ހުޅުމާލެ ޖަލުގައި ޢާއިލީ ބައްދަލުވުމަށް ޙާއްސަ ގެއެއް ހުޅުވައިފި

ގައިދީންނާއި ބަންދުގައި ތިބޭމީހުންގެ އާއިލާ އެމީހުންނާއި ބައްދަލުކުރުމަށް ޙާއްސަ ކުރެވިފައިވާގެ ހުޅުމާލެ ޖަލުގައި ރަސްމީކޮށް ހުޅުވައިފިއެވެ. ރަސްމީކޮށް އާއިލާއާ ބައްދަލުކުރާގެ ހުޅުވައިދެއްވީ ކެލާ ދާއިރާގެ މެމްބަރު ޢަބްދުﷲ ޝަރީފެވެ.

އާއިލާ އާ ބައްދަލުކުރާ ގެ ހުޅުވުމުމަށް ބޭއްވި ރަސްމިއްޔާތުގައި ކޮމިޝަނަރ އޮފް ޕްރިޒަންސް ޙަސަން ޒަރީރު، ޑެޕިއުޓީ ކޮމިޝަނަރ އޮފް ޕްރިޒަންސް އުސްތާޛް އިބްރާހިމް މުޙައްމަދު ދީދީ، ހުޅުމާލޭ ޖަލުގެ ޑައިރެކްޓަރ ޑެޕިއުޓީ ސުޕްރިންޓެންޑަންޓް އޮފް ޕްރިޒަންސް އަޙްމަދު ޖާދުﷲ، ހުޅުމާލެ ޖަލުގެ ސީނިއަރ މެނޭޖްމަންޓާއި އެޖަލުގެ އޮފިސަރުން ބައިވެރިވިއެވެ.

މޯލްޑިވްސް ކަރެކްޝަނަލް ސަރވިސް (އެމްސީއެސް) އިން މައުލޫމާތު ދިން ގޮތުގައި  މީގެ ކުރިން ހުޅުމާލެ ޖަލުގައި އާއިލީ ބައްދަލުވުމަށް ކަނޑައަޅާފައިވާ ތަނަކީ ފަހަރަކު އާއިލާއަކަށް ބައްދަލުވުން ފޯރުކޮށްދެވޭހާ ޖާގައިގެ ކުޑަ ތަނެކެވެ. އަދި މިހާރު ތަރައްގީކޮށް ހުޅުވި ތަނުގައި ފަހަރަކު ތިން ގައިދީންނަށް އެމީހުންގެ އާއިލާއާ ބައްދަލުކުރުމުގެ ފުރުޞަތު ލިބޭނެ ކަމަށް އެމްސީއެސް އިން ވަނީ ވިދާޅުވެފައެވެ.

މީގެއިތުރުން ގައިދީންނާއި ބަންދުގައި ތިބޭ މީހުންނަށް ބައްދަލުކުރުމަށް ޢާއިލާއާ އެކު އަންނަ ކުޑަކުދިން ވާހަަކަ ކިއުމާއި ކުޅުމަށް ޙާއްސަ ކުރެވިގެން ހަދާފައިވާ "ކިޑްސް ކޯނާރ އެއްގެ އިތުރުން ބައްދަލުކުރާ ގެއާ އިންވެގެން ވެއިޓިންގ ރޫމެއްވެސް ވަނީ ޤާއިމްކޮށްފައެވެ. މިއީ އާއިލާއިން ބައްދަލުކުރުމަށް ހާޞިރުވާ މީހުން މަޑުކުރުމަށާއި އެހެނިހެން ބޭނުންތަކުގައި ޖަލަށް ޒިޔާރާތް ކުރާ ފަރާތްތައް މަޑުކުރުމަށް ޤާއިމްކޮށްފައިވާ ތަނެކެވެ.

ބައްދަލު ކުރާގެ ޤާއިމްކުރުމާއި އެކު  ގައިދީންނަށާއި ބަންދުގައި ތިބޭ މީހުންނަށް ފޯރުކޮށްދެވޭ އާއިލީ ބައްދަލުވުމުގެ އަދަދު އިތުރުވެގެންދާނެކަމަށްވެސް މޯލްޑިވްސް ކަރެކްޝަނަލް ސަރވިސްއިން ވިދާޅުވިއެވެ.