެ. 

ރާއްޖޭގެ ފުޓުބޯޅައިގެ އެކި ލެވެލްތަކުގައި ޓީމުތައް ގެންގުޅެފައިވާ މަޝްހޫރު ކޯޗު، އިސްމާއިލް އާސިފް (ކުޑަ ހީނާ)ގެ އިރުޝާދުގެ ދަށުން ކުޅެމުން އަންނަ އަލިފުށި ޓީމުން ވަނީ މުޅި މެޗު ކޮންޓްރޯލްކޮށް، ތަޖުރިބާގެ ގޮތުން ބޮޑު ފަރަގެއް އޮތް ކެންދޫއާ ދެކޮޅަށް މޮޅު ކުޅުމެއް ދައްކާފައެވެ. އެގޮތުން އެ ޓީމުގެ ފުރަތަމަ ގޯލު ވެސް ވަނީ މެޗުގެ ވަރަށް ކުރީކޮޅި ކާމިޔާބުކޮށްފައެވެ. 

އަލިފުށިން މެޗުގެ ލީޑު ނެގީ މެޗުގެ ތިންވަނަ މިނެޓުގައި ގައުމީ ޓީމުގެ މިޑްފީލްޑަރު، ހުސެއިން ނިހާން (ނިހާޓް) ކާމިޔާބުކުރި ގޯލަކުންނެވެ. ނިހާޓް ވަނީ މެޗުގައި އިތުރު ގޯލެއް ވެސް ކާމިޔާބުކޮށްފައެވެ. އަލިފުށީގެ ދެވަނަ ގޯލާއި ފަސްވަނަ ގޯލު ކާމިޔާބުކުރީ، މީގެ އަހަރުތަކެއް ކުރިން ފުރަތަމަ ޑިވިޝަނުގެ ގިނަ ޓީމުތަކުން ފެނުނު އާދަމް އިމްރާނެވެ. އޭނާއަކީ އަލިފުށީ ކައުންސިލްގެ ރައީސް ވެސް މެއެވެ. 

އަލިފުށި ޓީމުގެ ތިން ވަނަ ގޯލު ކާމިޔާބުކޮށްދިނީ ފުރަތަމަ ޑިވިޝަނުގައި ސުޕަ ޔުނައިޓެޑް ސްޕޯޓްސް (ސަސް) އާއި ދަ ގްރާންޑޭ ސްޕޯޓްސް ކްލަބަށް ކުޅުނު އަހުމަދު ހުސާމް (ހުސާންކޮ)އެވެ. ހުސާންކޮ މި ގޯލު ކާމިޔާބު ކުރުމުގެ ކުރިން، އެ ޓީމަށް ލިބުނު ޕެނަލްޓީއެއް ކާމިޔާބު ކުރުމަށް ވެސް އޭނާ މަސައްކަތް ކޮށްފައިވެއެވެ. ނަމަވެސް، އޭނާ ފޮނުވާލި ޕެނަލްޓީ ދިޔައީ ގޯލުގެ ދަނޑި ކައިރިން ބޭރަށެވެ.

މެޗުގެ ދެވަނަ ހާފުގައި ދަނޑުގެ ލައިޓުތައް ނިވުމާއި ގުޅިގެން ގިނަ ވަގުތުތަކަށް ކުޅުން މެދުކަނޑާލާފައި އޮތެވެ. އެހެންކަމުން މެޗުގެ 90 މިނެޓު ހަމަވުމުން ރެފްރީ ވަނީ އިތުރު ވަގުތުގެ ގޮތުގައި 25 މިނެޓު ދީފައެވެ.

އަލިފުށީގެ ދެ ގޯލެއްގެ އިތުރުން، ކެންދޫގެ ގޯލު ވެސް ފެނިގެން ދިޔައީ މެޗުގެ އިތުރު ވަގުތުގައެވެ. އެ ޓީމުގެ ރަޝާދު އަބްދުލް މަތީނަށް ޕެނަލްޓީ އޭރިޔާ ކައިރިން ލިބުނު ބޯޅަ އޭނާ ގޯލުގެ މަތީ ކަނަށް ފޮނުވާލީ، އަލިފުށި ޓީމުގެ ޑިފެންޑަރުގެ ކައިރިން ނައްޓާލުމަށްފަހު ގޯލްކީޕަރުގެ ބޯ މަތިންނެވެ. 

މުބާރާތުގެ މެޗެއް ވަނީ ހޯމަ ދުވަހުގެ ހަވީރު ވެސް ކުޅެފައެވެ. ފުވައްމުލަކާއި ދިއްދޫ ބައްދަލުކުރި އެ މެޗު 7-3 އިން ކާމިޔާބުކޮށްފައިވަނީ ފުވައްމުލަކެވެ. މި މެޗުގައި ފުވައްމުލަކަށް ކުޅެމުން އަންނަ، ކުރިން ދެވަނަ ޑިވިޝަނުގައި ނިއު ރޭޑިއަންޓަށް ކުޅުނު ކޯފީ އޮއޫސޫ ވަނީ ހެޓްރިކެއް ވެސް ހަދާފައެވެ. މި ނަތީޖާއާއެކު މުވައްމުލަކަށް ދެ މެޗުން ލިބުނު 6 ޕޮއިންޓާއެކު އެ ޓީމު މިހާރު އޮތީ ގްރޫޕް-އޭގެ އެއްވަނައިގައެވެ. 

މި މުބާރާތުގައި އަންގާރަ ދުވަހު ވެސް ދެ މެޗު ކުޅޭނެއެވެ. ހަވީރު ކުޅޭ މެޗުގައި ބައްދަލުކުރާނީ ކުޑަހުވަދޫ އާއި ފަރެސްމާތޮޑާއެވެ. އަދި ދެވަނަ މެޗުގައި މާލޭ ސިޓީއިން ނިކުންނާއި ތުޅާދޫއާ ދެކޮޅަށެވެ.